Read koorete Luqaase 2 Bible Online

Luqaase 2 - koorete bible

Luqaase 2

¹Yenniyaka Rooma kaate[2] maaqe Awgusxhoosey be kaateto aallo yese axe e uddina taafese u sunxi diizuttoronike woosso e anso.

²Axi taafuttorosuse ye esi buronako e maaqicha. Yenniyaka Sooriya wude ahichashi Qorenewoseko e maaqicha.

³Hinne axi be bidzi bidzina be geri essaafa yoodo wudiya be sunxe diizusiya u hangicha.

⁴Yoosefeni Dawite fira fiixha be maaqicho gisha Galila wudiya yese Nazrate katamaafa beese aykutti gawwaara yecha Maaramiyara wolko be sunxe diizusiya Yuuda wudiya yese Dawite katamaa Beeteleeme u hando.

⁵

⁶Usini be lam'una Beeteleeme katamaa yesune i yele woggay ello.

⁷Angussi yeleni i yello. Yele ayke maa'ona fasshi i ayto. Borsay essa aqicho zawaa godo be dheeddo gisha moonaaka keemoy essa muucho zellowaa i woyso.

⁸Ye wudiya gubbaa dorita kakkisine aqicha yeemaxiti u yecha.

⁹Bidzi Wonto woosaxi masso badi u yesune usuko yoodine Wonto kuxa fuulay u googe laci lacidi faddho. Iitana u jhassho.

¹⁰Ye Wonto woosaxini <<Aadekoydi jhasshofita! Axuse uddi magga odo maaqesako etti hinuse ta yoodese.

¹¹Loolusesako hinuse hanzo Dawite katamaa yelutti yesa. Ye esini Laaxe maaqe Mesiheko.

¹²Esuna hi eresini yele ayke maa'ona fasshi aykutti moonaaka keemoy essa muucho zellowaaka e woy'usuneko hi degexe>> hidi e hido.

¹³U masso baanne Wonto woosaxiti lagay Wonto woosaxaara wolko u bento.

¹⁴<<Kuxay Wontose wona afaaka maaquwaye! Modheteni axuse sahaaka maaquwaye Wontoy eeheesuse>> yeydi u hicha.

¹⁵Wonto woosaxitini dhaddi afaa kesso geede dorita yeengichashiti sekke hanke <<Yoowayte, yoonase Beeteleeme aallo nu hammeese, hatte maaddhasaara Wontoy nuuse adduso abakuwara handi nu beyyeese>> hidi uydo.

¹⁶Ukkenawo handi Maaramiyara Yoosefiyara u degesso. Xhaheni keemoy essa muucho zellaaka woy'iya e yesune u beedo.

¹⁷Beedini Wonto woosaxi ye xhahe gisha ususe otechosha zeere u gello.

¹⁸Siidaasiti uddina u zeerdo zeerena u micco.

¹⁹Maaramey haanxhi zeere uddi be muxhurowa gaddi gaxhiya i yecha.

²⁰Dorita yeengichashiti uddi Wonto woosaxi otonike be beedosunaara be siidosunaara uddi Wonto kedda keddaysisiniyara galatisiniyara dhaddi be godowa u maaddho.

²¹Ye xhahey be yelutto hazzunxo wonte gada e utto. Haga e xhiiqusutto baane Wonto woosaxi otechonike ye wonte e sunxe <<Yesuusa>> hidi u sunso.

²²Muse wogaaka <<Burona yelutte na'i yeley uddina Wontose hayla maaqeko e worguse>> yeydi hinesi diizutti e yecho gisha e geejhe agunnay elline yele Wonto wogana ohuttisine <<Kaashashe lam'i woyya booltiyo maako lam'i woyya yele maako uqusuwayte>> yeydi hinesi yecho gisha Wonto buro uqusese yele etti Yerusaleeme u hando.

²³

²⁴

²⁵Bidzi adey Simoone sungesi yenniya Yerusaleeme e yecha. Esini be yeso Wontose aassi indese gizo axe maaqisine Isra'eeley loolesa gobbena kakke Ayaana Geeshi e gara yese axe e maaqicha.

²⁶Esuseni Ayaana Geeshi Wontokofa anxutte Mesihe beedo badi e hay'uwannike e otecha.

