Read koorete Luqaase 5 Bible Online

Luqaase 5 - koorete bible

Luqaase 5

¹Yesuusay bidzi wonte Genserexhe bagade da'aa eedhi Wonto kato e ohicha. Laga axiti siyese wola ur'icha.

²Esini bagade da'aa ee'iya yese lam'i zabha e beedo. Gulxhe aykicha geritini essaafa kessi ye gulxhe esuna be ayke maarabe u shohicha.

³Ye zabhaafa bidzika Simoonessa gelli e utto. Simoonekoni <<Sahaafa oddhewo sekke bagadiya shiishuwa>> hidi e hido. Ye e geedeni ye zabhaa utti axita eruse e ayto.

⁴Be also geede Simooneko <<Zabha sekke bagade gidda shiishi neera yese geraara gulxhe aykese hi maarabe bagadiya dakkuwayte>> hidi e hido.

⁵Simooneni <<Laaxo, yebo nuni onxe qama maarabe waassaa dakki dakki hidiko bidzoni ayto badi nu adho. Hatte ne oto gishako nu dakke>> hidi e hido.

⁶Maarabe bagadiya be datto geede iitana laddese gulxhe maarabey feedhuttoro makko u aytto.

⁷Hinne fede zabhaafa usaara be hantichoshita e qan'o. Usini yoodine lam'i zabhay kundine bagadey oodhese hiyoro aallo gulxhe u kunso.

⁸Simoone sungicha Phexhrosey beera wolko yecha geraara uddi be ayto gulxhe lagete be beedo woggaaka iitana e micco. Simooneni Yesuusa buro bocunti <<Laaxo, cubbaxe ta maaqe gisha taakofa hanguwa>> hidi e hido.

¹⁰Yeydiwo Simooniyara hanticha Zabdoose na'axhey Yayqoobiyara Yohanisiyaray miciya u yecha. Yesuusay Simooneko <<Aadekoydi jhasshofuna. Ha e geede sekke gulxhe ne aykenike axuko ne oone>> hidi e hido.

¹¹Usini be zabhita bagadiyafa bade gara be kesso geede uddi abako dhaddi Yesuusaara u hando.

¹²Bidzi wonte Yesuusay bidzi katama giddaa yesune kom'e hargey aytinne madawo maaddhese bidzi adey esuko e yoodo. Esini Yesuusa be beedonikewo deemona e buro undi <<Odde, eeha'ayko ta hargiyafa taa geesheshuko[5] ne danda'e>> yeydi yeetti e shidho.

¹³Yesuusani be kuchena ansi ayti <<Eehako ta eehe, geejhuwa>> yeydi e hido. Yenniyawo ye adey be hargiyafa e geejjho.

¹⁴Ye e geede Yesuusay ye ade <<Ha esa haliya oonekoni odussofuna, seya haya arte baaka handi Wonto zawa kahinese nemba beysuwa. Loolli ne geejjho gisha Muse wogana ohuttese kaasha uqusuwa, Ye esini axuse atoko e maaqe>> hidi minsi e oto.

¹⁵Yesuusay nashutto odo axiti fetto buromeni garsi u siido. Axi lagay be hargiyafa loolemiyara e ohesa siyemiyara esuko u bhikkilutticha.

¹⁶Esimay laga woggaa axi baa godo beese handi Wonto e shi'icha.

¹⁷Bidzi wonte Yesuusay erusiya e yecha. Galilaafaara Yuuda gandaafaara uddi yeydiwo Yerusaleeme katamaafani yooda Farasaxitaara Muse woga eruseesitaaray yaha uttiya u yecha. Hargaxita esuna e looluse Wonto osay Yesuusaara yecha.

¹⁸Hinne Yesuusay yecho godo axiti bidzi doondese ade abako gara woysi iddi u oodo. Yesuusay yese zawa gelsi e buro gadese wordi uyne

¹⁹axi iitana laddecho gisha ye hargaxe gelsey uso iissho. Hinne keexi gara etti kessi Yesuusay yecho addaanna keexe jhaadhi ye e gara be woysichoshuna e buro u hosso.

