Read koorete Yohanise 18 Bible Online

Yohanise 18 - koorete bible

Yohanise 18

¹Yesuusay yeydi be shidho geede be erusichoshitaara Qedroone shoore semfa bade fotti yaha mixi tofuttese godowa[14] e gello.

²Yaha Yesuusaara e erusichoshitaaray laga wogga bhikkilutticho gisha Yesuusa garsi ingese hine Yuuday ye godo e ericha.

³Hinne Yuuday kahinituse afana maagitaara Farasaxitaaray anso yebitaara kaati tooraxitaara etti e yoodo. Usini kuraaze, toompe, toora miijhe yeysi be kuchiya aytesesa u maaqicha.

⁴Yesuusani be gara elle abako be ericho gisha usuko uddhi <<Ooni hi worge?>> hidi e oycco.

⁵Usini <<Nazrataxi Yesuusako nu worge>> hidi u hido. Esini <<Hay tambako>> hidi e hido. Esa aassi ingese yooda Yuuday usaara wolko ee'iya e yecha.

⁶Yesuusay <<Hay tambako>> hidi hido wogga sekke be geede gara shidhi sahaa u undo.

⁷Hatteni sekke <<Ooni hi worge?>> hidi e oycco. Usini <<Nazrataxi Yesuusako nu worge>> hidi u hido.

⁸Esini << <Tambako> hidi hinuse otiko ta yese. Yebo, hi worgesi taa e maaddho geede ha usita dhagguwayte, dhaddi hamuttoose>> hidi e hido.

⁹Yeydini hiyese e dandadhosi buro <<Taako ne indesesaafa bidzini ta garafa shahutti baado baasso>> yeydi be hidecho katoy ittoro gishako.

¹⁰Simoone sungicha Phexhroseni satatay e gara yechoyne e koofiyafa kessi kahinituse afana ade maala maaqe ade gara dendi e oshichi bade washe bursi e datto. Ye maalani Malkooseko e sungicha.

¹¹Yesuusani Phexhrosese <<Ne satata sekke e koofiya gelsuwa. Nuwadey ta gara e yooworonike matese deexho maddha efe taa worgusuwaye?>> hidi e hido.

¹²Ye e geede kaati tooraxitini u afana maagani Ayhuda yebitini Yesuusa ayti u tutto.

¹³Burona Haannako u aando. Haannay ye bera kahinituse afana ade maaqe Qayaafa machiyadeko e maaqicha.

¹⁴Ye Qayaafako buro <<Bidzi axi laga gisha hay'esi bisheshako>> yeydi Ayhuda afana maagituse be maxo zeerdechashi.

¹⁵Simoone Phexhrosiyara Yesuusay erusicho bidzi fedesaaray Yesuusa geede u aadho. Ye feday kahinituse afana adiyara wola eresa be maaqicho gisha Yesuusaara wolko kahinituse afana ade qeyshi gidda e gello.

¹⁶Phexhrosemay wudena qeyshi gasa geede ee'iya e yecha. Ye eruttesesi sumaa kakkichanniyo hanke maaddhi zeerussi Phexhrosey geloronike e mato.

¹⁷Sumaa kakkichanni Phexhrose <<Neni ha axi erusichoshitaafa bidzo maaquwannuwa?>> hidi i oycco. Phexhroseni <<Oo'o, tani usaafa maaquwasso>> hidi e aacunto.

¹⁸Yenniya toyyay toyyicho gisha maalitaara yebitaaray tama eessi eedhi u kashicha. Phexhroseni usaara wolko eedhi kashiya e yecha.

¹⁹Yenniyani kahinituse afana adey Yesuusa esaara yeseesiti gishaara erusiya e yese era gishaara e oycco.

²⁰Yesuusani <<Uddi axi buro tiddhiyanna otiko ta yese. Ayhudaxiti bhikkilutte godo ye esini u Bhikkilo Zawittaani maaqqe Wonto Hayla Zawaani uddi wogga uso erusiko ta yecha, aachiyaanna bidzoni ta erussoy baasso.

²¹Hinne abasuwa tamba ne oyce? Usuko ta zeerusune siidasita oycuwa. Ta zeerdo zeere usi erako u ere>> hidi e hido.

