Read koorete Luqaase 24 Bible Online

Luqaase 24 - koorete bible

Luqaase 24

¹Indowaxhiti Hude wonte ketiya sho'e be naddhechosha sawwesa etti aha tisheshe u hando.

²Boossa tuccecha shuchi bidzi bade andardesune u beedo.

³Hinne ye boossaani gelli Yesuusa aha u dheeddo.

⁴Usini ahay dheeddinne <<Am etta?>> hidi sekke hanke maxiya u yesune lam'i axiti dedhawo laci laci hine maa'o maadhi u da'aa eedho.

⁵Indowaxhiti jhasshi sahaa caddi u beesune ye axiti ususe <<En'a yesesa ame haydheseesiti giddaa yoodi hi worge?

⁶Haya baasso, dhaddi dendiko e yese. Galila be yechoniya zeerisine <Tani axi yeley cubbachiti kuchiya gardi ingutti suxhutti haydhi haysso wonte dende worgusoko e worguse> hidi e zeerdechosha gaxhuwayte>> hidi u hido.

⁷

⁸Indowaxhitini Yesuusay Galila yesine zeerdechosha u gaxxho.

⁹Ye boossaafani hanke maaddhi yoodi ye esa uddi tamma bidzusaara feditusaara uddi u oto.

¹⁰Ye otaasitini Magdoolaxhi Maarame, Yohaana, Yayqoobe yella indo Maaramiyara usaara yecha fede indowaxhitaraydiko u maaqicha.

¹¹Hinne ye u zeerdosini anxuttaasituse hade goojhulti u zeerdosa e bisshine ye ohuttase <<Aadeko>> hidi hissine efe u dheeddo.

¹²Phexhroseni dendi boossaaka woxxhi handi ye boossaakani zuddi beechne acecha maa'owo e beedo. Maaddha abakona micishine zawa dhaddi e maaddho.

¹³Ye wontewo e erusichoshitaafa lam'i Emahuse hidi hisso katama u hangicha. Emahusey Yerusaleemese zaresi tamma bidzi kiilo meetirenako.

¹⁴Hangicha lam'ini ha maaddha zeere uddi wolko densi sekke hankeysi u zeericha.

¹⁵Wolla u zeerusuniyara bidzi bidzi zeere sekke hanke u arxusuniyara Yesuusay beese hanke uddhi usaara e hangicha.

¹⁶Maaqe baa esa e maaqenike u eroroome u aafey fashutti e yecha.

¹⁷Esini <<Ha oge hangisine sekke hanke arsi ha hi zeere zeerey abaw?>> hidi e oycco. Usini higilisine be baliya u eedho.

¹⁸Usaafani bidzi Qeleyophe sungesi <<Yerusaleeme borsa maaddhi yoodi yesine garda wontiti giddaa maaddha abako waani ere ne dheeddo?>> hidi e hido.

¹⁹Esini <<Am maaddha?>> hidi e oycco. Usini <<Nazrataxi Yesuusa gara maaddha zeereko nu zeericha. Esini Wonto buroni maaqqe uddi axiti buro be hantanani maaqqe be zeerena osaxi kaayaxuko e maaqicha.

²⁰Hinneko kahinituse afana maagitaara gatese afana maagitaaray <Hay'uwaye> hidi e yaa'uttoronike garsi indi u suxxho.

²¹Nunimay nu badena <Isra'eele loolusarasi esako> hidi gobbo e gara nu gaddecha. Maaqe baaka haanxhi zeerey uddi e gara elloynay hanzoy haysso wontako.

²²Assi nuura yecha bidzi bidzi indowaxhiti numba micushe odoko odusiya u yese. Kete boossa handechine

²³Yesuusa aha boossa dheeddiko hanke nuuko u yoodo. Usini <Wonto woosaxitani nu beedo. Ye woosaxitini <<Yesuusay en'ako yese>> hidi u hido> hissine nuuko u oto.

²⁴Nuukaafani bidzi bidziti ye boossaaka handi u otonike aade e maaddhesesa u beedo. Yesuusama beyutto baasso>> hidi u hido.

²⁵Yesuusani <<Hinuni gaxhuwasitaara kaayaxiti zeerdechosha uddina <Aadeko> hidi efese muxhuro keenguwasitaarako.

