Read koorete Yohanise 1 Bible Online

Yohanise 1 - koorete bible

Yohanise 1

¹Uddi abakoy badesune buro katoy e yecha. Ye katoni Wonto da'aa e yecha. Ye katoni Wonto e maaqicha.

²Esini uddi abakoy badesune buro Wonto da'aa e yecha.

³Uddi abakoy meddhuttosi esunako. Meddhuttassaafa uddi bidzi abakoni esa baaka meddhuttasi baasso.

⁴Esini yesona kundesesa maaqusune ye yesoni axuse fo'e e maaqicha.

⁵Ye fo'eni cenchaakako faqiya e yese. Cenchani fo'e fetto iichuwassho.

⁶Bidzi Yohanise sungesi Wontoy woosso axi e yecha.

⁷E ohete axiti be uddina fo'e aadexorosa fo'ey aba maaqenike e gisha ohese e yoodo.

⁸Yohanisey fo'e gisha ohese e yoodosa baaka beese fo'e maaquwadiko e yecha.

⁹Esawoy aade fo'e maaqe fo'ey uddi axuse fo'e ingesi ha saha gara yoowiya e yecha.

¹⁰Ye fo'eni ha saha gara e yecha. Ha sahay meddhuttosi beese esuna maaddhessakoni ha saha axiti esa ere u dheeddo.

¹¹Esi be axituko e yoodosa baaka e axiti esa efe u inxhadho.

¹²Maaquwaye baaka bemba ettasituse uddi yeydi hiyoni bemba aadesaasituse Wonto nayshe u maaqoronike godo e indo.

¹³Ye usitini Wontokofa u yeluttosa baaka axi bohiyafa acho maxowafaara col'afaara yelutto baasso.

¹⁴Katoy axe e maaddho, nu giddani e yesso. Wontoy axuse keenge maxo modhetiyara aadiyaray essaaka kundine bidzi yeley biyade da'aa keenge kuxakewo e kuxa fuulani nu beedo.

¹⁵Yohaniseni e gisha zeerisine << <Ta geede yoonesi taame buro yechashe e maaqe gisha taame garoko e gare> yeydi ta otechoshi hay ha esako>> yeydi be kato keddaysi e oto.

¹⁶Wontoy beese kundi gardesesaafa nuuse uddi base hanti sekke kossi kossi modhe e hanto.

¹⁷Wonto wogay Muse badenako e ingutto. Wontoy axuse keenge maxo modhetiyara aadiyaramay Yesuusi Kristosa badenako e bento.

¹⁸Wonto beedesesi koolona baasso. Esaara wolla shibhi hidese Wonto maaqe bidzi e yelewoko esa addusa.

¹⁹Ayhuda afana maagiti Yerusaleeme katamaafa kahinitaara Lewaxitaara xhamaqicha Yohaniseko woosso ansi <<Neni oonewa?>> hidi u oycusho.

²⁰Yohaniseni <<Tani Mesihe maaquwasso>> hidi sekke hanke hido badi be aade e oto.

²¹Woosaxitini <<Hinne neni Elaasiya?>> hidi u oycco. <<Oo'o, tani Elaase maaquwasso>> hidi e mato. <<Hinne <E yoone> hidi hiyuttecha kaayaxi nemba?>> hidi uydo. <<Oo'o, tani kaayaxi maaquwasso>> hidi e hido.

²²<<Hinne neni oonena? Woosso neeko nuu ansa geruse nu ohoronike neni neese nemba ooneydini ne hine?>> hidi uyne

²³esini <<Kaayaxi Isayasey otonike < <<Laaxi oge naquwayte>> yeydi hissine saha melaa uwwara axi kato> yeydi hiyuttechay tambako>> yeydi e hido.

²⁴Woosso handechashiti Farasaxitaafako u maaqicha.

²⁵Usini <<Hine Mesihe oo'oyne Elaase oo'oyne kaayaxe ne maaquwasa ame ne xhamaqe?>> hidi u oycco.

²⁶Esini <<Tani waaxunako xhamaqe. Maaquwaye baaka hi eruwasako hi giddaaka eedhesa.

²⁷Esini taame geedeko e yoone, tani fetto e kobha tufe bircheshe ellesesa maaquwasso>> yeydi e mato.

²⁸Haanxhi uddi yeydi e maaddhosi Yohanisey essa xhamaqicho Yordanose waaxuse qoossi kese bade yese Biitaniya katamako e maaqicha.

