Read koorete Luqaase 4 Bible Online

Luqaase 4 - koorete bible

Luqaase 4

¹Yesuusay Ayaana Geeshuna kundi Yordanose waassaafa dhaddi maaddhine ye Ayaana Geeshi saha melaaka durti etti hando.

²Oyddi tammi qamani wontani Humbayey naadhi beesune yaha e dooddo. Yeenxhi aallo abani e muudo baa gisha aallicira gara naayey esa oycco.

³Humbayey Yesuusa <<Wonto yele maaqo'ayko ha shuche <Boora maaquwaye> hidi hiwwa!>> yeydi e hido.

⁴Yesuusani <<Wonto katowa <Axi yesesi booranawo maaquwasso> hidiko e diizuttese>> hidi hissine e mato.

⁵Ye e geede Humbayey Yesuusa keddaydese godowa etti kessi ha saha gara be kaatetona kaatetona yese wudita uddi aafe qibhena beysi

⁶<<Ha esi uddi taasuko inguttese. Tanini ta eeheesuse ingesuko ta danda'e. Ha e gisha haanxho uddi iitana moddhese kuxa fuula keenge wudita neese ingako ta inge.

⁷Neni ta buro akkiruwa, uddi neesuko e maaqe>> hidi e hido.

⁸Yesuusani <<Wonto katowa <Ne Laaxuse ne Wontose akkiruwa, esawo kuxuwa> hidiko e diizuttese>> hidi e hido.

⁹Ye e geede hatteni Humbayey Yesuusa Yerusaleeme aandi Wonto Hayla Zawa qinowa kessi e esso. Esini <<Wonto katowaka <Niya u kaforonikeko Wontoy be woosaxituko e ohe, ne tokey shuchi gara oxheesume be kuchenako niya wokke u ayke> yeydiko e diizuttese. Ha e gisha, mee, Wonto yele maaqo'ayko hayafa sahaa doonguwa>> hidi e hido.

¹²Yesuusani <<Hayla Fissharowa <Ne Laaxi ne Wonto naadhi beedofuna!> hidiko e diizuttese>> hidi e mato.

¹³Humbayeni Yesuusa laga ogena naadhi be beedo geede fede bissheshe wogga be degexoro aallo datti dhaddi e hando.

¹⁴Yesuusani Ayaana Geeshi osana kundi Galila wudiya hanke e yoodo. E odoy ye wude uddi sinto.

¹⁵Ayhuda Bhikkilo Zawaa gelli e erusicha. Ye e erusoosuna uddi esa kedday kedda u hisso.

¹⁶Ye e geede Yesuusay essa be diccecho Nazrate e hando. Zage be lossoke sanbata wonte Ayhuda Bhikkilo Zawaa gelli geeshi fissharo zeerusese e dendine

¹⁷usini kaayaxi Isayase fissharo u indo.

¹⁸Esini e xhaassafa birshi <<Wonto Ayaanay ta garako yese, jhi'ituse modhe odo ta ohoronike taa tisshiko e yese, tufutteseesituse u birchuttoronike bal'ituse u beyoronike, ususe ta ohorosa maaketeseesitani shawo ta kessoronikeko ta anxuttese.

¹⁹Yeydiwo Wonto axe loolusese modhe bera ta ohoronike anxuttiko ta yese>> yeydi hine godo degessi e zeerusso.

²⁰Ye fissharo hanke xhaaxhi yaha maraxuko indi e utto. Ye Bhikkilo Zawaa yese axi aafey uddi e gara yecha.

²¹Esini <<Hatte ta zeerususune hi siido Hayla Fissharowa zage ohuttechashi hay hatteko hi buro e itto>> hidi e hido.

²²E gisha be uddina sekke hanke modhewo u zeericha. Iitana sooqe zeere e zeerdine micci <<Ha esi ha Yoosefe na'e maaquwaye?>> hidi uydo.

²³Yesuusani ususe <<Hinuni taako <Doo, neno dhaliyade, nemba loolusuwa!> hidi hiinesaara yeydiwo <Qifirnahoome ne hantoydi hissune nu siidosa mee ha ne wudiyani hantuwa!> hidi taa hi hiinesaara erako ta ere.

