Read koorete Luqaase 3 Bible Online

Luqaase 3 - koorete bible

Luqaase 3

¹Rooma kaati[4] Xhibariyosey kaatto tamma ichicho beraa Phenxhenaxi Philaxhosey Yuuda wude ahesa, Herodisey Galila wude ahesa, yeydiwo Herodiseyndo na'i Filphoosey Ituriyasiyara Tirakonidosiyara ahesa, Liisanooseni Abilaanise ahesa u maaqicha.

²Haannaara Qayaafaaray kahinituse afana adita u maaqicha. Yenniyani Zakaraase na'i Yohanisey saha melaa yesune Wonto katoy esuko yoodo.

³Hinne Yohanisey Yordanose waaxi semfa hamfa uddi godo hanti <<Hi cubbo dhaddi maaddhi xhamaquttuwayte. Yeydi hi maaqete Wontoy hi cubbo <Attuwaye> hidiko e hine>> hidi ohiya e yecha.

⁴Yeydini e maaddhosi kaayaxi Isayasey Yohanisese diizecho kaayoy itorosako. Ye esini <<Saha melaa uwwara axi katoy <Laaxi oge naquwayte, modhussi gizusuwayte.

⁵Shoorey kundi shanka e maaqe, bakkaara dentaaray be uddina yekke ulla hiwaye. Oge doomay gizuwaye, qun'i dhige ogeni modhuwaye.

⁶Axi be uddina Wontoy loolusesa beewaye> yeydiko e hine>> yeydi hinesako e maaqicha.

⁷Hinne Yohanisey xhamaquttese beeko yooda axita <<Hinuno gappasshi nayshito! Qaaruseesito! <Wontokofa yoone huulaafa kesoko nu kese> hidi waydi hi maxe?

⁸Hi cubbo dhaddi hi maaddhosi esuna erutte hanta hantuwayte baaka <Nuni Abrahaame nayshuko> hidi cee'uttofita! Hinuse ohoko ta ohe. Wontoy ha shushaafa etti Abrahaamese nayshe mahesuko e danda'e.

⁹Fetto hatte mixita e xhabhowafa bursi dafese gandey naquttiko e yese. Yoonase modhe aafe kaxhuwa mixiti uddina burdiko tamaa u dafutte>> hidi e hido.

¹⁰Hinne axitini Yohanise <<Hine waani nu hiyye?>> hidi u oycco.

¹¹Esini <<Lam'i maa'o keengesi lakko axuse inguwaye. Kaxa keengesini fedaara wolko shahuwaye>> hidi e hido.

¹²Assi qaraxha qaraxhichashitini xhamaquttese esuko yoodi <<Laaxo, nuni hinne waa nu hiye?>> hidi u oycco.

¹³Esini <<Shamusheshe e worguseesume garsi axe shamushofita>> hidi e hido.

¹⁴Kaati tooraxitini yoodi <<Am nuni hanto?>> hidi u oycco. Esini <<Osana axi miijhe ettofita, zaadena axe luuttofita. Hinuse hi hanta gisha hi ekkesi ellako elle>> hidi e hido.

¹⁵Yenniyaka axiti uddina bidzi abako kakkisine Yohanise gisha be bidzi bidzina be muxhurowanna <<Ha esi Mesihiyani?>> hidi u maxicha.

¹⁶Yohaniseni <<Tanimay hinumba waaxunako xhamaqe. Taame garesi ye esi yootako e yoone. Tani fetto e kobha tufe bircheshe bishuwa axuko. Esi hinumba Ayaana Geeshunaara tamanaarako e xhamaqe.

¹⁷Aydaa yese kaxa esuna falaafa shahese haxhooleko be kuchiya e aytese. Be geessho geede modhe kaxa li'iyako e gelse. Fala bayese danda'uwa tamanako e megge>> hidi e hido.

¹⁸Yeydiwo Yohanisey axe laga ogena narisine modhe odo e ohicha.

¹⁹Galila wude ahicha Herodisey beyndo na'i macho Herodiyada ettosunaara fede iita laga abako e hantosunaara Yohanisey esa murdo.

²⁰Hatteni Herodisey Yohanise aykussi tufe zawa gelsusena iita gara iita fetto e kosso.

²¹Axi uddina xhamaquttoniya Yesuusani xhamaqutto. Xhamaqutti Wonto shi'iya e yesune afay do'uttine

²²Ayaana Geeshini e garay hade woyya bissheshesha maaddhi e bakkaa hoddho. Yenniyakani <<Ta eehe ta yeley nembako. Neenna maggako ta magge>> yeydi hine katoy afaafa sinto.

²³Yesuusay e beray haydzi tamme ellesa maaddhesune eruse e ayto. Esini axuse bishichoshi Yoosefey yellosako. Ye esini Yoosefe yellasi Eele,

²⁴Eele yellasi Maate, Maate yellasi Lewe, Lewe yellasi Milke, Milke yellasi Yoona, Yoona yellasi Yoosefe,

²⁵Yoosefe yellasi Maatatiyo, Maatatiyo yellasi Aamooxhe, Aamooxhe yellasi Nahome, Nahome yellasi Esliime, Esliime yellasi Naage,

²⁶Naage yellasi Me'aate, Me'aate yellasi Maatatiyo, Maatatiyo yellasi Seyme, Seyme yellasi Yoosefe, Yoosefe yellasi Yooda,

²⁷Yooda yellasi Yoona, Yoona yellasi Reese, Reese yellasi Zerubabule, Zerubabule yellasi Selatiya, Selatiya yellasi Neere,

²⁸Neere yellasi Milke, Milke yellasi Haade, Haade yellasi Qosaame, Qosaame yellasi Almodaame, Almodaame yellasi Eere,

²⁹Eere yellasi Yose'e, Yose'e yellasi Al'ezere, Al'ezere yellasi Yorame, Yorame yellasi Maate, Maate yellasi Lewe,

³⁰Lewe yellasi Simoone, Simoone yellasi Yuuda, Yuuda yellasi Yoosefe, Yoosefe yellasi Yonaane, Yonaane yellasi Eliyaqime,

³¹Eliyaqime yellasi Meliya, Meliya yellasi Maynane, Maynane yellasi Mataate, Mataate yellasi Naataane, Naataane yellasi Dawite,

³²Dawite yellasi Isseye, Isseye yellasi Yoobeede, Yoobeede yellasi Bo'aaze, Bo'aaze yellasi Salmoone, Salmoone yellasi Na'asone,

³³Ne'asone yellasi Aminaadabe, Aminaadabe yellasi Raame, Raame yellasi Arine, Arine yellasi Hexhrone, Hexhrone yellasi Farese, Farese yellasi Yuuda, Yuuda yellasi Yayqoobe,

³⁴Yayqoobe yellasi Yissaaqe, Yissaaqe yellasi Abrahaame, Abrahaame yellasi Taara, Taara yellasi Naakore, Naakore yellasi Saruge,

³⁵Saruge yellasi Re'u, Re'u yellasi Felege, Felege yellasi Abere, Abere yellasi Saala,

³⁶Saala yellasi Qaynane, Qaynane yellasi Arfasade, Arfasade yellasi Seeme, Seeme yellasi Nohe, Nohe yellasi Laamihe,

³⁷Lamihe yellasi Matusala, Matusala yellasi Henooke, Henooke yellasi Yaarede, Yaarede yellasi Mehalaale, Mehalaale yellasi Qenane,

³⁸Qenane yellasi Henose, Henose yellasi Seete, Seete yellasi Addaame, Addaame meddhasi Wontoko hidiko e maaqicha.