Read koorete Luqaase 20 Bible Online

Luqaase 20 - koorete bible

Luqaase 20

¹Bidzi wonte Yesuusay Wonto Hayla Zawa qeyshi giddaa axita erusiya modhe odo ohiya e yecha. Kahinituse afana maagiti, Muse woga eruseesiti, gate cimitaaraydi esuko yoodi

²<<Ha zeerita ne hantesi an adetonana? Ooni neese ha adeto inda? Mee, nuuse ohuwa>> hidi u oycco.

³Esini <<Hinne tanini bidzi oychuko hinumba ta oyce. Mee, hinuni taase mahuwayte.

⁴Yohanisey Wontokofa dendiya e xhamaqichani axukofani?>> yeydi e oycco.

⁵Usini wolko sekke hanke zeere u ayto. << <Wontokofako> hidi nu hitta'ayko <Hine ame <<Aadeko>> hidi esa efe hi dheeddo?> hidiko e hine.

⁶<Axukofako> hidi nu hitta'ayko axi be uddina <Yohanisey kaayaxuko> hidi be hine gisha shuchunawoko numba icci u wodhe>> yeydi u hido.

⁷Ye e gisha <<E xhinqatey ayafa maaqesa nuni eruwanxhiko>> hidi u mato.

⁸Yesuusani <<Hinne an adetona haanxho ta hantesa hinuse ohuwasso>> hidi e hido.

⁹Ye e geedeni Yesuusay axituse bidzi mamako e mamatto. <<Bidzi adey be gatiya weyne zuuse e tottecha. Miijhe efese hanteesituse u hantorosa indi fede wude dhaddi handi laga bera aallo yaha e shaacco.

¹⁰Ye weyney kaxxho geede e kaxhaafa u anxorosa bidzi be maala hantaxituko e anso. Usini esa durdi bidzi abakoni keenguwasa kuche mela hanke u anso.

¹¹Sekkeni assiwo fede be maala e anso. Ye esani yeysiwo durdi eersi kuche mela u gooddo.

¹²Assiwo haysso e anso. Ye esani zaydi are kessi u datto.

¹³Ye weyniyadeni <Waani ta hiye? Ha ta eehicho ta yelewoko ta anxo, haliyaka ha ta yele jhashoko u jhashe> yeydi e hido.

¹⁴Ye hantaxitini ye yele beedi sekke hanke wolko zeerisine <Ha esimay e dhaalaxuko, yoowayte, woddhine e haydho geede ha godoy niisuko e maaqe> hidi wolla u kundo.

¹⁵Hinne ye yele ye weyne godome are kessi u woddho. Hinne ye weyne tottecha adey ususe am e hante?

¹⁶E hantesi beesewo yoodiko ye hantaxitani woddhi ye weyneni fede hantaxituse e inge>> yeydi e hido. Yaha yecha axitini ye esa be siido wogga <<Ha e bishay zaruwaye!>> hidi uydo.

¹⁷Yesuusani usuko beedi << <Shuchuna keexhichashiti haassi dattecho shuchi hade boorey keexe aykenike zawa ayke shuche e maaddho> hidi diizuttechashi am e beyse?

¹⁸Ooneni ha shuchi gara ungesi medhiko e gukke, ye shuchi e gara unge axi fettonawoko naxhutti e baane>> yeydi e hido.

¹⁹Muse woga eruseesitaara kahinituse afana maagitaaray Yesuusay zeerdo mamakoy be gara e maaqesa erdi yenniyaka esa aykese wordechine axita jhasshi u dhaddo.

²⁰Yesuusa aykeseni e bishe wogga u kakkicha. Ye wude ahe adey be adetona e gara e yaa'orosa wordi gizo axita bisshi e zeerena esa qaxhese danda'e wocheshita u anso.

²¹Usini Yesuusako handi <<Laaxo, ne zeeresaara ne erusesaaray aade maaqenike erako nu ere. Axi aafusha beedo badiwoko fetto Wonto ogeni aadenawo ne eruse.

