Read koorete Luqaase 8 Bible Online

Luqaase 8 - koorete bible

Luqaase 8

¹Ye e geede Yesuusay aya katamani maaqqe aya gayteni hangisine Wonto kaatetose modhe odo ohisine e garicha. E erusicho tamma lam'ini esaara u yecha.

²Xhooze u garafa e goodichoshitaara be hargiyafa loolicha indowaxhitaaray Yesuusaara wolko u hangicha. Ye usini laappi xhoozita i garafa e goodecho Magdoolaxho hidi hiyutte Maarame,

³Herodisey maagesecho afana maaga maaqicha Kuuza machi Yohaana, Sosanaara fede fede laga indowaxhitaaraydi u yecha. Ye indowaxhiti Yesuusaara e erusicho tamma lam'aara be keengesuna u maricha.

⁴Axiti se katamaafa ha katamaafa uddi esuko yoodi bhikkiluttoniya ha mamakoni ususe e mamatto.

⁵<<Bidzi adey ayla aylese e kesso. Ayliya e yoosune bidzi bidzi mor'iti ogiya undine axi e garana dhedhi gardo. Kafitini maxxhi muudo.

⁶Fede mor'ey abako be oomo keenguwa qaaqa gara undi be mudho geede saha be oomo tima be keenguwadecho gisha e micco.

⁷Fede mor'ey anke dhusha giddaa e undo. Ankey esaara dicci gitti oosso.

⁸Fede mor'ey modhe sahaa undi e mudho. Ye mu'ani dicci xhiixi dakke e kaxxho>> hidi e hido. Assi sekke be kato keddaysi <<E siyorosa washey yesesi naddhi siwwaye!>> hidi e hido.

⁹E erusichoshitini <<Ha mamako birchey an basuwa?>> hidi u oycco.

¹⁰Esini <<Hinuse Wonto kaateto aasshi be gaddechosha hi eroronike matiko e yese. Feditusema beesine naddhi u beewanike siisine naddhi u gaxhuwannike zeerey be uddina mamakonawoko e zeerutte.

¹¹Ha mamako birchey yeydi hinesako. Mor'ey Wonto katoko.

¹²Ogiya unda mor'ey beysesi Wonto kato woggasewo siine axituko. Siyuttuwaye baaka be siidosa <Aadeko> hidi etti u looluwannike Humbayey yoodi Wonto kato u muxhurowafa e ekke.

¹³Qaaqa gara unda mor'ey beysesi kato siidi maggana ekke axituko. Efuttuwaye baaka <Aadeko> hidi u hinesi ye woggasewoko. Xhabho be keenguwadecho gisha naa'utti be beyutteniya yenniyawo be ettechosha u dhagge.

¹⁴Anke dhusha giddaa unda mor'ey beysesi Wonto kato siine axituko. Siyuttuwaye baaka yesiyawo u yesune ha saha maxowara woduntiyaray ha saha yeso okketey gitti aafe u kaxhuwannike e ooxe.

¹⁵Modhe sahaa unda mor'ey beysesi Wonto kato siidi moddhese gizo muxhurowaaka gaddi dandadhi aafe kaxhe axituko>> hidi e hido.

¹⁶Sekke Yesuusay <<Faqe faddhi ota e gara gufunxesi oo'oyne e gara be gehesi oomo ijhaa gadesi ooneni baasso. Zawa gele axi e fo'e beyoronike fetto addaako e gadutte.

¹⁷Ijheyda abakoy uddi addeydo badi attesi bidzini baasso. Aasshi gaddecho abakoy uddi fo'iya bentiko e erutte.

¹⁸Ha e gisha Wonto kato waysi hi siinesa hinumba naddhi kakkuwayte. Ye esini keengeesuse kosuttiko e ingutte. Keenguwasuse <Keemako ta keenge> hidi e hichoshi laaqani atto badiko e efutte>> hidi e hido.

