Read koorete Luqaase 22 Bible Online

Luqaase 22 - koorete bible

Luqaase 22

¹Garo Massala burona kuxutticha Helto Boora Massalay uddho.

²Kahinituse afana maagitaara Muse woga eruseesitaaray Yesuusa aykese axita be jhassho gisha ijhaanna waysi esa be bayse oge u worgicha.

³Yenniyaka Yesuusay erusichoshitaafa bidzo maaqicha Asqorotaxi Yuudaaka xhoozi kaati Humbayey gello.

⁴Esini Wonto Hayla Zawa kahinituse afana maagitukowara Wonto Hayla Zawa kakkeesituse afana maagitukowara Yesuusa waanisi be ayxenike handi usaara e kundo.

⁵Usini maddo, e aykusoro gisha miijhe esuse ingese esaara u kundo.

⁶Yuudani <<Eehako ta eehe, modheko>> hidi e hido. Esini axiti badesune garsi ingese bishe wogga e worgicha.

⁷Ye e geede Garo Massalase dore u shukke Helto Boora Massalay elline

⁸Yesuusay Phexhrosiyara Yohanisiyara <<Garo Massala qamete ni miyorosa handi naquwayte!>> hidi hissine e anso.

⁹Usini <<Hinne ayaw nu naqorosani ne worge?>> hidi u oycco.

¹⁰Esini <<Katamaaka handi hi gelusune waaxe otana idde adeko hi beene. Esaara wolko e hange zawa hanguwayte.

¹¹Ye hi hange zawaadeni <Laaxi <<Ta eruseesitaara wolko Garo Massala qamete essa nu miyoro borsa zaway ayn yese?>> hidiko e hine> hidi oycuwayte.

¹²Esini shuchi zawase e qinowa yese fede zawa aakoko essaa worguse abakoy kundesesa e beyse. Yaha naquwayte>> yeydi e hido.

¹³Usini handi hade Yesuusay otonikewo u degesso. Yahani ye massala miyese u naddho.

¹⁴Yesuusani qamete miyo woggay elline anxuttaasitaara wolko tato gara e utto.

¹⁵Ususeni <<Maddhay ta gara elleesume buro ha Garo Massala qamete hinunaara wolko miyese orjeko ta col'icha.

¹⁶Hinuse ohoko ta ohe. Wonto kaatetowaka ha qamete miyo birchey addeydi bentoro makko ha e geede sekke hinunaara wolko qamete muuwasso>> yeydi e hido.

¹⁷Ye e geede Yesuusay essa ushushoosha densi Wonto e galatto. Ususeni <<Hii'eyte, ha esa shati woluse ellusuwayte.

¹⁸Hinuse ohoko ta ohe, hattiyafa ayti Wonto kaatetoy yooworo makko ha weyne daana sekke ushuwassho>> yeydi e hido.

¹⁹Sekkeni boora densi Wonto galatti meyssi ususe indi <<Hinume hissine ta inge ta garay[12] ha esako. Tamba maxese ha esa mahuwayte!>> hidi e hido.

²⁰Yeydiwo qamete u muudo geede essa ushusho miijhe densi <<Ha usshi hinume hissine gukke ta suuxuna eedha kille caaqoko.

²¹Hay tamba garsi ingesi kuchiyara wolko tatowaka anxiyako nu yese.

²²Wontoy <Ha esi e gara maaquwaye!> hidi e hidosi taa axi yele gara maaqoko e maaqe. Maaqe baa taa aassi inge ye axe baduffu!>> yeydi e hido.

²³Usini <<Niya aassi inge axi oonena nuuka?>> hidi sekke hanke wola oyce u gello.

²⁴E erusichoshiti giddaa <<Ooni nuuka garesa?>> hidi bersay dendo.

²⁵Yesuusani ususe <<Ha saha gara yese kaataxhey be axita osanako u ahe. Yeysi aheesita axiti <Modhe hantaxitako> hidiko uyne.