²⁹Geede wonte Yohanisey Yesuusay beeko yoonesa beedi <<Hay ha saha gara yese axi cubbo densi ooxe Wonto dori ha esako.

³⁰<Ta geede yoonesi taame buro yechashe e maaqe gisha taame garoko e gare> yeydi ta otechoshi ha esako.

³¹Tanini esa eruwadiko yecha. Maaqe baaka esi Isra'eelaxituse addeyoronike yoodi waaxuna xhamaqiyako ta yese>> yeydi e hido.

³²Yohaniseni sekke ateysine <<Ayaana Geeshi afaafa hade woyyake hoddhi e gara uttusune ta beedo.

³³Tanini taase esa eruwadiko yecha. Maaqe baaka waaxuna ta xhamaqoronike tamba ansasi ohisine <Ayaana Geeshi hoddhi e gara uttusune ne beenesi esako Ayaana Geeshuna xhamaqesi> yeydi taako otiko e yecha.

³⁴Yeydi e maaqusune beediko ta yese. Ye e gisha tani Wonto yele e maaqenike esuse atoko>> yeydi e hido.

³⁵Geede wonte Yohanisey be erusicho lam'i geritaara sekke ye godowa e yecha.

³⁶Yesuusay yeyna garesa beedi <<Hay Wonto dori!>> yeydi e hido.

³⁷Ye e erusicho lam'i geriti e otosa siidi Yesuusa geede u aadho.

³⁸Yesuusani be geede ye lam'i geriti yoowiya yesesa maaddhi beedi uso <<Am hi worge?>> hidi e oycco. Usini <<Rabbe! Ayaw ne yese?>> hidi uydo. (<<Rabbe>> yeydi hiyoy <<Eruseyo>> yeydi hiyoko.)

³⁹Yesuusani <<Hana yoodi beewayte>> yeydi hido. Hinne esaara handi aya e yesesa u beedo. Ye wonte yenniya esaara wolko u decco. Ye woggani tammi saate ellesa e maaqicha.

⁴⁰Yohanisey otosa siidi Yesuusaara handecha lam'ukaafa bidzi Simoone sungicha Phexhrosese esindo na'e Indiraaseko e maaqicha.

⁴¹Ye Indiraasey burona beyndo na'i Simooneko handi <<Mesiheko nu degesso>> hidi e oto. (<<Mesihe>> yeydi hiyoy <<Kristosa tishuttesesa>> yeydi hiyoko.)

⁴²Ye e geede Indiraasey Simoone Yesuusako e oodo. Yenniyani Yesuusay Simoone aafiya caddi beedi <<Neni Yoona na'i Simooneko, ha e geede sekke Keefako ne sunge>> yeydi e hido. (<<Keefa>> yeydi hiyoy <<Phexhrose>> oo'oyne <<Shoollo>> yeydi hiyoko.)

⁴³Geede wonte Galila wude hamese e wordo. Filphoosiyara muti <<Taara yoowwa>> hidi e hido.

⁴⁴Filphooseni hade Indiraasekiyara Phexhrosekiyara Beetesayda katama axuko e maaqicha.

⁴⁵Filphooseni Natina'eeleko handi <<Musey be woga fissharowaka kaayaxiti be kaayo fissharowa diizechoshako nu degesso. Esini Yoosefe na'i Nazrate katamaxi Yesuusako>> yeydi e hido.

⁴⁶Natina'eeleni <<Nazrate katamaafa modhe abakoy bentese danda'aa danda'e?>> hidi oycco. Filphooseni <<Hana yoodi beewwa!>> hidi hido.

⁴⁷Yesuusay Natina'eeley beeko yoonesa beedi <<Doomete keenguwa aade Isra'eelaxe hidi hissoosi ha esako>> hidi e gisha e hido.

⁴⁸Natina'eeleni <<Ay taa ne ericha?>> hidi oycco. Yesuusani <<Filphoosey neeko otosume e buro belese oomo ne yesuneko ta beedecha>> hidi e hido.

⁴⁹Yenniyani Natina'eeley <<Laaxo, neni Wonto yeleko, neni Isra'eelaxituse u kaatuko>> hidi e hido.

⁵⁰Yesuusani <<Tamba ne aadesosi <Belese oomo ne yesuneko niya ta beedecha> yeydi ta hido gisha maaquwaye? Ye esa gare abakitako buro gara ne beene.

⁵¹Hinuse ta ohesi fetto aadeko. Afay do'uttesune Wonto woosaxitini axi yele hidi hiyuttasi gara hodho kesso u hisuneko hi beene>> hidi e hido.