Read koorete Luqaase 9 Bible Online

Luqaase 9 - koorete bible

Luqaase 9

¹Yesuusay tamma lam'e beeko xheydi xhooze uddi u goodorosa harge looluse osaara adetowara indi

²Wonto kaateto gisha u ohorosa hargaxita u loolusorosa e anso.

³Uso anxisineni <<Hi ogese maaqe abako abani aytofita. Kalloni, sigireni, gallani, miijheni, arxase maa'oni maaqqe abani aytofita.

⁴Borsa maaddhi hi gele zawaaka katamaafa hi kese makko yaha uttuwayte.

⁵Bidzi gate axiti ooneni <Hinumba ekkuwanxhiko> hidi u hitta'ayko ye katamaafa kesisine xhuure hi tokiyafa fitti gussuwayte. Ye atoy ususe kashoko e maaqe>> hidi e hido.

⁶Anxuttaasitini yahafa dhaddi kessi modhe odo ohisiniyara hargaxita loolusisiniyara seya haya axi yese ganda aallo u hanticha.

⁷Galila wudese afana maaga maaqicha Herodisey Yesuusay hanto odo uddi e siido. Bidzi bidzi axiti <<Xhamaqicha Yohaniseko haybowafa denda>> hidi odusiya u yecho gisha e buro e baado.

⁸Yeydiwo assi bidzi bidziti <<Kaayaxi Elaaseko maaddhi yooda>> hidi hissune feditini assi <<Olo kaayaxitaafa bidziko haybowafa denda>> hidi u hicha.

⁹Herodiseni beese be badena <<Yohanisema e baala bursusiko ta yecha. Hinne haanxhi abako uddina e hanteydi odusutte axi ha esi oonena?>> hidi e zeericha. Fetto beyeseni e worgicha.

¹⁰Anxuttaasitini hanke maaddhi be yoodo geede be hanto abako e uddina Yesuusako u odusso. Esi Beetesayda katama da'aa axi baa godowa usowo etti e hando.

¹¹Axitini aya e yesesa be erdo woggaa e geede handine ye handa axita Wonto kaatetese e erusso. Hargiyafa loolese worda axita e loolusso.

¹²E erusichoshiti qamese e hisune esuko uddhi <<Essaa ni yese godoy saha melako. Ha e gisha axiti ha googe yese katamaakani katamaame wudeni seya haya axiti yese gatiya budutti handi kaxaara aqussi godowara u degexorosa axe buduwa>> hidi u hido.

¹³Yesuusani <<Hinuni u muunesa inguwayte!>> hidi e hido. Usini <<Nu keengesi ichichi bache booraara lam'i gulxhiyarawoko. Ha e gisha handi haanxhi axe ellesa kaxa nu woondo baasa danda'uttuwasso>> hidi uydo.

¹⁴Axiti lagetey asanxuwoy ichichi kuma ellesako u maaqicha. Yesuusani be erusichoshituko <<Axita ichichi tamme ichichi tammeyssi uttusuwayte>> hidi e hido.

¹⁵Usini e otonikeysi axe uddi u uttusso.

¹⁶Ye e geede Yesuusay ichichi booraara lam'i gulxhiyara etti wokke afaa beedi Wonto e galatto. Meyssini axuse u taggorosa be erusichoshituko e indo.

¹⁷Axiti be uddina muudi u missho. E erusichoshiti atta baxe bhikkilli tamma lam'i kofa kume u denso.

¹⁸Bidzi wonte Yesuusay be gooshewo Wonto e shi'icha. E erusichoshiti e da'aa yechoyne <<Axiti tamba oonekoydini u hine?>> hidi e oycco.

¹⁹Usini << <Xhamaqicha Yohaniseko> hidiko u hine, feditini assi <Elaaseko> hidiko uyne, <Olo kaayaxitaafako bidzi haybowafa dendese> yeydi hineesitini yesako u yese>> hidi u mato.