²⁶Hinunimay hade usuke maaqe worgusuwasso. Fetto hi giddaa angusse maaqesi hade barsuke maaquwaye. Hinumba durkesa maaqesi hade oomona maraxuke maaquwaye.

²⁷Tato gara utti muuneesumiyara eedhi muusseesumiyara a'esana angussi? Angusse maaqesi tato gara uttesa maaquwaye? Tanimay hi gidda hade maraxuke yesesako.

²⁸Hinuni ta maddha aallo taara wolko miindi eedhiko hi yese.

²⁹Ta kaatetowaaka tatowa uttiko hi muune hi ushe, tamma lam'i Isra'eele ommiti gara kaate maaddhi hi yaa'orosa nuwadey taase indonikeko tanini hinuse kaatete ta inge>> hidi e hido.

³⁰

³¹Yesuusani <<Simoone! Simoone! Humbayey nemba hade gossa fuungusonike fuundi naadhi beyesuko e worge.

³²Tani yenniyaka ne aadexoy baaneesume ne gisha Wonto shidhiko ta yese. Neni higilli hanke taako ne maaddho geede neyndo na'axhe minxuwa!>> hidi e hido.

³³Phexhroseni <<Ta Laaxo, nemba tufe zawa aangusoniya neera tufuttese, nemba wodhese aangusoniya neera hay'ese naquttiko ta yese>> hidi e hido.

³⁴Yesuusani <<Phexhrose, neesuko ta ohe, ha qamaaka lukkoy ollo baaneko <Tani esa eruwasso> hidi haydzi wogga ne zaade>> hidi e hido.

³⁵Ye e geede Yesuusay be erusichoshita <<Miijhe esa hi gadesani maaqe sigire kobhani hi etto baane ta ansoniyaka hinuse faca abakoy yesa e yecha?>> hidi e oycco. Usini <<Facay bidzini badiko yecha>> hidi u mato.

³⁶Esini <<Hattema miijhe essa hi gadesani maaqe sigire keengesi be kuchiya aykuwaye. Satata keenguwasi be maa'o zal'i satata woonguwaye!

³⁷Hinuse ohoko ta ohe, zage ohuttecha ha kaayo katoy <Birraxitaarako e taafutte> yeydi hiyuttechashi ta gara hatte aaleko e worguse. Aadewoko, buro ta gisha diizuttecha kaayoy fetto aalako e aale>> yeydi e hido.

³⁸Usini <<Laaxo, hay lam'i satatako yesa>> hidi uydo. Esini <<Ye esi ellako elle>> hidi e hido.

³⁹Yesuusani katamaafa kessi zage be lossoke Zayte Bakka gara e hando. E erusichoshitini esaara hando.

⁴⁰Yaha be ello geede Yesuusay <<Hi aadexowafa olle naa'oy hinumba elluwannike Wonto shi'uwayte!>> hidi e hido.

⁴¹Usukofa zardi shuchi dafutti elle makko e hando. Yahani bocunti

⁴²<<Nuwadde, ne maxo e maaqo'ayko ha ta gara elle maddha usshi taakofa zaruwaye! Ne maxo maaquwaye baaka ta maxo maaddhoppe>> yeydi Wonto e shidho.

⁴³Yenniyaka afaafa Wonto woosaxi esa minxese yoodi e bento.

⁴⁴Esini iitanawo hooddi maddhundi Wonto oseydi e shi'icha. E boyney hade sahaa xhokke suuxuke e xhokkicha.

⁴⁵Wonto shi'ichine dendi be erusichoshituko yoodi usini orjena be higillosafa densi be gatto gisha gehunsa u yesune e beedo.

⁴⁶Esini <<Abasuwa hi gehe? Dendi hi aadexowafa olle naa'oy hinumba elluwannike Wonto shi'uwayte>> hidi e hido.

⁴⁷Yeydi haga e zeerusune laga axiti u yoodo. Tamma lam'ukaafa bidzo maaqicha Yuuday uso durti etti yoodi Yesuusa muuxhese esuko e uddho.

