Read koorete Yohanise 13 Bible Online

Yohanise 13 - koorete bible

Yohanise 13

¹Garo Massalay uddhi e yecha. Yesuusay ha saha garafa dhaddi afaase adeko be hange woggay ellosa erdi be yecho gisha ha saha gara yechashita beese maaddhasita eehiya e yecha, aallicira makkoni uso e eeto.

²Yesuusaara e erusichoshitaaray qamete miya u yecha. Asqorotaxe maaqe Simoone na'i Yuuda muxhurowa garsi Yesuusa e ingoronike Humbayey maxo gelsi e yecha.

³Yesuusani afaase adey esuse uddi basi gara adeto indonikiyara Wontoy esa ansine be yoodinikiyara yeydiwo esuko be hangenikiyara e ericha.

⁴Hinne qamete muuchine dendi be maa'o e gaddo. Dunga etti be elfaa e xhaaxho.

⁵Ye e geede sanqiya waaxe gussi be erusichoshiti toke shohe e gello. Be elfaa xhaaxhuttecha dungana u toke e ucco.

⁶Yesuusani Simoone sunge Phexhrose buro e yoone <<Haha'e, Laaxo! Nembaa ta toke shohesa?>> hidi e hido.

⁷Yesuusani <<Aba hantiya ta yesesa hatte neni eruwannako, buro garama erako ne ere>> hidi e hido.

⁸Phexhroseni <<Neni fetto ta toke shohuwannako>> hidi hido. Yesuusani <<Tani ne toke shohe dheeba'ayko taara wolko bidzeto keenguwannako>> hidi e hido.

⁹Yenniyani Phexhrosey <<Laaxo! Tokewo e maaddho baane yebo ta kucheni ta qinoni shohuwa!>> hidi e hido.

¹⁰Yesuusani <<Shohuttese axi e garay uddina geeshe e maaqe gisha toke baaka feda shohe worgusuwasso. Uddi maaqe dheeddakoni hinuni geeshuko>> yeydi e hido.

¹¹Yesuusay bemba garsi ingesi oone maaqenike be ericho gisha <<Uddi maaqe dheeddakoni hinuni geeshuko>> hidi e hido.

¹²U toke be shoto geede be maa'o maadhi sekke be godowa e utto. Usoni <<Aba hinuse ta hantosa erdoytuwa?

¹³Hinuni <Eruseyo! Nu Laaxo!> hidiko hiine. Tamba yeydi hi xheygesi aadeko. Tani aade hinumba erusesako, aade hi Laaxuko.

¹⁴Yebo, tani hinumba erusesaara hi Laaxaara maaqichine hi toke ta shoto geede hinunini woli toke shoheko e worguse.

¹⁵Tani hinuse matonike yeydiwo hinunini woluse mahoronike hinumba ta hantana beysiko ta yese.

¹⁶Hinuse ta ohesi fetto aadeko. Maalay laaxume garuwasso, woosuttesi wooseesume garuwasso.

¹⁷Ha esa erdi etti hanta gara hi feysshako suuzutteseesitako hi maaqe.

¹⁸Ha zeere ta zeeresi hi uddi gisha maaquwasso. Oone ta xhardonike erako ta ere. Tani xharreese baaka Hayla Fissharowaka <Ta boora muudasuko ta gara iilli denda> yeydi e hidechoshi aaleko e worguse.

¹⁹E aallo geede oone ta maaqenike erdi taa hi aadexoronikeko ha esi maaqeesume e buro hinuse ta ohe.

²⁰Hinuse ta ohesi aadeko. Ta ansosa <Aadeko> hidi ekkesi tambako e ekke, tamba <Aadeko> hidi ekkesi tamba ansaseni efako e ekke>> yeydi e hido.

²¹Yesuusay yeydi be zeerdo geede be gawwaana iitana hooddi <<Hinuse ta ohesi aadeko. Hinukafa bidziko tamba garsi ingesa>> hidi addussi e oto.

²²E erusichoshiti beekafa oonese e zeerdonike ere dheeddi woli aafiya u beedo.

²³Yesuusay eehicho bidzi e erusichoshitaafay Yesuusa da'aaka uttiya e yechoyne

²⁴Simoone sunge Phexhrosey ye esa oonese e zeerdonike e oycorosa qan'i e oto.

²⁵Hinne be nuuna Yesuusa washeko shiishi <<Laaxo, oonena?>> hidi ye axi oycco.

²⁶Yesuusani <<Ha uttaaka boora caddi esa ta baaruxe axuko>> yeydi e hido. Ye e geede boora uttaa caddi Asqorotaxe maaqe Simoone na'i Yuuda e baarusso.

²⁷Yuudani baardo geede Humbayey esuka e gello. Yesuusani Yuudako <<Hantese ne massesesa ukke hantuwa!>> hidi e hido.

²⁸Yesuusay abase zeerdonike yaha tatowa uttecha fedeesituse gello baasso.

²⁹Bidzi bidzi e erusichoshiti Yuuday miijhe aykesa maaqicho gisha <<Ha massalase worguse abako woonguwa!>> oo'oyne <<Jhi'ituse miijhe inguwa!>> yeydi e hidosako uso e bishecha.

³⁰Yuuday ye boora be baardonikewo kessi dhaddi hando. Sahani qama maaqicha.

³¹Yuuday yaafa kessi hando geede Yesuusay <<Hatte axi yele hidi hiyuttasi kuxuttiko e yese. Ye axi yele badena Wontoy kuxuttiko yese.

³²Wontoy e badena kuxutto'ayko beese esa kuxako e kuxe. E kuxesini decuwassho.

³³Ta naysho! Hinunaara wolko laga decuwassho. Tamba worgoko hi worge, Ayhuda afana maagituse <Tani hange godo hinuni hamese danda'uwaytako> yeydi ta zeerdonikeko hatteni hinuse yeydiwo ta zeere.

³⁴<Wola eehuwayte> hidiko hinuse kille woosso ta ohe. Tani hinumba eetonike hinunini wola eehuwayte.

³⁵Wola hi eeha'aykoko ta oge hangeesita hi maaqenikeko axi uddi ere>> yeydi e hido.

³⁶Ye e geede Simoone sunge Phexhrosey Yesuusa <<Laaxo, ay ne hange?>> hidi e oycco. Yesuusani <<Ta hange godo hatte taara hamese danda'uwannako, hanninamma ta geede yootako ne yoone>> hidi e hido.

³⁷Phexhroseni <<Laaxo, ame hatte neera hamese ta danda'uwaane? Fetto neeme hidi hissine tamba garsi ingako ta inge>> hidi e hido.

³⁸Yesuusani <<Neni taame hissine nemba garsi ingaa ne inge? Neese ta ohesi fetto aadeko, lukkoy ollo baanneko haydzi wogga taa <Tani esa eruwasso> hidi ne hine>> hidi e hido.