¹⁹Yesuusayndowara esindo na'axhiyaray Yesuusako u yoodo. Axiti iitana laddine esaara muhey uso iissho.

²⁰Hinne axiti Yesuusako <<Neyndowaraydi neyndo na'axhiyaraydiko wudena yessine nemba worgesa>> hidi u oto.

²¹Yesuusani <<Wonto kato siidi e otonike hantesi be uddina nuundowara nuundo na'axhiyaray ye usoko>> hidi e hido.

²²Bidzi wonte Yesuusay be erusichoshitaara zabhaa gelli <<Bagade semfa nu fotteese>> hidi e hido. Usini fottese dendi aadho.

²³Bagade garana shardi u hangusune Yesuusa gehunxi aytine e geto. Yenniyawo jhirahoy waaxi gara dendine zabhaaka waaxi gele ayti usaara oodhese hinne maddhumiya u yecha.

²⁴E erusichoshiti Yesuusa gehunsaafa birkussi <<Laaxo, Laaxo, baadunxhima!>> hidi u hido. Esini dendi agexaara jhirahowara e kassho. Agexaara jhirahowaray yenniyawo dhimmi hido, fettonawo mikku e hido.

²⁵Esini be erusichoshita <<Hi aadexoy ay e yese?>> hidi e hido. Jhasshiyara micciyara sekke hanke wolko <<Agexeni jhirahoni e woose, usini e ohenikewo esuse woosutte. Hinne ha esi oonewa?>> hidi uydo.

²⁶Galila semfa bade yese Gerasenoone wude bagade fotti u ello.

²⁷Yesuusay zabhaafa kessonike bidzi adey xhoozaxhey aytesesi katamaafa kessi esaara wolko e muto. Laga beraafa ayti maa'o maa'e baasawo zawa maaquwasa boossay yese godowo e yecha.

²⁸Yesuusa be beedoniyaka keddaysi e uydo. Yesuusay xhoozeni <<Ye ade garafa kesuwa!>> hidi minsi e kasshecho gisha ye adey e buro undi orje katona <<Uddime afana maaqe Wonto yele Yesuusa, am taassa niya gelsesa? Odde, taa maddhunsofuna!>> hidi e hido. Ye esume buro ye ade gara xhoozi laga wogga e dendicha. Sansalatanaara toke tukke qanganaara tufutti kafuttiya e yecha. Tufuttoose baaka ye toke tukke qanga meyssi dattiyara sansalata bursiyarako e yecha. Xhoozini esa etti saha melaana baacha.

²⁹

³⁰Yesuusani esa <<Oonena ne sunge?>> hidi oycco. Esini laga xhoozi aytecho gisha <<Ta sunxi duulako>> hidi e hido.

³¹Xhoozini Yesuusa <<Odde numba <Yedena iitana zardese biixi bookowa hanguwayte> hidi hidofuna>> hidi minsiwo u shidho.

³²Yahani bochiti gara girme lagay yeemuttiya yecha. Usini <<Hinne odde, se girmitukaa handi nu gelleese!>> yeydi u hido. Esini <<Geluwayte!>> hidi e hido.

³³Hinne usini ye ade garafa kessi handi ye girmitukaaka u gello. Ye girmitini ye boche woxxhi hodhi bagadiya gelli u baado.

³⁴Ye girmita yeengichashiti maaddhase beedi dhaddi woxxhi katamaakani katamame wudeni handi axituse u odusso.

³⁵Axitini ye maaddhase beyese kessi Yesuusako u yoodo. Ye adeni xhoozi dattine bembani erdi moddhi be maa'o maadhi Yesuusa buro e uttusune beedi u du'eydo.

³⁶Esa beedechaashiti waa waydi e loollosa beya yooda axituse u odusso.

³⁷Ye Gerasenoone wude axiti be uddina Yesuusa orjena be jhassho gisha be wudiyafa dhaddi e hamoronike u shidho. Hinne Yesuusay zabhaa gelli dhaddi essafa be yoodecho wude e hando.