⁴⁸Yesuusay <<Yuuda! Taa axi yele muuxhenaa garsi ne inge?>> hidi e hido.

⁴⁹Esaara yechashitini abase u yoodosa erdi <<Laaxo, u gara dendi satatana nu bursoose>> hidi uydo.

⁵⁰Usaafa bidzi kahinituse afana ade maala gara dendi e oshichi bade washe e burso.

⁵¹Yesuusani <<Dhagguwayte! Yeysi matofita!>> hidi e hido. Esini ye ade washe dolli loolusso.

⁵²Ye e geede Yesuusay bemba aykese yooda kahinituse afana maagitusaara Wonto Hayla Zawa kakkeesituse afana maagitaara gate cimitusaara <<Tamba aykesuwa hade fuulo aykese yoone axituke satataara bikkaara etti hi yoodo?

⁵³Uddi wonte hinunaara wolko Wonto Hayla Zawa qeyshi giddaa ta yechoniya ayto badiko hi yecha. Hattema hi woggaara cencha adeto woggaarako>> hidi e hido.

⁵⁴Ye e geede axiti Yesuusa ayti etti kahinituse afana adeso u aando. Phexhrosey zara zaraydi e geede hangicha.

⁵⁵Kahinituse afana adeso qeyshi gidda tama eessi kashiya wolko u yecha. Phexhroseni yoodi usaara e utto.

⁵⁶Phexhrosey tama da'aa fo'iya uttusune bidzi maaki i beedo. E aafiya caddi beedi <<Ha axi Yesuusaara yechashuko>> hidi iido.

⁵⁷Phexhroseni <<Busshe, tani esa eruwasso>> hidi e zaaddo.

⁵⁸Oddhe e decco geede fede bidzi axi Phexhrose naddhi beedi <<Neni usaafa bidziko>> hidi e hido. Phexhroseni <<Ha axo, tani usaafa maaquwasso>> hidi e hido.

⁵⁹Bidzi saate makko e decco geede feday <<Ha axi Galilaxuko, aadewo Yesuusaara wolkoko e yecha>> hidi minsiwo be dakkuwannikewo e zeerdo.

⁶⁰Phexhroseni <<Ha axo, tani ha ne zeeresa eruwasso>> hidi e hido. Yeydi e hisune yenniyawo lukkoy ollo.

⁶¹Yenniyawo Laaxi Yesuusay Phexhrose maaddhi e beedo. Phexhroseni Yesuusay <<Qama lukkali ollo baanneko haydzi wogga tamba <Tani esa eruwasso> hidi neyne>> hidi e hidechosha e masso.

⁶²Dhaddi wude kessi suuxi aafunxe e yeetto.

⁶³Yenniyaka Yesuusa aytecha geriti Yesuusa gara qozoozzi duriya u yecha.

⁶⁴E aafusha fasshi <<Niya baddhay oonewa? Mee, kaayaxe maaqo'ayko ohuwa!>> hidi u hicha.

⁶⁵Feda laga e gara zeerisine u cashicha.

⁶⁶Sahay wonto geede gate cimiti kahinituse afana maagitaara Muse woga eruseesitaaray bidzi godo wolko u bhikkilutto. Yesuusa be bhikkilowa u uqusso.

⁶⁷Usini <<Mee, nuuse ohuwa! Neni Mesihiya?>> hidi u oycco. Esini <<Hinuko ta otako <Aadeko> hidi hiwaytako.

⁶⁸Hinumba ta oyccakoni mahuwaytako.

⁶⁹Tani axi yeley hattiyafa ayti osaxi Wonto oshishako ta utte>> hidi e hido.

⁷⁰Be uddina <<Hinne, neni Wonto yeliya?>> yeydi u oycco. Esini <<Wonto yele ta maaqenike otiko hi yese>> hidi e mato.

⁷¹Usini <<Hinne, ha e geede aba atona e worguse? Hay, nini niise e nuunaafa kessase siidiko ni yese>> hidi uydo.