Read koorete Luqaase 19 Bible Online

Luqaase 19 - koorete bible

Luqaase 19

¹Yesuusay handi Yariko katamaa gelli ye katamaannani dhaddi gariya yesune

²yahani Zakoose sunge bidzi qaraace e yecha. Esini qaraacituse afana maaga maaqisine woduma e maaqicha.

³Yesuusay oone maaqesa erese e worgicha. Axiti iitana laga maaqicho gishaara hata axe be maaqicho gishaara Yesuusa beyey esa iissho.

⁴Yesuusani yeyna garicho gisha Zakoosey esa beyese axiti buro woxxhi gardi bidzi mixi malla gara e kesso.

⁵Yesuusani ye mixi oomo be ello geede wokke afaa beedi <<Zakoose! Hanzo ne zawako feyshe taa e worguse, ukke ukkeydi hodhuwa>> hidi e hido.

⁶Zakooseni alleydi hoddhi Yesuusa maggana be zawa e motto.

⁷Zakoosey mottosa axiti be uddina beedi <<Yesuusay cubbachitaara wolkoko feyshiya e gello>> hidi sekke hanke umbu umbu uydo.

⁸Zakooseni eedhi <<Laaxo, ta keenge woduntiyafa uddi e bade jhi'itusuko ta inge, bishuwa ogena axi garafa ta ettecho miijhe ooneseni oyddi dakkenako ta mahe>> hidi e hido.

⁹Yesuusani <<Ha axini assi Abrahaame yele e maaqe gisha hanzo ha zawa axita Wontoy loollusiko e yese.

¹⁰Tani axi yeley esume yoodosi baadechashe worgesaara degessi lubbo maaresaarako>> yeydi e hido.

¹¹Axiti e zeeresa siya u yesune Yesuusay Yerusaleeme yoodi e uddhecho gisha axiti Wonto kaatetoy yenniyawo addeynesa uso e bishecho gisha hatteni zeerisine bidzi mamako ususe e mamatto.

¹²Mamakisine <<Bidzi afana maagay e yecha. Kaate maaddhi yoowese zara wude hamese e dendo.

¹³Be hangeesume buro be maalitaafa tammi gerita beeko xheydi u bidzi bidzise laga kuma kumaysi[10] birre ingisine <Hanke ta yooworo makko ha esuna hantuwayte> hidi e hido.

¹⁴Hine ye e wude axiti esa be inxha'icho gisha <Nu gara e kaatorosa nuni worguwanxhiko> yeydi hissine woosso e geede u anso.

¹⁵Ye adeni kaatti hanke e yoodo. Be yoodo geede be indecho miijhe hanti aya u ellussosa erese be maalita e xheygusso.

¹⁶Buronasi uddhi <Laaxo, ne indechosha hanti tammi dakke e gara kossiko ta gaddese> yeydi hido.

¹⁷Kaatini <Hasshu, neni modhe ta maalako! Oddhe basuse muxhuraxe maaddhi ne bento gisha neni tammi katama gara afana maaga maaquwa!> hidi e hido.

¹⁸Lakkunxo e hantaxi uddhi <Laaxo, ne indo miijhena hanti ichichi dakkeko ta kossese> hidi e hido.

¹⁹Kaati ye esani <Nembani assi ichichi katama gara maagessiko ta yese> hidi e hido.

²⁰Feday assi yoodi <Laaxo, ne indecho miijhe hii'e, ekkuwa! Hay carqanako tutti ta gaddecha.

²¹Neni neese maaquwasa ne gaddo baasa ekkesa, ne ayllo baa godofa bhikkilesa danda'uttuwa camo ne maaqesa erdi ta jhassho gishako ta gaddecha> yeydi e hido.

²²Kaatini <Neni iita maalako! Ne zeerenako ne gara ta yaa'e. Tani taase maaquwasa ta gaddo baasa ekkesaara ta ayllo baa godofa bhikkilese danda'uttuwa iita ta maaqesaara erdako

²³tani yoodi e yelowara eforonike hinne abasuwa miijhena hanteesituko inge ne dheeddo?> yeydi e hido.