³⁸Xhoozita e garafa e gooddecho adey <<Odde, neera ta hammeese>> hidi Yesuusa e shidho. Esini <<Dhaddi neeso handi Wontoy neese waakese malla hanta e hantosa odusuwa!>> hidi e anso. Ye adeni Wontoy beese hanto malla hanta uddi katamaa aallo hanti odusisine e hando.

³⁹

⁴⁰Yesuusay hanke maaddhi yoosune laga axiti esa kafiya be yecho gisha maggana u motto.

⁴¹Bidzi adey Ayhuda Bhikkilo Zawase afana maaga maaqichashi Ya'irose sungesi e yoodo. E bushoni i beray tamma lam'e maaddhesenni hardi lubbosewo i yecho gisha Yesuusa toke gara undi <<Ta zawa aadhuwa>> hidi e shidho. Yesuusani Ya'iroseso hamiya yesune esaara hamiya yecha axiti laga be maaqicho gisha esa ur'i u maddhunxicha.

⁴²

⁴³Tamma lam'i bera aallo suuxi yoodi iso maddhunxicho bidzi indoy i yecha. [Isini be keengicho miijhe uddina dhaliyadituse shandi i alsinne] ooneni iso loolusese dandadho badecha.

⁴⁴Ye indoni Yesuusako yoodi geedena uddhi e maa'o bira i dollo. Yenniyawo ye i suuxi be gukkichosha e eedho.

⁴⁵Yesuusani <<Taa dollasi oonewa?>> hidi e oycco. Usini be bidzi bidzina <<Tani dollo baasso! Tani dollo baasso!>> hidi uydo. Phexhroseni <<Laaxo, haanxhi axiti ne googe kundeseesiti nemba ur'esa beesiniya <Taa dollasi oonena?> hidi ne hine?>> hidi e hido.

⁴⁶Yesuusani <<Osay taakofa kessosa erako ta ere. Aadewo axi taa dolliko yese>> hidi e hido.

⁴⁷Ye indoni aachiya be attuwasa be erdo geede Yesuusako kobursine yoodi e toke gara i undo. Yaha yecha lagaadeseni uddina abase yoodi Yesuusa be dollonikiyara waa waydi yenniyawo be loollonikiyara modhussi i oto.

⁴⁸Esini <<Nuunde! tamba ne goddosuna loolliko ne yese. Sawona dhaddi hanguwa!>> hidi e hido.

⁴⁹Yeydi haga zeeriya e yesune ye maaga maaqe Ya'irosesofa bidzi axi woosutti yoodi Ya'iroseko <<Ne bushoy baadiko yese. Laaxe ha e geede mikke gafusofuna>> hidi e hido.

⁵⁰Yesuusay ye e ohesa siidi <<Aadekoydi du'eydofuna! <Loolusako e looluse> hidi hiwwa neese, ne bushoy loolako i loole>> hidi e hido.

⁵¹Handi zawa gelisine Phexhrose, Yayqoobe, Yohanise, ye bushuwade, ye bushoyndo yeydi baaka ooneni zawa geluwannike e oosso.

⁵²Yaha yecha axiti be uddina ye busshi gisha <<Ay! Uy!>> hidi uwwisine u yeekicha. Yesuusay <<Yeetofita! Ha busshi getesesa baaka baado baanniko>> hidi e hido.

⁵³Ye busshi haydhesesa be ericho gisha qozoozzi u miicco.

⁵⁴Esini i kuche ayti <<Busshe! Denduwa>> hidi keddaysi e hido.

⁵⁵I kaxi hanke yoonne ukkenawo i dendo. Yesuusani <<I muunesa inguwayte>> hidi e hido.

⁵⁶Iso yella geri u micco. Esini ha maaddha abako oonekoni u ohuwannike minsi e oto.