²⁰Yesuusani ye ooda gerusaara ye doomasaara u aadexo beedi ye dooma <<Doo, neesuko ta ohe, ne cubboy <Attuwaye> hidi hiyuttiko yese>> hidi e hido.

²¹Yenniya Muse woga eruseesitaara Farasaxitaaray <<Ha yeydi Wonto casheshi ha esi oonena? Axi cubbo <Attuwaye> hidi hiyese danda'esi Wonto baaka feday oonewa?>> yeydi u masso.

²²Yesuusani yeydi hissine u maxesa erdi <<Ha esa abasuwa hi muxhurowanna hi maxe?

²³<Ne cubboy <<Attuwaye>> hidi hiyuttiko yese> hidi hiyekofaara <Dendi dhaddi hanguwa!> yeydi hiyekofaara aasana shawukay?

²⁴Zeerey maaqusune tani axi yeley axi cubbo <Attuwaye> hidi hiyese ha saha bakkaa adeto ta keengesa eruwayte!>> yeydi hissine ye doondecha ade <<Doo, nenko ta ohe, dendi e gara niya iddi u oodechosha etti neeso hanguwa!>> yeydi e hido.

²⁵Yenniyawo ye adey dendi axi beesune e gara iddi u oodechosha etti Wonto kedda keddaysisine dhaddi beeso e hando.

²⁶Yaha yecha axiti be uddina iitana du'eydi <<Hanzo micushe abakoko nu beedo>> hidi hissine micci Wonto kedda kedda u hisso.

²⁷Yesuusani yahafa kessi hangichine Lewe sunge qaraace qaraxha godowa e uttichoyne beedi <<Taara aadhuwa!>> hidi e hido.

²⁸Leweni yenniyawo uddi base dhaddi dendi esaara hando.

²⁹Ye e geede Lewey be zawa keddaydese tato Yesuusase e naddho. Ye tato garani qaraacitaara fede laga axitaaray u yecha.

³⁰Farasaxitaara u bade maaqe Muse woga eruseesitaaray Yesuusay erusichoshita <<Ha qaraacitaara ha cubbachitaara abasuna hi muune hi ushe?>> hidi u oycco.

³¹Yesuusani ususe sekke <<Hargaxuse baaka modhe yese axuse dhaliyade worgusuwasso.

³²Tani esume yoodosi cubbachituko <Hi cubbo dhaddi maaquwayte> hidi hiyese baaka, <Gizoko nuni> hidi hineesituko <Hi cubbo dhaddi maaquwayte> hidi hiyese maaquwasso>> hidi e hido.

³³Ye e geede Farasaxitaara u bade maaqe Muse woga eruseesitaaray Yesuusako <<Xhamaqicha Yohanisey erusichoshitaara Farasaxitusaaraydi uddi woggako u xhoonge, Wontoni u shi'eydiko. Ne eruseesiti uddi wogga u muunesaara u usheshaaray abasuwa?>> hidi u oycco.

³⁴Yesuusani <<Kuulase taafutteseesiti ekke na'i usaara yesune xhooma u xhoonge?

³⁵Ekke na'i u garafa shahutte wontay yootako e yoone, yenniya ye wontako u xhoonge>> hidi e mato.

³⁶Yesuusani ha esa bissheshe bidzi zeere ususe e zeerdo. <<Doceshe danda'e maa'o kille garafa feeddhi cima gara ollesi baasso. Yeysi ollesi yesa'aykoma mikkewoko kille maa'o e feedhe, kille olley cimaara wola ekkuwasso.

³⁷Ye esukewo cindese ogorowa kille daanuttese weyne daana gussi gadesi baasso. Gussi e gada'ayko weyne daanay ogoroko e dhuuse. Hikketeko ye daanay wora gutti ye ogoroni go'uwasa maaqe hidiko.

³⁸Ye e gisha kille weyne daana kille ogorowa gadeko e worguse.

³⁹Dooddese weyne daana be ussho geede <Ha dooddesesako taase bishesha> hidi beyne gisha kille weyne daana ushe worgesi ooneni baasso>> hidi e hido.