Read koorete Luqaase 23 Bible Online

Luqaase 23 - koorete bible

Luqaase 23

¹Ayhuda gate aheesiti be uddina dendi Philaxhose buro Yesuusa u aando.

²Esani e gara luufe u gello. <<Ha axi nu axita haluxe oge e erususuneko nu ayto. Esini <Rooma kaatuse[13] gaalo gaallofita!> hidini e hine. Assi <Tani Mesiheko> yeydi hiyoni <Kaatuko> hidi e hicha>> hidi u hido.

³Philaxhoseni Yesuusa <<Neni Ayhuda kaatuwa?>> hidi e oycco. Yesuusani <<Hidiko ne yese>> hidi hido.

⁴Philaxhoseni kahinituse afana maagitusaara axitusaara <<Ha axi gara bidzi baysoni degesso baasso>> hidi e hido.

⁵Usini sekke e gara minsi <<Ha axi Galila wudefa densi fetto ha e aallo Yuuda wude uddi axiti gidda erusisineko e koysuxe>> hidi u hido.

⁶Philaxhoseni yeydi u hisune be siido geede uso <<Ha axi Galilaxuwa?>> hidi e oycco.

⁷Philaxhoseni Yesuusa Herodisey ahicho wudefa e maaqenike erdi Herodiseko e anso. Herodiseni yenniya Yerusaleemeko e yecha.

⁸Herodisey Yesuusa gisha siidi esa beyese laga wogga orje col'a e keengicha. Micushe abako e hantusune be aafena beyese be worgicho gisha esa beedi orjena e maddo.

⁹Hinne Herodisey Yesuusa laga oyche e oycco. Esini e utta bidzoni mahe e dheeddo.

¹⁰Kahinituse afana maagitaara Muse woga eruseesitaaray yaha eedhi iitanawo u luukicha.

¹¹Herodiseni be tooraxitaara wolko esa haassi e gara qozoozzi waare maa'o maysi sekke Philaxhoseko e anso.

¹²Herodiseni Philaxhoseni ye wontewo wola eehesa u maaddho. Buroma wola inxha'ichashuko u maaqicha.

¹³Philaxhoseni kahinituse afana maagitaara gatese afana maagitaara axitaaraysiwo bidzina e xheydo.

¹⁴<<Ha axi <Axiti giddaako koyse e denxe> hidi hissineko taako hi oodo. Tani hay hi uqusso luufona hi buro e bidzi bidzina oycci tayne e gara bidzi baysoni dheeddo.

¹⁵Yeydiwo Herodiseni bidzi baysoni e gara degexe be dheeddo geede hanke nuuko e anso. Hinuni beewayte, ha axi bemba haybose ellusesa e hantosi bidzini baasso.

¹⁶Ha e gisha esa durusiko ta dakke>> hidi e hido. [

¹⁷Philaxhosey Garo Massalaanna uddi bera aallo bidzi tufaxe e birchoronike attuwasa e maaqicha.]

¹⁸Hinne axiti be uddina <<Ha axe ooxuwa! Barbaane nuuse birchuwa!>> hidi u koysso.

¹⁹Barbaaney ye katamaaka toora e denso gishaara axi haydho gishaara tufe zawaa gellechashuko e maaqicha.

²⁰Philaxhoseni Yesuusa birshi dafese wordi sekke axituse e zeerdo

²¹Axitini <<Esa suxhuwa! Suxhuwa!>> hidi uwwiya u yecha.

²²Philaxhoseni haysso <<Ha axi fetto am e baysese? Tani e gara esa haybose elluse abako e hantesesa ta beedoy baasso. Ha e gisha esa durusiko ta dakke>> hidi e hido.

²³Usini <<Esa suxhuwa! Suxhuwa!>> hidi dhabe dheeddi inxhadhi keddaydese katona uwwiya u yecha. U uwway miindo.

²⁴Ye e gisha Philaxhosey <<Hi wordonike maaquwaye>> hidi e hido.

²⁵Ye u shidhecho Barbaane toora e denso gishaara axi haydho gishaara tufuttechashe tufe zawafa e birsho. Yesuusa u wordonikewo garsi e indo.

²⁶Ye e geede Yesuusa etti u aando. Bidzi Qarana wude axi Simoone sunge adey arefa katamaa e yoochoyne esaara muti osana ayti suxi mixe esa iddussi Yesuusa geede e hamoronike u mato.

²⁷Laga axiti e geede aadho. Iitana <<Wiy wiy>> hidi biya shatti muussine yeekisine indowaxhitini usaara hangicha.