²⁰<<Hine hinuni tamba ooneydini hiine?>> hidi e oycco. Phexhroseni <<Neni Wontokofa anxutta Mesiheko>> hidi e mato.

²¹Yeydi oonekoni u ohuwannike minsi e oto.

²²Assi Yesuusay be erusichoshituko <<Tani axi yeley maddha laga eforonikeko e worguse. Gate cimitini, kahinituse afana maagitini, Muse woga eruseesitini taa u inxha'e, u wodhe. Wodhuttuwaye baaka haybowafa haysso wonteko ta dende>> hidi e hido.

²³Assi Yesuusay uddiyadese <<Taara hamese worgesi yesa'ayko bemba dhagguwaye! Uddi wonte aallo suxi mixe iddi taara yoowaye.

²⁴Be yeso kafese worgesi baysako e bayse. Be yeso taame hissine garsi ingesi uddina be yeso kattiko e yese.

²⁵Axi ha saha wodunte uddina degexa bemba baysa oo'oyne miidha e hidako am esa e go'e?

²⁶Taanaara ta katonaara borsesa uddina tani axi yeley ta kuxa fuulanaara nuwade kuxa fuulanaara yeydiwo Wonto woosaxiti kuxa fuulana ta yoone woggaa esuna borsako ta borse.

²⁷Aadewoko hinuse ta ohe. Hatte haya yese axitaafa bidzi bidziti Wonto kaateto be beedo baa aallo fetto hay'uwasitako yesa>> yeydi e hido.

²⁸Yeydi be zeerdosuse hazzuppi wonta ellesa be decco geede Phexhrose, Yohanise, Yayqoobe yeysi etti Wonto shi'ese bidzi bakka gara e kesso.

²⁹Shi'iya e yesune e aafushay feda bissho, e maa'oni iitanawo laci lacidi faddhi booxe e maaddho.

³⁰Masso badi u yesune lam'i axiti yoodi Yesuusaara zeeriya u yecha. Usini Musiyara Elaasiyarako u maaqicha.

³¹U bishani iitana moddhi kuxa fuula keengesa e maaqicha. Zeeriya u yechoshini Yesuusa gara Yerusaleeme maddhay yoonenikiyara e hay'enikiyarako e maaqicha.

³²Yenniyakani Phexhrosiyaxhe gehunxi iissho. Gehunsaafa be birtoniyaka Yesuusay e bishay iitana moddhi kuxa fuula keengesa maaddhi esaara lam'i axi yesune u beedo.

³³Esaara zeeriya yecha geriti e garafa dhaddi shahuttusune Phexhrosey Yesuusako <<Laaxo, haya yesey niise waydini e moddhe! Ashita haya neese bidzo, Musese bidzo, Elaasese bidzo yeysi hinuse haydzi ashita nu keexxheese>> hidi e hido. Phexhroseni aba zeeriya be yesesa eruwadiko e yecha.

³⁴Phexhroseni ye esa zeeriya yesune dhumay yoodi uso fassho. Ye dhumani u googe gooddinne u jhassho.

³⁵Ye dhumaanna <<Ta xhardo ta yeley ha esako, esuse siwwayte!>> yeydi hine kato u siido.

³⁶Ye katoy sinto geede Yesuusay be gooshewo atto. Usini ye be beedosa ye woggaa oonekoni oduse baaka mikku uydo.

³⁷Ketiya Yesuusaara haydzi e erusichoshitaaray bakka garafa yekke hodhusune laga axiti Yesuusaara u muto.

³⁸Ye axiti giddaafa bidzi adey <<Laaxo, ha ta yeley bidzo maaqe gisha odde, taase beewwa!

³⁹Xhoozi ta yele uddi woggaa yoodi aytiko dedha e uwwuse, asshaanna goffuntoy yooworo aallo e fardunxe. E gara madussi laga karde geedewo e dhagge.

⁴⁰Ne erusichoshita xhooze u goodorosa ta oycine danda'e u dheeddo>> hidi keddaysi e oto.