²⁷Ye wonteni Ayaana Geeshi densine Wonto Hayla Zawaa e hando. Maaramiyara Yoosefiyaray Yesuusa etti Wonto Hayla Zawa Muse wogay ohesa alseeme hissine yenniya u yoodo.

²⁸Simooneni yele udundi Wonto galatisine

²⁹<<Laaxo, taako ne otecho katoy aallosso. Ne loolusesa ta aafena beediko ta yese. Ha e gisha ta hooddesi baasso, yoonase taa ne maala xheyguwa.

³⁰

³¹Ne loolusesa ha saha gara yese axi uddi beyoronike ne naddhesesako.

³²Esini Ayhuda maaquwasituse aade adduse fo'eko e maaqe. Ne axiti Isra'eeleseni kuxako>> yeydi e hido.

³³Maarameni Yoosefeni xhahe gisha e zeerdo zeerena u micco.

³⁴Simooney uso be suuzzo geede Maaramekoni <<Ha xhahe Wontoy ansosi laga Isra'eelaxituse loolose lagase baysoseydiko e maaqe. Esini lagiti inxha'e yeragoko e maaqe.

³⁵Ye esuna laga axiti muxhurowa aachuttecha maxo tiddhiya e kese. Neeseni higilsanako ne zahey bure[3]>> yeydi e hido.

³⁶Yenniyani bidzi Haanna sunge indo kaayaxhi i yecha. I ommay Aasere maaqusune Faanu'eele busho i maaqicha. Orjena i cindecha. Be adiyara laappi bera i utto geede i adey baado.

³⁷Ye e geede i beray hatte hazzuppi tamma oydde maaddho aallo Wonto Hayla Zawafa arto badi xhoomenaara Wonto shi'enaara wonta qama Wonto kuxiya i yecha.

³⁸Isini yenniyawo yoodi Wonto galate i gello. Ye yele xhahe gisha Yerusaleemey maaketowafa kesesa gobbena kakkeesituse uddi odusiya i yecha.

³⁹Usini Wontoy Musese indo wogay otechosha uddina be also geede sekke Galila wudiya yese be Nazrate katamaa u maaddho.

⁴⁰Ye yeleni orjena era keengesa maaddhi diciyara boheyyaara e gello. Wonto aafeni e gara yecha.

⁴¹Maaramiyara Yoosefiyaray uddi bera aallo Garo Massalase Yerusaleemiyaka u hangicha.

⁴²Yesuusa beray tamma lam'e maaqusune hade be lossoke garo massala kuxese u hando.

⁴³Massalay gardo geede Maaramiyara Yoosefiyaray be zawa dhaddi maaqusune Yesuusay Yerusaleeme atto. Usini yena e attosa erdo badi

⁴⁴ogaxaara yoonesa e bisshinne bidzi wonte oge hangisine u feyssho. Ye e geede be laggiti feeqaakaara iginiti gawwakaara worge u ayto.

⁴⁵Ye ganda be dheeddo geede worgisine sekke Yerusaleeme u maaddho.

⁴⁶Haysso wonte geede Wonto Hayla Zawaaka u degesso. Yesuusani erusicha eraxiti feeqa utti u zeere haysi siidi oyche ususe e uqusicha.

⁴⁷Siineesiti be uddina e gaxusaara sekke e mahicho uttanaara u micicha.

⁴⁸Adiyara indowaray esa beedi u micco. Yenniyaka esindoy <<Ta yelle, ame yeysi numba ne hisso? Taara niyadiyaray nemba worgisine orjeko nu maddhundo>> hidi i hido.

⁴⁹Yesuusani <<Ame tamba worgese hi dandadho? Nuwade zawaa yese tamba e worgusenike waani ere hi dheeddo?>> hidi e hido.

⁵⁰Ususe ye e zeerdo zeerey gele e dheeddo.

⁵¹Ye e geede Yesuusay usaara Nazrate katamaa dhaddi e hando. Ususeni e woosutticha. Esindoni haanxhi zeere uddina be muxhurowa i gadicha.

⁵²Yesuusani axi buroni maaqqe Wonto buro eehuttisine eraara achowara be gara kosisine e dicco.