²⁶Mesihe gara haanxhi maddhay yoonenikiyara ye maddha geede orje kuxa fuulana kedda kedda e hinesaara maaqe worgusuwaye?>> hidi e hido.

²⁷Ye e geede Musesafaara kaayaxiti fissharowafaara uddina densi Hayla Fissharowafa uddi be gisha ohichashe ususe modhussi birshi e oto.

²⁸Essa u hangicho ganda wolko be uddho wogga Yesuusay dhaddi gardi hangusonike hido.

²⁹Usini <<Hay, sahay qandiko yese, qoossini gelesuko hine, nuura aquwa>> hidi iitana esa u shidho. Ye e gisha usaara aqese e gello.

³⁰Hinne usaara wolko qamete miyese utti boora etti Wonto galatti meyssi ususe e indo.

³¹Hagawo u aafey do'uttine Yesuusa e maaqesa u erdo. Esini u aafe burofa yenniyawo dheeddo.

³²Usini wolko zeerisine <<Ogiya niira yoosine be zeerichoniya Hayla Fissharowafa densi e ohusune ni muxhurowa laci hidi eexhiya badiya e yecha?>> hidi uydo.

³³Usini yenniyawo ye qama dendi dhaddi Yerusaleeme maaddhi u yoodo. Yahani tamma bidziyara usaara wolko yechashitaaray bhikkilutti u yesune u degesso.

³⁴Tamma bidzitini <<Aadewo Laaxi dendiko yese, Simooneseni bentiko e yese>> hidi u hicha.

³⁵Lam'i e erusichoshitini be badena ogiya beera muta zeeriyara Laaxi Yesuusay boora ususe meyssi indoniya esa waysi be erdonikiyara e bidzi bidzina ususe u oto.

³⁶Usini haanxhi zeere wolko zeeriya yesune Yesuusay beese u feeqa eedhi <<Modhetey hinuse maaquwaye>> hidi e hido.

³⁷Usini <<Gomaxuko nu beene>> hidi du'eydi iitana u jhassho.

³⁸Yesuusani <<Ame hi du'eyne? Ame hi muxhurowanna hi eeze?

³⁹Ta kucheni maaqqe ta tokeni beedi taa e maaqenike eruwayte, fetto yoodi ayti taa beewayte. Gomaxi achoni meqeteni keenguwasso. Achowara meqetiyara ta keengesa hay hi beenenikeko tani>> hidi e hido.

⁴⁰Yeydi beydo geede be kucheni be tokeni e beyso.

⁴¹Usini maggaafa dendasuna micci esa e maaqenike aadekoydi hido badi u yesune Yesuusay <<Muusso abakoy yesa yese?>> hidi e oycco.

⁴²Usini michuttese gulxhiyafa esuse u indine

⁴³etti u buro e muudo.

⁴⁴Yesuusani <<Tani hinunaara wolko ta yechoniyaka <Muse wogaafani maaqqe kaayaxitusaafani zingalesaafani haanxhi fissharowafa uddi ta gisha diizuttechashi uddina e aaloronikeko e worguse> hidi ta zeerdechoshi ha esako e maaqicha>> hidi e hido.

⁴⁵Yenniyaka Hayla Fissharowaka diizuttechashe u gaxhoronike maxo ususe e indo.

⁴⁶Usukoni <<Mesihe gara maddhay yoonenikiyara haysso wonte haybowafa e dendenikiyara zagewoko e diizuttecha.

⁴⁷Yeydiwo e sunxuna <Hi cubbo dhaddi maaquwayte, Wontoy hi cubbo <<Attuwaye>> hidiko e hine> yeydi Yerusaleemefa densi be wude wude yese axuse uddi e ohuttenike diizuttiko e yese.

⁴⁸Hinunini haanxhi zeerese taase ato maaddhi oheesitako.

⁴⁹Siwwayte, nuwadey <Hinuse ta inge> hidi gobbusechoshako ta anxe. Osay afaafa yookete hi eforo makko Yerusaleeme katamaa decuwayte>> hidi e hido.

⁵⁰Ye e geede Yesuusay uso etti Biitaniya ganda e aando. Yahani be kuche densi uso e suuzzo.

⁵¹Uso suuzzisine u garafa shahutti afaa e kesso.

⁵²Usini esuse dissi keddaydese maggana dhaddi Yerusaleeme u maaddho.

⁵³Wonto galatisine uddi wogga aallo Wonto Hayla Zawaawo u yecha.