Read koorete Luqaase 6 Bible Online

Luqaase 6 - koorete bible

Luqaase 6

¹Sanbataafa bidzi wonte Yesuusay tissheshe gossa giddaanna e garusune e erusichoshiti ye tisha be kuchena shirti dhoge u gello.

²Farasaxitaafa bidzi bidziti <<Sanbata wonte wogay tuceshesha abasuwa hi hante?>> hidi u oycco.

³Yesuusani ususe <<Dawitiyara esaara yecha axaara naayey uso oycine aba e hantosa fissharowafa zeerusobaytuwa?

⁴Esini Wonto Zawaaka gelenawo Wonto Zawa kahinitawo baaka ooneni muuwannike wogay tuccechosha Wonto buro gaduttecha hayla boora etti e muudo. Beera yechashituseni e indo>> hidi e hido.

⁵Yeydi beydo geede <<Tani axi yeley sanbataseni adetoko ta keenge>> hidi e hido.

⁶Assi fede sanbata wonte Ayhuda Bhikkilo Zawa gelli e erusso. Yahani bidzi axi e oshichi kuchey doondesesi e yecha.

⁷Muse woga eruseesitaara Farasaxitaaray Yesuusa esuna be luukesa wordi <<Mee, sanbata wonte e loolusesa nu beyyeese>> hidi u kakkicha.

⁸Esini yeysi u maxesa beesewo erdi ye kuche doomase <<Dendi axi feeqaa ee'uwa!>> hidi e hido. Ye doomani dendi axi feeqaa eedho.

⁹Yesuusani ye gerita <<Mee, hinumba ta oycceeshe. Sanbata wonte <Ha esa hantuwayte> hidi hiyuttesesi iita hantiyani modhe hantawa? Axe haybowafa maariyani oo'oyne axe wodhena?>> hidi e oycco.

¹⁰Esini be googe yecha axita uddina be beedo geede ye dooma <<Ne kuche gizusuwa!>> hidi e hido. Esini be kuche gizusinne loolli hade buro e kuchekewo e fidillo.

¹¹Muse woga eruseesitaara farasaxitaaray iitana huulli <<Esuse am ni hanto?>> hidi sekke hanke wola u oycicha.

¹²Yesuusay ye wogga bidzi wonte Wonto shi'ese bidzi bakka gara e kesso. Yahani shi'isinewo qama kume e adho.

¹³Sahay wonto geede be erusichoshita beeko u yooworosa e oto. U yoonne, ussaafa tamma lam'e e xhardo. Usoni <<Anxuttaasita>> hidi e sunso.

¹⁴Ye usini Simoone Phexhroseydi e sunsosa, esindo na'i Indiraase, Yayqoobe, Yohanise, Filphoose, Bartelemoose,

¹⁵Matoose, Toomaase, Ilfiyose na'i Yayqoobe, biyade wudese eedhecha Simoone,

¹⁶Yayqoobe na'i Yuuda, Yesuusa garsi inda Asqorotaxi Yuuda yeydiko u maaqicha.

¹⁷Yesuusay be erusichoshitaara bakka garafa hodhichine bidzi shanka e eedho. Lagiti e erusichoshitini yaha u yecha. Yuuda wudiyafa uddi Yerusaleeme katamaafani, malla bagade da'aa yese Xhirosiyafani, Siidoona katamaafani yoodasiti iitana laga axita u maaqicha.

¹⁸Usini e ohesa siyesaara be hargiyafa hargiyafa loolesaara wordi u yoodecha. Xhoozi aytechoshitini yoodi loolicha.

¹⁹Looluse osay e garafa kessi axe loolusicho gisha axi be uddina Yesuusa dolese u kardutticha.

²⁰Yesuusay be erusichoshituko maaddhi beedi <<Hinuno jhi'ito, magguwayte! Wonto kaatetowako hi yese.

²¹Hinuno hatte naayeesito, magguwayte! Buro garako hi mishe. Hinuno hatte yeekeesito, magguwayte! Buro garako hi miice.

²²Taa axi yeliyara wolko hamiya hi yese gisha axi hinumba inxha'usune, <Nuura baytako> hidi shahusune u cashushune, hi sunxeni u baysusune hinuse magguwayte!

²³Afa kaatetiya hi woomay orjeko. Fetto ye wonte magguwayte! Keddaysi magguwayte! Olo usaditini yeysiko kaayaxiti gara iita hantecha.

²⁴Hinuno wodumito, hinumba doojhushesha hi degesese gisha baduffu hinumba!

²⁵Hinuno hatte mishesheeshito, buro gara hi naaye gisha baduffu hinumba! Hinuno hatte miiceeshito, buro gara higilani yeefani hiine gisha baduffu hinumba!