²⁴Aadewoko hinuse ta ohe, kaayaxi essa be yelutto wudiya kuxa keenguwasso.

²⁵Yebo siwwayte! Aadewo ta zeerete. Olo kaayaxi Elaase beraako haydzi bera izzuppi agunnaydi iray bukke dheeddine sahay xhordo. Hinneko axi naaydecha. Yenniyakani Isra'eele wudiya uddi u adiyaxhi baadese indowaxhi lagako u yecha.

²⁶Yenniyaka Elaasey Siidoona wudiya Saraffita sunge godo i adey baadese bidzi indosowo e anxuttosa baaka ye laga indowaxhituko oonekoni anxutto baasso.

²⁷Yeydiwo kaayaxi Elsa'e beraakani kom'e harge keenge laga axituko Isra'eele wudiya yecha. Maaqe baaka ussaafa Sooriyaxi Ni'imaane baaka fetto bidzini loolli geejhay baasso>> yeydi e hido.

²⁸Ye Bhikkilo Zawa yecha axiti be uddina e zeerdosa siidi iitana u huullo.

²⁹Usini dendi Yesuusa katamaame wude u kesso. Gaagaanna ur'i esa dafese wordi ye katamay yecho kedda gara gaaga deemowa u aando.

³⁰Maaqe baa Yesuusay u feeqaanna gardi dhaddi e hando.

³¹Ye e geede Yesuusay Galila wudiya yese Qifirnahoome katamaa yekke e yoodo. Yahani axita sanbata wonte e erusicha.

³²Erusisineni be adetona e erusicho gisha e erusichoshuna u micicha.

³³U Bhikkilo Zawaaka u feeqaa xhoozi e gara yese axi e yecha. Esini keddaysi faazi

³⁴<<Nazrataxi Yesuusa! Am nuuka niya gelsesa? Numba baysesuwa ne yoodo? Tani oone ne maaqesa nemba erako ta ere. Neni Wonto maaqe haylako>> yeydi hissine e uydo.

³⁵Yesuusani ye xhooze <<Mikki hiwwa! E garafa kesuwa!>> hidi e kassho. Xhoozini esa miidho badi yaha u giddaa olli dhaddi e garafa e kesso.

³⁶Be uddina micci sekke hanke <<Aba bisha zeerewa ha esi? Be adetonaara be osanaara xhooze e goode, usini esuse siidi dakke>> hidi uydo.

³⁷Yesuusay nashuttosi ye wude googe uddina sinto.

³⁸Yesuusay Bhikkilo Zawaafa kessi Simooneso e hando. Ye zawani Simoone machindoy iitana hardi misshi woy'iya i yecha. Hinne e loolusorosa Yesuusa u shidho.

³⁹Esini isuko gardi i da'aa eedhi ye micha harge <<Dhagguwa!>> hidi e kassho. Ye hargeni yenniyawo dattine dendi ususe worgusesa i hanto.

⁴⁰Qoossi gelese hisune axi lagay be bishana bishana hardi yecha axita Yesuusako u oodo. Esini u bidzi bidzi gara be kuche gaddi loolusso.

⁴¹Xhoozaxheni esa <<Neni fetto Wonto yeleko>> yeydi hissine faazi laga axe datti dhaddi u hangicha. Esi beese Mesihe maaqenike u erdecho gisha oonekoni u ohuwannike minsi e oto.

⁴²Sahay wontusune kessi Yesuusay axi baa godo e hando. Axiti esa degexese u worgicha. Wordi be degesso geedeni <<Nu wudefa dhaddi handofuna>> hidi u shidho.

⁴³Yesuusani <<Fede katamittaa assi handi Wonto kaatetese modhe odo oheko tamba e worguse, ta anxuttosi esusuko>> hidi e hido.

⁴⁴Hinne Galila wudiya seya haya hanti Ayhuda Bhikkilo Zawaa uso e erusicha.