Read koorete Yohanise 11 Bible Online

Yohanise 11 - koorete bible

Yohanise 11

¹Bidzi axi Aalazare sungesi Biitaniya sunge katama hardi e yecha. Ye Biitaniyay Maaramiyara isindo busho Martaaray essaaka yecho katama e maaqicha.

²Ye Maaramey Laaxi toke shittona tisshi be qinona ucechanniyoko i maaqicha. Harda Aalazarey isindo na'uko e maaqicha.

³Ye Aalazareyndo bunaycey <<Laaxo, ne eehicho Aalazarey hardiko yese>> hidi hissine Yesuusako woosso u anso.

⁴Esini ye woosso siidi <<Ha hargey Wonto yeley esuna kuxuttorosa Wonto kuxa gisha baaka haybose ellusesa maaquwasso>> hidi e hido.

⁵Yesuusay Martaaraysi isindo busho Maaramiyaraysi usindo na'i Aalazariyaraysi modhussi e eehicha.

⁶Eehuwaye baaka Aalazarey hardosa siidesine be yecho godo lam'i wonte e feyssho.

⁷Ye e geede be erusichoshituko <<Dhaddi Yuuda wude sekke nu hammeese>> hidi e hido.

⁸E erusichoshiti <<Nu Laaxo! Oddhe wontame e buro Ayhudaxiti nemba shuchuna iceshe hiwadiya u yecha? Hinne assiya sekke yaha ne hange?>> hidi u hido.

⁹Yesuusani ususe <<Bidzi wontaafa fo'ey yesesi tamma lam'i saate maaquwaye? Wontana hantesi yesa'ayko ha saha fo'e be beene gisha dhumuttuwasso.

¹⁰Qama hantesimay fo'ey baa gisha dhumuttoko e dhumutte>> yeydi e mato.

¹¹Ye e esa be zeerdosi geede assi <<Ni lagge Aalazarey geti e yese gisha birkusiyako ta hange>> hidi e hido.

¹²E erusichoshiti <<Laaxo, geti yesso hargiyafa loolako e loole>> yeydi u hido.

¹³Yesuusay zeerdechoshi Aalazare haybo gishako e maaqicha, ususema gehunxi gisha e zeerdosako e bishicha.

¹⁴Hinneko Yesuusay tiddhissi <<Aalazarey haydhiko yese.

¹⁵Tamba hi aadexorosa yaha ta dheeddosuna maggako ta magge. Hattema esuko nu hammeese>> yeydi e hido.

¹⁶Yenniyani Didimose sunge Toomaaseni[10] beera yecha e erusichoshita <<Nuni esaara hay'ese nu hammeese>> hidi e hido.

¹⁷Yesuusay yaha handi ello wogga Aalazarey mooguttowafay oyddi wonte maaddhi e yecha.

¹⁸Biitaniya katamay Yerusaleemefa haydzi kiilo meetire aallowoko e zaricha.

¹⁹Martaara Maaramiyara usindo na'i haybose maamusese laga Ayhudaxiti yahafa yoodi u yecha.

²⁰Martani Yesuusay yoodo odo siidi mokkese i kesso. Maaramey yenniyaka zawa i yecha.

²¹Martani Yesuusako <<Laaxo! Haya ne yessako nuundo na'i hay'uwadiko e yecha.

²²Maaquwaye baaka hatteni Wontoy abani e maaqo'aykoni ne shi'esa e siinenike erako ta ere>> hidi i hido.

²³Yesuusani <<Neyndo na'i haybowafa dendako e dende>> hidi e hido.

²⁴Martani <<Aallicira wonte uddi axi haybowafa dende wogga e dendenike erako ta ere>> hidi i hido.

²⁵Yesuusani <<Haybowafa denxesaara yeso ingesaaray tambako. Tamba aadexesi hay'o'aykoni en'ako e maaqe.

²⁶Taanna yesesaara tamba aadexesaaray be uddina fetto hay'uwasso. <Ha esa aadeko e zeerdo> hidi hitta ne hine?>> hidi e oycco.

²⁷Isini <<Eewa, Laaxo! <Ha saha gara e yoone> hidi hicho Wonto yele Mesihey nemba maaqenike <Aadeko> hidiko ta hine>> hidi i hido.

²⁸Martay ye esa be zeerdo geede handi beyndo busho Maarame beeko xhinqissi xheydi <<Laaxi yoodiko nemba worgiya yese>> hidi i oto.

²⁹Maaramey ye esa siidi ukkenawo dendi Yesuusako i hando.

³⁰Yesuusay Martay esa motto godowoko haga katamaa gello badi e yecha.

³¹Iso maamusese zawa yecha Ayhudaxiti Maaramey alleydi kessosa be beedo wogga <<Aalazare boossa gara handi yeefesuko iinne>> hidi hissine i geede u kesso.