²²Nu wogay Rooma kaatuse[11] gaalo nu gaalorosa tuca e tuceni tucuwannikeni e hido?>> hidi u oycco.

²³Yesuusani u fayankete erdi

²⁴<<Mee, miijhiyafa bidzo oodi taa beysuwayte>> hidi e hido. U oonne <<Hinne ha miijhe gara yese bishaara diizuttese sunxaaray oonesuna?>> hidi e oycco. Usini <<Rooma kaatuko>> hidi uydo.

²⁵Yesuusani <<Rooma kaatuse maaqesa Rooma kaatuse, Wontose maaqesani Wontose inguwayte!>> hidi e hido.

²⁶Usini axiti buro zeerena esa qaxhese danda'e u dheeddo. Ususe e mato utta gisha micci mikku uydo.

²⁷Sodoqaxiti <<Haydhasiti denduwasso>> hidi u hicha. Usaafani bidzi bidziti Yesuusako yoodi

²⁸<<Laaxo, Musey nuuse diizisine <Bidzi axi macho ettechine yello badi baatta'ayko ye baadasindo na'i ye e macho dhaalli esuse yele yelli e dhaalaxe mahuwaye> hidiko e hidecha.

²⁹Hinne bidzi indo na'axhey laappi u yecha. Usaafa angussi macho ettechine yello badi yesine e baado.

³⁰Lakkoni hayssoni yeydiwo se esi dhaala baatta, ha esi dhaala baatta hissine be laappuna uddi yello badi u aallo.

³¹

³²Aallicira isini baado.

³³Ye laappi be uddinawo iso ettecho gisha haydhasiti dende wonte aasi machona i maaqe?>> yeydi u oycco.

³⁴Yesuusani ususe mahisine <<Ha sahaaka yese axiti u ekke u geleydiko.

³⁵Yoone kille sahaaka yesese haybo denxoy ususe bishesheeshiti efuttuwasso geluttuwaso.

³⁶Hade Wonto woosaxituke u maaqe gisha hay'uttuwasso, haybowafa be dende gisha usi Wonto nayshitako.

³⁷Axiti haybowafa dendesa Musey tamay essa eexhicho dhushashe be diizzo mamakuwa beysiko e yese. Yahani Musey Laaxeni <Abrahaame Wonto, Yissaaqe Wonto, Yayqoobe Wonto> hissine xheydiko e yese.

³⁸Wontose uddi axi yesona yesine u bente gisha Wontoy en'a yeseesituse Wontoko baaka haydhasituse Wonto maaquwasso>> hidi e hido.

³⁹Muse woga eruseesitaafa bidzi bidzi axiti <<Laaxo, modheko ne zeerdo>> hidi uydo.

⁴⁰Sekke ye e geede Yesuusa oyceshe naassay bidzini baasso.

⁴¹Ye e geede Yesuusay <<Waakidini Mesihey <Dawite yeleko> hidi e hiyutte?

⁴²Be diizzo Zingale Fissharowa <Wontoy ta Laaxuse <<Ne iilaxita iisshi ne toke e gara ne gadesa ta mahoro aallo ta oshishaa uttuwa!>> hidiko Dawitey hido> yeydiko Dawitey hido.

⁴³

⁴⁴Yebo, Dawitey Mesihe <Ta Laaxo> hidi e xheydo geede hine Mesihey waydini Dawitese e yele maaqe?>> yeydi e oycco.

⁴⁵Axiti be uddina siisune Yesuusay be erusichoshita

⁴⁶<<Muse woga eruseesiti garafa hinumba kakkuwayte! Usini e woomay keddaydese galala maa'o maadhi seyna hayna hanteko u eehe, gadhesaaka kuxa sawo wordi Bhikkilo Zawaani hayyaxhey utticho godowa uttesuko u worge, massalaaka kuxa godowoko u eehe,

⁴⁷u adey baadese indowaxhiti zawa u bonqe. Ye esa fasheme hissine galalsi u shi'e. Ha e gisha gardese yaa'ako u gara yaa'uttesa>> yeydi e hido.