Read koorete Yohanise 12 Bible Online

Yohanise 12 - koorete bible

Yohanise 12

¹Ayhuda Garo Massalay kuxuttesuse yoodi izzuppi wontey attesune Yesuusay Biitaniya e hando. Ye katamay haybowafa e densecho Aalazarey essaaka yecho katamako e maaqicha.

²Yahani qamete esuse u kasso. Martani borsase hantiya i yecha. Aalazarey Yesuusaara feditaara qamete miya e yecha.

³Yenniyakani Maaramey feday essa worqutto baa e woomay orje maaqe shitto etti i yoodo. Ye shittoni modhe nardosiyafawo hantuttese bidzi xharmuse ellesako e maaqicha. Isini ye shittona Yesuusa toke i tissho, be qinonani i ucco. Zawaaka shittoy iitana e saydo.

⁴E erusichoshitaafa bidzi Asqorotaxi Yuuday Yesuusa garsi ingarasi

⁵<<Ha shittoy kumana taafutte laga miijheshe zal'utti jhi'ituse abasuwa ingutte dheeddo?>> hidi e hido.

⁶Yuuday ye esa e zeerdosi jhi'ituse aade be gawwaafa higilli maaquwasso. Miijhey essaaka gadutte sigire be aykicho gisha ye sigiriya gadutte miijhiyafa etti lossese kayso be maaqicho gishako.

⁷Yesuusani <<Ha indo dhagguwa! Ta moogo wontesuko tamba i naddho.

⁸Jhi'iti uddi wogga hinunaara wolkoko u yese. Tanimay uddi wogga hinunaara wolko yesuwasso>> yeydi e hido.

⁹Yenniyakani Yesuusay Biitaniya yesesa erdi iitana laga Ayhudaxiti u yoodo. Usini Yesuusa beyesewo e maaddho baane haybowafa e denso Aalazareni beyesuko e maaqicha.

¹⁰Kahinituse afana maagiti Aalazarey haybowafa dendosuna laga Ayhudaxiti uso dhaddi Yesuusa aadexicho gisha Aalazareraysi wodhese u kundo.

¹¹

¹²Sahay wontine Garo Massala kuxese Yerusaleeme yooda laga axiti Yesuusay yoowiya yesesa u siido.

¹³Esa mokkese be kuchiya iille washe ayti u kesso. Be kato keddaysi <<Kuxay maaquwaye Wontose[13], suuse esuse Laaxi sunxuna yoonesuse, Isra'eele kaatuse>> hidi u uwwicha.

¹⁴Yesuusay harre darme degessi e gara e utto. E uttosini

¹⁵<<Neno Xhiyoone katama Yerusaleeme jhasshofuna! Hay, ne kaati harre darme garako utti yoowiyaka e yese>> yeydi e diizuttechonikeko e maaddho.

¹⁶E erusichoshituse ye maaddha abakiti buro gello badi e yecha. Geede Yesuusay kuxa fuulana dhaddi afaa kesso wogga yenniya ye esi e gisha e diizuttonikiyara esuse axiti matonikiyara u gaxxho.

¹⁷Yesuusay Aalazare boossaafa xheydi haybowafa densoniyaka beedecha axiti uddi e gisha zeeriya u yecha.

¹⁸Ye micushe hanta e hantosa be siidecho gisha laga axiti esa mokkese u kesso.

¹⁹Yenniyakani Farasaxiti <<Beewayte! Axiti be uddina esukoko maaddho. Am ha e geede nu hante?>> yeydi wolko u hicha.

²⁰Ye massalaaka Wonto kuxese yoodasitaafa bidzi bidzi Grikaxiti u yecha.

²¹Usini Galila wude yese Beetesayda axe maaqe Filphooseko yoodi <<Nu laaxo! Odde, Yesuusako beyese nu worge>> hidi u shidho.

²²Filphooseni ye esa yoodi Indiraaseko e oto. Indiraasiyara Filphoosiyaray handi Yesuusako ye esa u oto.

²³Yesuusani <<Axi yele hidi hiyuttasi kuxutte woggay elliko yese.

²⁴Hinuse ta ohesi fetto aadeko. Gossa aafey sahaa aylutti hay'e dheeddako be goshewoko e atte. Aylutti be haydho geedema laga aafeko e kaxhe.

²⁵Be yeso eehesi be yesoko e bayse. Ha saha gara be yeso inxha'esimay koolo makkinako e yese.

²⁶Taase hantese worgesi yesa'ayko taara yoowaye. Tani yese godoko esini assi yaha e yese. Taase hantesi yesa'ayko nuwadey esa kuxako e kuxe>> yeydi e hido.

