Read koorete Yohanise 16 Bible Online

Yohanise 16 - koorete bible

Yohanise 16

¹Sekkeni Yesuusay <<Haanxho uddi hinuse zeerese ta dandadhosi hi aadexo garafa undofita hidiko.

²Axiti usaara bidzeto hi keenguwannikeko Bhikkilo Zawitaafa hinumba u kesse. Fetto hinumba wodhesi uddi hade Wonto magguse hanta hantekeysi u maxe woggako yoonesa.

³Haanxho uddi u hantesi nuwade oo'oyne tamba be erdo baa gishako.

⁴Ha esa hinuse ta zeeresi ye esi maaqoroniyaka hinuse ta zeerdosa gaxxhi kille e maaqeesume hi erorosako. Ha e buro haanxho hinuse zeere ta dheeddechoshi hinunaara wolko ta yecho gishako>> yeydi e hido.

⁵Sekkeni Yesuusay <<Hattema tamba ansechaashukoko dhaddi ta hange. Hi giddaafa <Ay ne hange?> hidi tamba oyceshi baasso.

⁶Ha esa ta zeerdo gishama iitanako hi higillese.

⁷Tanimay hinuse ohesi aadeko. Hame ta dheeddako hinumba minxesi hinuko yoowaa gisha ta hamey hinuse gardese modheko. Ta hando geede esani hinukoko ta anxe.

⁸Ayaana Geeshi be yoodo geede cubbo u keengenike, Wonto buro gizo u maaquwannike, u gara e yaa'uttenikeni ha saha gara yese axe e eruse.

⁹Cubbo gisha e erusesi tamba aadexe u dheeddosi ususe cubbo e maaqenikeko.

¹⁰Gizete gisha e erusesi adeko ta hangesaara ha e geede sekke tamba hi beewasaarako.

¹¹Yaa'a gisha e erusesi ha sahase afana maaga maaqe Humbayey yaa'uttosako.

¹²Yebo lagako hinuse ta zeere zeerey yecha, hattema hinuse deexhako e deexhe.

¹³Aade eruse Ayaana Geeshi be yoone woggaaka uddi aadiyako hinumba e durke. Ye esini Ayaana Geeshini beekofa zeeruwasso, be siinesawoko e zeere. Buro gara maaqesako hinuko e ohe.

¹⁴Ta maxowafa etti hinuse e zeere gisha tamba kuxako e kuxe.

¹⁵Nuwadese maaqesi uddina taasuko. <Taase maaqesaafako etti hinuko e zeere> hidi ta hidosi ye e gishako>> yeydi e hido.

¹⁶Sekkeni Yesuusay <<Oddhe wogga geede tamba beewaytako. Yeydiwo oddhe wogga geedeni assi tamba beetako hi beene>> yeydi e hido.

¹⁷E erusichoshitaafa bidzi bidziti <<Ha <Oddhe wogga geede tamba beewaytako. Yeydiwo oddhe wogga geedeni assi tamba beetako hi beene> yeydi e hidosaara <Nuwadekoko dhaddi ta hange> hidi ha nuuse e zeerdosaaray abani?

¹⁸Ha <Oddhe wogga geede> yeydi e hido zeerey abani? E zeerdosi nuuse gello baasso>> yeydi wola sekke hanke u oycicha.

¹⁹Yesuusani bemba oyceshe u hinesa erdi usuko <<Sekke hanke wola ha hi oyceshi <Oddhe wogga geede tamba beewaytako. Yeydiwo oddhe wogga geedeni assi tamba beetako hi beene> yeydi hinuse ta hidosuwani?

²⁰Hinuse ta ohesi fetto aadeko. Hinuni hi yeeke, hi tosshe, ha saha axitimay maggako u magge. Hinuni hi maddhunge, hi higile, hi higilsamay maggaako e arte.

²¹Bidzi indoy i yele woggay elloyna zersona iitanako i maddhunge. Be yello geedema ha saha gara kille yeley bento gisha maggaafa dendasuna buro be maddha botako i bote.

²²Ye esuke hattey hinuse maddhaara higilsaarako. Maaquwaye baaka sekkeko hinunaara ta muhe, yenniyani maggako hi magge, hi magga baysese danda'esi baasso.

²³Ye wonte tamba hi shi'oronike hinumba worgusuwasso. Hinuse ta ohesi fetto aadeko. Nuwadey ta sunxuna hi shi'e abako uddiko hinuse e inge.

²⁴Hatte aallo ta sunxuna abani shidhobaytako. Hi maggay facete keenguwasa maaqoronike Wonto shi'uwayte, efako hi ekke.

²⁵Haanxhi zeere hinuse ta zeerdosi mamakonawoko e maaqicha. Ha e geede sekke nuwade gisha mamakona e maaddho baanne tiddhissi hinuse ta zeere woggako yoonesa.

²⁶Yenniyaka ta sunxunako hi shi'e, tanini <Nuwadeko hi gisha ta shi'e> yeydi hiwwasso.

²⁷Tamba hi eehe gishaara <Wontokofa e yoodo> hidi tamba hi aadexe gishaara nuwadey beese hinumba eehako e eehe.

²⁸Nuwadde da'aafa kessiko ha saha gara ta yoodese, hattema ha saha dhaddiko nuwadeko ta hange>> yeydi e hido.

²⁹E erusichoshiti <<Hay hatte mamakona e maaddho baane tiddhissiko nuuse ne zeerdo.

³⁰Uddi abako ne erenikiyara ooneni ne gara oyche uqusese e worgusuwanikiyara hatte erdunxhiko. Ye esini Wontokofa kessi ne yoodosi <Aadeko> hidi nu eforosa matiko e yese>> yeydi u hido.

³¹Yesuusani <<Hatte <Aadeko> hidi hidiya hi yese?

³²Siwwayte! Hi bidzi bidzina hi godowaanna godowaanna hi budutte woggaara tamba ta goshuna hi dhagge woggaarako yesa, hay elliko e yese. Nuwademay taara yese gisha ta goshewo maaquwasso ta yesesi.

³³Ha esa hinuse ta zeerdosi taara yesine modhete hi degexorosako. Ha saha gara yesine maddha giddaako hi yese. Bidzoni hooddofita, ha saha iisshiko ta yese>> yeydi e hido.