²²Yesuusay yeydi zeerdo geede yaha ee'iya yecha yebitaafa bidzi <<Kahinituse afana adesuwa yeysi sekke ne mahaane?>> yeydi hissine e anqaa e badho.

²³Yesuusani <<Iita ta zeerdesso <Ha esako iita ne zeerdo> hidi hiwwa. Modhe ta zeerdesso hinne ame ta anqaa ne baqe?>> hidi e hido.

²⁴Ye e geede Haannay Yesuusay tufutti yesenikewo kahinituse afana ade maaqe Qayaafako e anso.

²⁵Yenniya Simoone Phexhrosey eedhi tamaa e kashicha. Fede axitini <<Neni ha esaara yechashe maaquwannu?>> hidi u oycco. Esini <<Oo'o, tani esaara yechashe maaquwasso>> hidi e aacunto.

²⁶Phexhrosey e washe bursechoshi igina maaqe kahinituse afana ade maalitaafa bidzi <<Mixiti tofutte godowa esaara wolko ne yesune niya beedo baanbuwa?>> hidi e hido.

²⁷Phexhroseni sekke assi burokewo aacunto. Yenniyaka lukkali ollo.

²⁸Ayhudaxiti Qayaafasofa Yesuusa etti Rooma afana maagaso qeyshi giddaa u hando. Yenniyani sahay haga wontecha. Ayhudaxitini Garo Massalaaka miyese be hicho gisha <<Tuneydofunxhi!>> hidi ye maaga qeyshi giddaa gele u inxhadho.

²⁹Hinne Philaxhosey usuko wude kessi <<Ha axi gara hi uquse luufoy am e maaqicha?>> hidi e oycco.

³⁰Usini <<Ha axi iita hante dheeddako ayti ne buro uqusuwadiko nu yecha>> hidi u hido.

³¹Philaxhoseni <<Hinuni hinuse etti handi hi wogake e gara yaa'uwayte!>> hidi hido. Ayhudaxitini afana maagitini <<Nunimay oone garani e hay'oronike nu yaa'uwannike tucuttiko nu yese>> hidi u hido.

³²Yeydini e maaddhosi Yesuusay waanidi be hay'enike zeerdecho katoy aaloronikeko.

³³Philaxhosey sekke maaddhi qeyshi giddaa gelli Yesuusa hanke beeko xheydi <<Neni Ayhuda kaatuwa?>> hidi e oycco.

³⁴Esini <<Nemba ha esa neekofa taa oyceshani axuwara ta gisha neeko ota?>> hidi e hido.

³⁵Philaxhoseni <<Hinne tani Ayhudaxuwa? Nemba taako garsi indasi ne Ayhudaxitaara kahinituse afana maagitaarako. Am ne hantecha?>> hidi e oycco.

³⁶Yesuusani sekke esuse <<Ta kaatetey ha saha kaatete maaquwasso, ha saha kaatete e maaddhakoma Ayhudaxiti tamba aykuwannikeko ta yebiti usaara darguttaane. Hattema ta kaatetey ha sahase maaquwasso>> hidi e hido.

³⁷Philaxhoseni <<Hinne neni kaatu?>> hidi e hido. Esini <<Tani kaate maaqenike ne zeerdosi aadeko. Ta yeluttosaara ha saha gara ta yoodosaaray aadey aba maaqenike ohesuko. Aade eeheesiti uddiko ta ohesa u siine>> yeydi e hido.

³⁸Philaxhoseni <<Aadey am?>> hidi e oycco. Ye e geede assiwo Ayhudaxituko kessi <<E gara bidzoni bayso degesso baasso.

³⁹Bidzi tufaxe hi Garo Massalaanna hinuse ta birchichonike lossiko hi yecha. Ha e gisha ha Ayhuda kaate birshi ta daforosa eeha hi eehe?>> hidi e oycco.

⁴⁰Usini be kato keddaysi <<Oo'o, oo'o! Esa maaquwasso, Barbaane birchuwa!>> hidi u hido. Barbaaney fuuloko e maaqicha.