²⁸Yesuusani usuko maaddhi beedi <<Ha Yerusaleeme indowaxhito, ame taase hi yeeke? <Menxe maaqicha indowaxhitini yello baa shubhashaara dhamutto baa dhanxitaaray abakeydi suuzutteseesitana> yeydi hiyoro wontay yoone gisha hinusaara hi nayshushaara yeekuwayte!

²⁹

³⁰Yenniyaka axiti bakkituko <Nu gara wodduwayte! Denito numba aachuwayte!> yeydiko hiye u ayke.

³¹Yebo, yeenxhi uddina mixi tima gara e maaddho geede mela mixi waani eye?>> yeydi e hido.

³²Yeydiwo Yesuusaara suxhese fede lam'i fuulita ayti etti u aando.

³³Qeraniyo sunge godo aandi be ello geede yaha Yesuusa u suxxho. Fuulitani bidzo oshishaa bidzo hadursaysi u suxxho.

³⁴Yesuusani <<Nuwadde, ha usiti hantiya be yesesa eruttuwasso, ususe <Attuwaye> hidi hiwwa!>> hidi e hido. E maa'o shati hixha u ollo.

³⁵Laga axiti eedhi u beecha. Ayhuda afana maagitini <<Fedachi e maarichoshi, hine esi Wontoy xhardese Mesihe maaqo'ayko, mee, bemba maaruwaye!>> yeydi esa u dhaaddicha.

³⁶Yeydiwo tooraxitini u dhaaddicha. Esuko uddhini dhooqo ushe oodi

³⁷<<Mee, Ayhuda kaate maako nemba maaruwa!>> yeydi u hicha.

³⁸Yesuusa qinose afana <<Ha esi Ayhuda kaatuko>> yeydi diizuttesesi e yecha.

³⁹Yesuusaara suxhutta lam'i fuulitaafa bidzi <<Neni Mesihe maaquwaye? Mee, nembani numbani ha essaafa maaruwa>> hidi e cassho.

⁴⁰Lakkoni esa gaylisine <<Fetto neni ha e bisha yaa'a giddaaka yesine Wonto jhashe eruwanuwa?

⁴¹Ninimay ni hanto iitetena yaa'a ni gara efeko nii e worguse, niisi aade yaa'ako. Ha aximay e hanto baysoy bidzini baasso>> yeydi e hido.

⁴²Ye e geedeni <<Yesuusa, ne kaatoroniya tamba bottofuna!>> hidi e hido.

⁴³Yesuusani <<Aadewoko neese ta ohe, hanzowoko taara wolko gannatiya ne bente>> hidi e hido.

⁴⁴Wontaafa izzuppi saate e maaddho. Yenniyafa ayti odduppi saate makko qoossi fo'ey fashuttine sahay kumena e ceendo.

⁴⁵Wonto Hayla Zawa giddaa hade gilbakeysi fasshichashi feedhutti lam'e e kesso.

⁴⁶Yesuusani be kato keddaysi <<Nuwadde, ta lubbo ne kuchiyako ta gade>> hidi e hido. Yeydi be hido geede kaxe e kesso.

⁴⁷Yaha yecha xhiixi gara afana maagay maaddha abako uddina beedi <<Ha axi aadewo gizo axuko e maaqicha>> hidi Wonto kedda kedda e hisso.

⁴⁸Ye esa beyese yaha bhikkiluttecha axiti uddi ye maaddha abako be beedo geede higilli be qino lam'una ayti yeekisine dhaddi be zawa u maaddho.

⁴⁹Yesuusa modhussi ericha uddi axitaara Galilaafa ayti esaara hangicha indowaxhitaaray beese zara eedhi haanxho uddi u beecha.

⁵⁰Bidzi adey Yoosefe sungesi Ayhuda katamaafa maaqe Armataxi Wonto kaatete gobbena kakke gizowara modhe axaara maaqisine Ayhuda gate aheesitaafa e maaqicha. Ayhudaxiti Yesuusa gara kundo kumiyakaara hantakaara gele e inxhadhecha.

⁵¹

⁵²Esini Philaxhoseko handi Yesuusa aha e ingorosa e shidho.

⁵³Ahani hossi talbaafa meddhuttese maa'ona e acco. Ooneni essaa moogutti eruwa godo wocci bootti naddhecho bookuttese shusshaa gelsi aha e woyso.

⁵⁴Yeysi e matosi sanbatay gelese hine ye wontey naquttuso wontako e maaqicho gishako.

⁵⁵Galilaafa Yesuusaara yoodecha indowaxhiti Yoosefiyara handi ye boossaaka ahay waa waysi woysonike u beedo.

⁵⁶Ye indowaxhitini hanke maaddhi yoodi sawwesaara tisheshaara u naddho. Muse wogay ohenike sanbata wonte kaxe etti u feyssho.