²⁶Axiti hinumba galatusuniyara hinuse modhewo zeerusuniyara olo hinaditini zaadaxi kaayaxituse yeysiwo u mahicho gisha hinumba baduffu!

²⁷Taase siine hinuse ohoko ta ohe. Hi iilaxe eehuwayte. Hinumba inxha'esuse modhe hantuwayte.

²⁸Hinumba aacesha suuzuwayte, hinumba miidheesituse Wonto shi'uwayte.

²⁹Ne waqowa baqeesuse lakko bade waqo e baqoronike arsi beysuwa. Toyya maa'o ne garafa ekkeesuse fede maa'o kossi inguway.

³⁰Nemba shi'esuse e shi'e abako uddina inguwa. Ne miijhe tal'i ekkesuse hanke neese e mahoronike oyccofuna.

³¹Axiti hinuse mahorosa hi worgesa hinunini ye esukewo axuse mahuwayte.

³²Hinumba eeheesitawo hi eeha'ayko aba woomana hi keenge? Cubbachitini fetto bemba eeheesitawoko u eehe.

³³Hinuse modhe hanteesusewo modhe hi hanta'ayko aba woomana hi degexe? Cubbachitini beese yeydiwoko u hante.

³⁴<Ta miijhe mahoko e mahe> yeydi hiineesusewo tal'a'ayko aba woomana hi degexe? Cubbachini ye be tal'echo miijhe mati efese fede cubbachituse tal'ako u tal'e.

³⁵Hinunimay hi iilaxita eehuwayte. Modhete axuse hantuwayte. <Hagaa hanke taase e mahhe?> hidi gobbe keenguwasa hinuni tal'uwayte. Hi degexe woomay orjeko. Uddime afana maaqe Wonto nayshuko hi maaqe. Ye esini Wontoy bemba galatuwasituseni maaqqe iitituse jhergaxuko.

³⁶Afaa yese hinadey maaresa maaqenike hinunini yeydiwo maaresa maaquwayte.

³⁷Oone garani yaadhofita. Hi garani yaa'uttuwasso. Feda <Baysaxe> hidi hidofita, hinuni <Baysaxe> hidi hiyuttuwaytako. Axuse <Attuwaye> yeydi hiwayte hinuseni <Attuwaye> yeydiko e hiyutte.

³⁸Axuseni inguwayte hinuseni inguttoko e ingutte. Hi makkesunako matti hinuse e makkutte. Fetto modhussi nocci siidhi e qinowanna garsi matti hinuse e ingutte>> yeydi e hido.

³⁹Sekkeni Yesuusay ususe mamakona <<Bal'ay bal'a durkuwa e durke? Durko'ayko be lam'una hobolowaka unguttuwaye mee?

⁴⁰Erusuttesi eruseesume garuwasso. Eriya yesesi modhussi be erdo geede hade eruseesukeko e maaqe.

⁴¹Hana ne aafiya yese mudduno beedo badi abasuwa se neyndo na'i aafiya yese diira ne beene?

⁴²Assiwo hana ne aafiya yese mudduno beedo badi abasuna <Nuundo na'e, se ne aafiya yese diira kessi ta ooxxoore> yeydi waydi hiyese ne danda'e? Neno awshacho! Burussi ne aafiya yese mudduno ooxuwa, ye e geedeko neyndo na'i aafiya yese diira ooxese modhussi ne beene.

⁴³Modhe mixi iita aafe kaxhuwasso. Iita mixi modhe aafe kaxhuwasso.

⁴⁴Mixiti be uddina be aafenako u erutte. Anke garafa belese aafey maxhuttuwasso, mixi dhusha garafa weyne aafey maxhuttuwasso.

⁴⁵Modhe axi modhe be muxhurowaaka bhikkiluttesesaafako modhe zeere e zeere. Iita axi iita be muxhurowaka bhikkiluttesesaafako iita e zeere. Axi be nuunana e zeeresi be muxhurowaaka kundi gardasafako.

⁴⁶Hinuse tani ohesa hi hantuwasa abasuna tamba <Laaxo, laaxo!> hidi hi xheyge?

⁴⁷Taako yoodi ta ohesa siidi kakkesi aba e bishesha hinuse ta ohheese.

⁴⁸Ye esi kaacho modhussi kaashi qaaqa gara keexha axuko e bishe. Wulqay yoodi ye zawa ur'o. Modhe kaacho gara be keexhuttese gisha en'ese dandadho baasso.

⁴⁹Ta kato siidi hanta gara feysshuwasi kaacho modhussi kaasho badi mikke saha gara keexe keexha axuko e bishe. Wulqay yoodi ur'ine ye zaway yenniyawo e undo. E ungeni orjena iitto>> hidi e hido.