³²Maaramey Yesuusay yecho godo yoodi esa be beedoniyaka e toke gara undi <<Laaxo, haya ne yessako nuundo na'i hay'uwadiko yecha>> hidi i hido.

³³Yesuusani Maaramey yeekusuniyara isaara yooda Ayhudaxiti yeekusuniyara beedi be gawwaana iitana higilli e maddhundo.

³⁴<<Ay hi mooddo?>> hidi e oycco. Usini <<Laaxo, yoodi beewwa!>> hidi u hido.

³⁵Yesuusani yeetti aafunxe e gusso.

³⁶Hinne Ayhudaxiti <<Beewayte! Waanidi esa e eehichosha>> hidi u hido.

³⁷Usukaafa bidzi bidziti <<Ye bal'a maaqichashe loolusechashi ha axi hay'uwannike mahese danda'uwadiya e yecha?>> hidi u hido.

³⁸Yesuusay sekke assi be gawwaana iitana higilli boossaaka e hando. Boossay malla shuchuna tucuttese googgo e maaqicha[11].

³⁹Yesuusay <<Ye shuche ooxuwayte>> hidi e hido. Ye haydhechashindo busho Martay <<Laaxo! E haydhowafay oyddi wonte maaddhiko e yese, hatte xhinqako e xhinqe>> hidi i hido.

⁴⁰Yesuusani << <Aadexa'ayko Wonto kuxa fuulako ne beene> hidi hido badiya ta yecha?>> hidi e hido.

⁴¹Axitini shuche u oosso. Ye e geede Yesuusay wokke afaa beedi <<Nuwadde! Taase ne siido gisha nemba galatako ta galate.

⁴²Uddi wogga taase ne siinesa erako ta ere. Tamba ne ansonike <Aadeko> hidi u hiyorosa ha ta googe ee'e axitume hissineko yeydi nemba ta shidho>> yeydi e hido.

⁴³Ye esa be shidho geede be kato keddaysi <<Aalazare! Kesuwa!>> hidi e hido.

⁴⁴Haydhecha Aalazarey e garani maa'oy xhaaxhutti yesenike e aafushani fede maa'ona be aykuttesenike boossaafa e kesso. Yesuusani <<Birchuwayte dhaddi hammeese>> hidi e hido.

⁴⁵Maarame maamusese yoodecha Ayhudaxitaafa lagay e matosa beedi esa u aadesso.

⁴⁶Usukaafa bidzi bidziti dhaddi handi Yesuusay hanto hanta Farasaxituko u oto.

⁴⁷Kahinituse afana maagitaara Farasaxitaaray Ayhuda gate aheesita bhikkilli <<Ha axi laga micushe hanta e hante gisha am nu hanto?

⁴⁸Mikke ni dhaba'ayko uddi axuko esa <Mesiheko> hidi aadexesa. Hikketeko Rooma tooraxiti yoodi ni Hayla Zawani ni axitani u bayse>> yeydi u hido.

⁴⁹U giddaafa Qayaafa sunge ye berani kahinituse afana ade maaqesi zeerisineni <<Hinuni hi ere basi baasso.

⁵⁰Ni axi uddi baaneesume bidzi axi laga gisha hay'esi bishesha e maaqenike gaxxho baytuwa?>> hidi e hido.

⁵¹Ha esa yeydi e zeerdosi beekofa maaquwadiko e yecha. Ye bera kahinituse afana ade e maaqusune Yesuusay Ayhudaxiti gisha hay'ese buro gara hinesako kaayo e zeerdo.

⁵²E hay'esi Ayhudasewo e maaddho baane be godowa godowa yese Wonto nayshita bhikkilli bidzi omma mahesuko e maaqicha.

⁵³Ye wontiyafa ayti Yesuusa wodhese u kundo.

⁵⁴Yenniyafa ayti Yesuusay Ayhudaxiti gidda tiddhiyanna hante inxhadhi yaafa saha mela da'aa yese Efreeme katama handi yaha be erusichoshitaara e decco.

⁵⁵Ayhudaxiti Garo Massalay uddhi e yecha. Laga axiti Garo Massalame buro Muse wogake bemba geeshe woga[12] alsese Yerusaleeme be wudefa wudefa u hando.

⁵⁶Usini Wonto Hayla Zawa Yesuusay yoonesa eedhi kakkisine <<Am hinuse e bishe? Haliya Yesuusay ha massala yoota e yoone?>> yeydi wola u oycicha.

⁵⁷Buro kahinituse afana maagitaara Farasaxitaaray Yesuusa aykese e yese godo eresi yesa'ayko usuko ohorosa axituko uddi woosso u garsecha.