Read koorete Luqaase 21 Bible Online

Luqaase 21 - koorete bible

Luqaase 21

¹Yesuusay be googe beechine wodumiti be ingo oodi miijhey essa dafutticho saaxhiniya ollusune e beedo.

²Bidzi i adey baadese indo jhi'oy lam'i saante ellesa lam'i laakaafa hantuttese miijhe oodi i ollusune e beedo.

³Yesuusani <<Aadewoko hinuse ta ohe, ha i adey baadese jhi'o indoy ha saaxhiniya miijhe olliya yese uddiyademe garsiko i indo.

⁴Ha esini fedeesiti uddina u indosi be keengicho woduntiyafako. Isimay jhi'o maaqisine beese shato badi be keengichosha uddiko i indo>> yeydi e hido.

⁵Bidzi bidzi axiti <<Ha Wonto Hayla Zaway waydi e moddhesi, aafese moddhese shuchunaara Wontose indo ingonaarako moddhi e keexhutto>> hidi zeeriya u yesune

⁶Yesuusani <<Ha hi beene shuchi shuchi gara bidzini yaha attuwasso. Be uddina e wodde woggako yesa>> yeydi e hido.

⁷Usini <<Laaxo, hinne aydewa e maaqe? Ha esi maaqese hisune esuna nu ere yeragoy amuna?>> hidi u oycco.

⁸Yesuusani <<Haluxuttekofa hinumba naddhi kakkuwayte! Lagiti <Tambako Kristosay, hay woggay uddhosso> hidi hissine ta sunxuna yootako u yoone, usaara handofita.

⁹Toora gishaara koysi gishaara hi siineniya du'eydofita! Ha esi burona maaqese fettona attuwasso. Maaqe baaka aalliciray ukke maaquwasso>> hidi e hido.

¹⁰Sekke assi Yesuusay <<Bidzi wude axiti fede wude axiti gara dende, bidzi wude kaatini yeydiwo fede wude kaati gara dende.

¹¹Iitana ha sahay e en'e, seya haya naayeni laga axe alse hargeni e maaqe. Afa gara jhashushe abakitaara micushe yeragowaray e bente.

¹²Haanxhi uddi maaqeesume e buro axiti hinumba u ayke, hi gara u cange, yaa'ase Bhikkilo Zawaakaara tufe zawaakaara garsi u inge. Taameydi hissine kaataxhe buruwakaara aheesiti buruwakaara u aange.

¹³Ta gisha hi odusoronike ogey ye esa e maaqe.

¹⁴Ha e gisha <Ta qino kessese am ta oho?> yeydi hissine hi hoodduwannike burussi hi muxhurowaka gaduwayte.

¹⁵Ye esini hi iilaxi uddi hinumba iicheshaara hinunaara bersesaara u danda'uwa zeeriyara eraarako hinuse ta inge.

¹⁶Hinumba fetto yella geritini hinindo na'axhitini, hi iginitini, esaara hi feyshichoshitini, hinumba aassiwoko u inge. Hinukaafa bidzo bidzoni u wodhe.

¹⁷Ta gisha axi uddina hinumba iitana u inxha'e.

¹⁸Yeydi e maaddhakoni hi qino ufussaafa bidzini bayese danda'uwasso.

¹⁹Danda'ona ee'enako hi lubbo hi maare>> yeydi e hido.

²⁰Sekkeni Yesuusay <<Yerusaleeme iilaxiti gooddi yesune hi beeneniyaka ye katamay bayese e uddhosa eruwayte.

²¹Ye woggaaka Yuuda wudiya yeseesiti bakkitaa ba'uttuwaye, katamaaka yeseesitini dhaddi kesuttuwaye! Wude yeseesitini hanke katamaa geluttoppe.

²²Yerusaleeme gisha diizuttese kaayoy uddina ittoronike ye woggay keddaydese gano kese woggako.

²³Ye woggaaka gawwaara yese indowaxhaara yele dhamusiya yese indowaxhaara uso baduffu! Ha saha gara iita maddhako yoonesa, Wonto huulay ha axiti garako e maaqe.

²⁴Usaafani satatana aale, feditani Ayhuda maaquwasiti seya haya be wudiya wudiya didhi etti u hange. Di'utti u hando beriti aaloro makko Ayhuda maaquwasiti Yerusaleeme be wordonkeysi u jheeche>> yeydi e hido.

²⁵Sekkeni Yesuusay <<Qoossi gara agunna gara xhoolinte gara du'use yeragiti u bente. Ha saha garani be wude wude yese axiti uddina bagade oosshaara jhiraho katowara siidi du'eydi u maddhunge.

²⁶Afaa yeseesiti osay en'e gisha axiti ha saha gara yooneesita kafe jhasshi du'eyena u mele.

²⁷Ye e geede tani axi yeley osanaara keddaydese kuxa fuulanaara dhumaanna ta yoosune u beene.

²⁸Haanxhi haga maaqe e aykusune hi wozutte woggay yoodi uddho gisha miindi eedhi wokke keddaydi beewayte>> yeydi e hido.

²⁹Sekkeni Yesuusay ususe zeerisine <<Belese sunge mixaara fede mixitaara uddi gaxxhi beewayte.

³⁰E washey haga wokke cultusune hi beedo geede bargoy yoodi uddhosako hi ere.

³¹Ye esuke haanxhi uddi maaqusune hi beeneniyaka Wonto kaatetoy yoowese uddhesenike eruwayte.

³²Aadewoko hinuse ta ohe. Ha yeluttey gareesume buro haanxhi uddiko e aale.

³³Afani sahani baattako u baane, ta katomay miindi koolo makkinako e yese>> yeydi e hido.

³⁴Sekkeni Yesuusay <<Hinuni gawwetenaara usshi goojhenaara hinuse hi yesose maddhumenaara hi maxo hi budeeme hinumba naddhi kakkuwayte. Ha esini yeydi maaqe e dheeba'ayko ye wontay dedhawoko hade harbhake e unge.

³⁵Ye wontani ha saha gara uddi yese axuse atto badiko e yoone.

³⁶Yebo, ha yoowese hine haanxhikofa dhaddi tulxhi taa axi yele buro ee'ese osa hi degexoronike Wonto shi'isine uddi wogga oseydi hinumba kakkuwayte>> yeydi e hido.

³⁷Yesuusay wontana wontana Wonto Hayla Zawaa e erusicha. Qama qama katamaafa kessi Zayte Bakka gara e aqicha.

³⁸Axiti be uddina e ohesa siyese ketiya sho'e dendi esuko Wonto Hayla Zawaa u hangicha.