Read koorete Yohanise 17 Bible Online

Yohanise 17 - koorete bible

Yohanise 17

¹Yesuusay yeydi be zeerdo geede wokke afaa beedi biyade e shidho. Shi'isineni <<Nuwadde! Woggay elliko yese. Ne yeley nemba kuxoronike ne yele kuxuwa.

²Ye esini esuse ne indo axituse uddi koolo makkina u yesoronike uddi axi gara esuse adeto indiko ne yese.

³Koolo makkina yesoy ne goshiwoy aade Wonto hidi hiyutte Wonto maaqe neera ne anso taa Yesuusi Kristosaara ereko.

⁴Taase ne indo hanta alsiko ha saha gara nemba ta kusso.

⁵Yoonase nuwadde! Ha sahay meddhutto baane neera wolko yesine ta keengicho kuxa fuula hatteni ne badiya ta gara addusuwa.

⁶Ha saha garafa taako ne indese axituse ne oonunte addussi otiko ta yese. Neese u maaqichoyneko taako ne indese. Usini ne kato kattiko yese.

⁷Taako ne indosi uddi neekofa e maaqenike hatte erako u ere.

⁸Ye esini taako ne indo kato ususe ta otinne ettiko u yese. Tanini neekofa yoodonike modhussi erdi tamba ne ansonike <Aadeko> hidiko u yese.

⁹Tani shi'esi ususuko, ha taako ne indoositi neese u maaqe gisha ususe baaka ha saha gara yese axi gisha shi'uwasso.

¹⁰Taasi be uddina neesuko, neesi be uddina taasuko. Ta kuxa fuulay u badena addeydiko e yese.

¹¹Yoonase tani ha saha gara decuwassho. Usimay ha saha garako u yese. Tani neekoko hamese hine. Hayla maaqe nuwadde! Nini bidzo maaqenike usini bidzo maaqorosa taase ne indese ne sunxi osana uso kakkuwa.

¹²Usaara wolko ta yecho wogga taase ne indecho ne sunxi osana uso kattiko ta yese, fasshiko ta yese. <Baanesa> hidi hiyuttasume feday baaday bidzini baasso. Ye esini e maaddhosi Hayla Fissharowa ohuttechay ittoronikeko.

¹³Hatte tani neeko hamesuko hine.Ta inge maggay usuka kundi yesoronike ha saha gara yesine laga zeereko ususe zeeriya ta yese.

¹⁴Ne kato ususe indiko ta yese. Tani ha sahaafa maaquwannike usini ha sahaafa maaquttuwasso. Ha e gishako aadexuwa ha saha axiti uso inxha'e.

¹⁵Iita maaqe Humbaye garafa uso ne kaforonike baaka ha saha garafa uso are ne kessoronike shi'uwasso.

¹⁶Tani ha sahaafa maaquwannike usini ha sahaafa maaquttuwasso.

¹⁷Aade ogena uso haylonxuwa, aadeni ne katoko.

¹⁸Neni tamba ha saha gara yese axituko ansonikeko tanini uso ha saha gara yese axituko ta anso.

¹⁹Usi aadena haylondi yesesa u maaqoronike tanini u gisha tamba ta haylonxe.

²⁰Nemba ta shi'esi ha u gishawo e maaddho baanne u otosa siidi tamba aadexeesituse uddiko.

²¹Nuwadde, neni taaka tanini neeka yesenike usi be uddina bidzi muxhuronaara bidzi maxonaara u yesoronikeko nemba ta shi'e. Neni tamba ansonike ha saha gara yese axiti <Aadeko> hidi hiyorosa usini assi nuuka u yesoronikeko ta shi'e.

²²Nini bidzo maaqenike usini bidzo maaqorosa taase ne indecho kuxa fuula ususe indiko ta yese.

²³Tani nemba shi'esi tani usukaaka nenini taakaaka maaqenike usini aban shahoy essa baa bidzeto u keemoronikeko. Yeydiwo tamba ne ansonikiyara tamba ne eeto makko usoni ne eetesenikiyara ha saha gara yese axiti erorosako.

²⁴Nuwadde! Ha sahay meddhutto baanne tamba ne eeto gisha taase ne indo kuxa fuula ha taako ne indeseesiti beyoronike tani yese godo taara u yesorosako ta worge.

²⁵Gizo maaqe nuwadde! Ha saha axiti nemba eruwasso. Tanimay nemba erako ere. Ha usini tamba ne ansonike erako u ere.

²⁶Neni tamba eeto eehay usaaka e yesoronikiyara tanini usuka yesoronikiyara nemba u eroronike matiko ta yese, assini mahoko ta mahe>> yeydi e hido.