Read koorete Yohanise 10 Bible Online

Yohanise 10 - koorete bible

Yohanise 10

¹Sekkeni Yesuusay <<Hinuse ta ohesi fetto aadeko. Doriti anxa sumaanna maaquwasa fede ogena gelesi kaysowara fuulowarako.

²Sumaanna gelesimay dorita yeengesako.

³Sumaa kakkesi esuse gasa do'ako e do'e, doritini e katoko u siine. Esini be dorita u sunxuna sunxunako xheydi usoni isshi wude e kesse.

⁴Be dorita uddi wude be kesso geede u buro gardiko[8] e hange. Usini e kato shati be ere gisha e geedeko u hange.

⁵Fedase e kato be eruwa gisha esukofa dhaddi u ba'esa baaka e geede hamuttuwasso>> yeydi e hido.

⁶Yesuusay ha zeere yeydi ususe e zeerdinne ye e birchey ususe gele e dheeddo.

⁷Hinne Yesuusay sekke <<Hinuse ta ohesi afetto adeko. Doriti essaanna gele sumay tanko.

⁸Taame buro yoodasiti uddi kaysitaara fuulitaarako. Maaquwaye baaka doriti ususe siyutto baasso.

⁹Sumay tambako, taakona gelesi loolako e loole. E gele e kese, essaaka be yeemutte modhe godoni e degexe.

¹⁰Kaysoy esume e yoonesi kaysese, shufesaara baysesaarako. Tanimay yoodosi yeso u degexoronikiyara uddi ogena bidzoni facete keenguwa yeso u keemoronikiyarako.

¹¹Modhe yeemaxi tambako. Modhe yeemaxi be yesoko be doritume hissine garsi e inge.

¹²Dorita anbaxhena yeengesi sudhami yoosune be beene woggaaka <<Ha esi taasuko>> hidi yeengesa be maaquwa gisha dattiko dhaddi e woxhe. Sudhamini dorita shoddi e ekke, ye doritini u budutte.

¹³Ye esi esume datti e woxhesi anbaxhena be yeengicho gishaara dorita be higiluwa gishaarako.

¹⁴Modhe yeemaxi tambako. Tani ta dorita ere, ta doritini taa ereydiko.

¹⁵Nuwadey tamba erenikiyara tani nuwade erenikiyarako tani uso ere. Tani ta doriti gishako tamba haybose garsi inge.

¹⁶Ha doritaara wolla aquwassako fede dorita ta keenge. Uso hanke ooweko tamba e worguse, usini ta kato u siine, ha doritaara bidzo u maaqe, uso yeengesini bidzo e maaqe hidiko.

¹⁷Sekke ta yesoronike tamba garsi ta inge gisha nuwadey tamba eehako e eehe.

¹⁸Tamba ta eehana garsi ta ingesa baaka tamba ta ingoronike osana mahesi baasso. Tamba garsi ingesaara sekke ta yesoronike taa mahesaara adeto keemako ta keenge. Ha woosso ta ettosi nuwadekofako>> yeydi e hido.

¹⁹Yeydi e hidosuna sekke Ayhudaxiti gidda shahoy gello.

²⁰U giddaafa lagiti <<Ha e gara xhoozuko yesa, goojhiko e yese, abasuwa esuse hi siine?>> yeydi u hido.

²¹Fediti assi <<Xhooze keenge axi zeerenike zeeriya baasso. Xhoozi bal'ay beyoronike mahese danda'aa e danda'e?>> yeydi u hido.

²²Yerusaleeme Wonto Hayla Zawa Killooma Massala[9] kuxicho wontey ello. Ye woggani bargo maaqicha.

²³Yesuusay Wonto Hayla Zawaa <<Salamone kara>> hidi hiyutte godona sekke hanke e hanticha.

²⁴Yenniyani Ayhudaxiti hanke e googiya bhikkilutti <<An wonte aallona numba lam'i maxo gawwa ne gade? Neni Mesihe maako tiddhissi nuuse ohuwa!>> hidi u oycco.

²⁵Yesuusani <<Hinuko otiko ta yese, hinunimay <Aadeko e zeerdo> hidi hiwaytako. Nuwade sunxuna ta hante hantako taase ato maaqesa.

²⁶Hinunimay ta doritukafa hi maaquwa gisha tamba <Aadeko e zeerdo> hidi hiwaytako.

²⁷Ta doriti ta kato u siine, tanini uso erako ere. Usini ta geedeko taara wolko u hange.

²⁸Koolo makkina u yesoronike ta mahe, koolo makkina bayese danda'uttuwasso. Uso ooneni ta kuchiyafa shoddi ekkuwasso.

²⁹Uso taase inda nuwadey uddime garoko e gare. E kuchiyafa ooneni uso shoddi efese danda'uwasso.

³⁰Taara nuwadiyaray bidziko>> yeydi e hido.

³¹Yenniyani assi Ayhudaxiti esa shuchuna iceshe shuche u etto.

³²Yesuusani <<Adey taako <Hantuwa> hidi hidosa laga modhe hantako hinuse ta hanto. Hinne tamba esume hi iceshi an hantamewu?>> yeydi e hido.

³³Usini <<Nemba esume shuchuna nu iceshi Wonto ne cassho gishako baaka ne hanto modhete hanta gisha maaquwasso. Ye esini neni axe maaqichine <Wontoko tani> hidi ne hido gishako>> hidi u hido.

³⁴Yesuusani <<Hi woga fissharowa Wontoy zeerisine <Hinuni hi bidzi bidzina wontitawoko hidiko ta hido> yeydi hinesi diizutto baye?

³⁵Axi Hayla Fissharowa diizuttesesa baysese danda'uwasso. Yebo, Wonto katoy usuko yoodosita uddi u bidzi bidzo wontitako yeydi hidiko e yese.

³⁶Hine nuwadey tamba hantesa mati suuzzi ha saha gara e ansine <Wonto yeleko tani> hidi ta hido gisha <Wontoko e cassho> hidi abasuna tamba hiine?

³⁷Tani nuwadey <Hantuwa> hidi hidosa hantuwasa ta maaqo'ayko tamba aadesofita.

³⁸Nuwadey tamba <Hantuwa> hidi hidosa hantesa ta maaddho geede tamba aadexuwasa maaqo'ayketeni ta hante hanta <Ha esi Wontokofako> hidi ekkuwayte. Ha esunako nuwadey taara bidzo maaddhi tani nuwadiyara bidzo maaddhesesa tiddhissi hi ere>> hidi e hido.

³⁹Assi esa aykese u wordechoyne u kuchiyafa dhaddi tulxhi kessi e hando.

⁴⁰Yordanose waaxi semfa bade buro Yohanisey xhamaqicho godo dhaddi e hando. Yahani e decco.

⁴¹Laga axiti esuko yoodi <<Yohanisey fetto bidzi micushe hanta hanto badiko e yecha. Beese hante dheeddakoni ha axi gisha e zeerdo zeerey uddi aadeko>> hidi u hido.

⁴²Yahani laga axi esa aadesso.