²⁷Yesuusani <<Hatte ta muxhuroy iitanako e hooddese. <Nuwadde, ha essaafa tamba kessuwa!> hidiya ta hiyeni? Yeydi ta hiyoroome esume ta yoodosi ha maddha woggasuko.

²⁸Nuwadde! Yebo, ne sunxi kuxuttoronike mahuwa>> yeydi e hido. Ye e geede afaafa <<Ta sunxi kuxa fuula keengenike beysiko ta yese, hatteni assi beysako ta beyse>> yeydi hine katoy sinto.

²⁹Ye woggaakani yaha yecha axiti ye esa siidi badey <<Googunxuko>> hidi hido, fediti <<Wonto woosaxuko esuko zeerda>> hidi u hido.

³⁰Yesuusani <<Ha katoy e sintosi hinume baaka taame maaquwasso.

³¹Ha sahay yaa'uttesi hatteko, ha sahase afana maaga maaqe Humbayey wude kessi e dafuttesi hatteko.

³²Tani keddaydi ta suxhutte woggaako uddi axe hanke taako ta gooche>> yeydi e hido.

³³Yesuusay yeydi e zeerdosi waakeydi be hay'enike oheko e maaqicha.

³⁴Axitini <<Nu woga fissharowa diizuttesesa nu siidechoshi <Mesihey koolo makkinako e yese> yeydi hinesako e maaqicha. Hinne neni abasuwa <Axi yele hidi hiyuttasi wokke afaa keddaydi suxhutteko esa e worguse> hidi ne hinesi? Ha axi yele hidi ne hinesi oonewa?>> hidi u oycco.

³⁵Yesuusani <<Hatte hinunaara wolko fo'ey e yesesi oddhe woggasewoko. Cenchay hi gara yoonesume buro fo'e e yesune sekke hanke hantuwayte. Cenchaanna sekke hanke hantesi aya be hangesa eruwasso.

³⁶Fo'e nayshe hi maaqoronike fo'ey hinunaara yesune esa aadexuwayte>> yeydi e hido. Yesuusay yeydi ususe be zeerdo geede yahafa handi axiti da'aafa e arto.

³⁷Ayhudaxiti Yesuusay ha e gede micushe hanta u buro e hantakoni esa aadexe u inxhadho.

³⁸Yeydini maaqese e dandadhosi kaayaxi Isayasey <<Laaxo! Ne gisha nu otosa oonena <Aadeko> hidi hida? Wonto osay oonesuna addeydo?>> yeydi ohuttecha katoy aaloronikeko.

³⁹Isayasey assi <<U aafey beewanike e mato, u muxhuro washey siwwanike e mato. Ha e gisha u aafey beewasso, be muxhuronani gaxhuttuwasso, ta loolusorosume hanke maaquttuwasse>> yeydi e hidonike aadexese danda'utto baasso.

⁴⁰

⁴¹Isayasey esume yeydi hiyese e dandadhosi Mesihe kuxa fuula be beedo gishako. Mesihesuko e zeerdo.

⁴²Yeydi maaquwaye baaka laga Ayhudaxiti afana maagiti Yesuusa u aadesso. Farasaxiti Bhikkilo Zawaafa bemba u kesseesume jhasshi be aadessonike addaa zeere u inxhadho.

⁴³U inxhadhosini Wontokofa maaqe kuxame axukofa maaqe kuxa be eeto gishako.

⁴⁴Yesuusani be kato keddaysi <<Tamba aadexesi tambawo e maaddho baanne tamba ansaseni aadexako e aadexe.

⁴⁵Taa beya yesesi tamba ansaseni beyako e yese.

⁴⁶Tamba aadexesi cenchaa e attuwannike tani fo'e maaddhi ha saha gara yoodiko ta yese.

⁴⁷Ha saha gara yese axita loolusese ta yoodosa baaka yaa'ese tani yoodo baasso. Ta ohesa siidi esuna hantuwasi yesa'ayko ye e gara yaa'esi tamba maaquwasso.

⁴⁸Tamba inxha'esi garaara ta otosa ekkuwasi garaara yaa'esako yesa. Ta oto katoko esa aallicira wonte yaa'esa.

⁴⁹Tani taase ta adetona ta zeerdoy baasso. <Yeydi ohuwa, yeydi zeeruwa!> hidi tamba woossasi tamba ansa nuwadeko.

⁵⁰E woose woossoni koolo makkina yesowa aandi ellusenike erako ta ere. Ha e gisha ha ta zeeresa afaase adey taako otonikeko ta zeere>> yeydi e hido.