⁴¹Yesuusani <<Hinuno doomito! Wonto aadexuwa ha bera axito! Hinne an makkinani hinunaara ta yesse, hinumbani ta danda'e? Mee, ne yele hana oowa!>> hidi e hido.

⁴²Ye yeleni hanke Yesuusako uddhine xhoozi ye yele olli fardunso. Yesuusay xhooze kasshi ye yeleni loolussi esadeko <<Yey, ne yeley>> hidi e hido.

⁴³Axiti be uddina Wonto mallete beedi micco. Axiti be uddina maaddhase beedi micciya yesune Yesuusay be erusichoshituko

⁴⁴<<Ha esa hinuni hi washe olli siidi gaxhuwayte! Tani axi yeley axi kuchiyako gardi ta ingutte>> yeydi e hido.

⁴⁵Usini yeydi e otosa gaxhe dheeddi ye e bircheni ususe be geluwannike aachunti e atto. Be oycuwannikeni u jhassho.

⁴⁶E erusichoshiti <<Nuukaafa oonewa garesa?>> yeydi wolko berse u gello.

⁴⁷Yesuusani be gawwa u massesesa erdi bidzi yele oddhe oodi be da'aa essi

⁴⁸<<Ooneni ha yele ta sunxuna mokkesi taa mokkako e mokke, taani mokkesi taa ansase mokkako e mokke. Hi uddikaafa eerokoydi hiyuttesi ye esako uddime garesa>> hidi e hido

⁴⁹Yohaniseni <<Laaxo, bidzi adey ne sunxuna xhooze goodusune beedi nuukaafa e maaquwa gisha nu oosso>> hidi e hido.

⁵⁰Yesuusani <<Hinumba iiluwasi hi bade maaqe gisha dhagguwayte oossofita>> hidi e hido.

⁵¹Yesuusay dhaddi afaa kese woggay ello geede Yerusaleeme hamese bidzi muxhuronawo e aadho.

⁵²Woosaxita be buro e anso. Usini uddi abako naqese Samariya yese bidzi ganda u hando.

⁵³Hamuttoose baaka ye ganda axiti Yesuusay yeyna gardi Yerusaleeme hamese hinesa be ericho gisha uso mokke u inxhadho.

⁵⁴E erusicho Yayqoobiyara Yohanisiyaray mokke u inxhadhosa be beedo wogga <<Laaxo, <Afaafa tamay hodhi uso muuwaye> hidi nu hiyorosa eeha ne eehe?>> hidi u oycco.

⁵⁵Yesuusay hanke usuko maaddhi gaylli [<<Hinuni aba bisha ayaanana yeydi hi zeeresa hinumba eruwaytako. Tani axi yeley yoodosi axi lubbo maaresuko baaka baysese maaquwasso>> yeydi be hido geede]

⁵⁶yahafani dendi fede ganda u hando.

⁵⁷Yesuusaara e erusichoshitaaray oge hamiya yesune bidzi adey Yesuusa <<Tani neera aya e maaqo'aykoni hame worgoko ta worge>> hidi e hido.

⁵⁸Esini mahisine <<Geedaliti essa be yese googgo, kafitini essa be gele keexe keemako u keenge. Tani axi yeley essaa gelli kaxe ta ekke godo keenguwasso>> hidi e hido.

⁵⁹Fede adese <<Neni taara yoowwa!>> hidi e hido. Ye adeni <<Laaxo, neera hameme buro zawa handi nuwade taaddi ta yoowweese>> hidi e hido.

⁶⁰Yesuusani <<Haydheseesiti be haybita mooggoronike ye esa dhagguwa! Neese handi Wonto afa kaatete gisha axituse ohuwa>> hidi e mato.

⁶¹Assi fede adey <<Laaxo, neera hame tani worgoko worge. Burona ta zawa gera handi <Sawona yesuwayte> hidi ta yoowweese>> hidi e oycco.

⁶²Yesuusani <<Woota wootisine irfe ayti be geede beene axi ooneni Wonto kaatetese bishuwassho>> hidi e mato.