²⁴Yaha yecha axita <Ha miijhe e garafa etti tammi dakke oodasuse inguwayte> yeydi e hido.

²⁵Usini <Laaxo, esimay hay tammuko e keenge> yeydi u hido.

²⁶Esini <Hinuse ohoko ta ohe, keengesuse ooneseni kosuttoko e kosutte, keenguwasi garafa fetto ye e keengichoniyoko efuttesa.

²⁷Ye u gara ta kaatuwannike inxhadha ta iilaxita ye uso hana oodi ta buro wodhuwayte!> yeydiko e hido>> hidi Yesuusay e mamatto.

²⁸Ye esa be zeerdo geede Yerusaleeme be erusichoshiti buro buroydi gardi e hangicha.

²⁹Yesuusay Zayte Bakka da'aa yese Beetefaagiyakaara Biitaniyakaara be uddho geede be erusichoshitaafa lam'e buro e anso.

³⁰Esini anxisine <<Hi buro yese katamaa hanguwayte! Yahani hi ello geede bhanqutti e hine axi e gara utti eruwa harre darmeko hi degexe. Ye esani birshi hana oowayte.

³¹Axi ooneni <Ame hi birche?> hidi u oyco'ayko <Laaxuse e worgussinneko> hidi hiwwayte>> yeydi e hido.

³²Woosutta geriti handi hade Yesuusay otonikewo u degesso.

³³Harre darme u birchushune ye harriyaditi <<Ame hi birche?>> hidi u oycco.

³⁴Usini <<Laaxuse e worgussinneko>> hidi uydo.

³⁵Ye harre darmeni Yesuusako u oodo. Be maa'o e zahiya olli Yesuusay e gara uttorosa u mato.

³⁶E hangusune axiti be maa'o ogiya u ollicha.

³⁷Zayte Bakka sule handi e uddhoniyaka esaara hangicha axiti uddina iitanawo maggisine buro be beedecho micushe hanta gisha uddi be kato keddaysi Wonto galate u ayto.

³⁸Usini <<Laaxi sunxuna yoone kaati suuzuttesesako! Modhetey afaaka maaquwaye, kuxay Wontose wona afaaka maaquwaye!>> yeydi u uwwicha.

³⁹Axiti gidda yecha Farasaxitaafa bidzi bidziti <<Laaxo, ha neera hangeesiti uwwesa mikki hisuwa!>> hidi u hido.

⁴⁰Esini <<Hinuse ohoko ta ohe, usi mikku hinesa maaddhakoni shuchitako uwwesa>> yeydi e hido.

⁴¹Yesuusay yoodi uqisine Yerusaleeme be beedo wogga ye katama gisha yeekisine

⁴²<<Fetto hanzo ne modhetese worguse abako ne erdesakoma modheko e maaqaane! Ye modhetemay hatte ne burowafa aachuntiko yese.

⁴³Ne iilaxiti ne googe be deeme deendi uddi badena nemba gooddi u tuce woggay ne gara yootako e yoone.

⁴⁴Wontoy nemba beedi loolusese yoone wogga ere ne dheeddo gisha neera ne giddaaka yese ne nayshaara sahaaka olliko u bayse, bidzi shuchini woddo badi be godowa attuwasso>> yeydi e hido.

⁴⁵Yesuusay Wonto Hayla Zawa qeyshi giddaa gelli essa zal'iya yechashitani gooddi kesse e gello.

⁴⁶Esini << <Ta zaway Wonto shi'e zawako e maaqe> yeydiko e diizuttese hinunimay kaysiti googgoko hi mato>> yeydi e hido.

⁴⁷Yesuusay wontana wontana Wonto Hayla Zawa qeyshi giddaa e erusicha. Kahinituse afana maagitini Muse woga eruseesitaara axita durkicha afanasitaaray esa wodhese wordine

⁴⁸axiti be uddina esusewo siyese aafe e gara gaddecho gisha e gara be hantesa u dheeddo.