Read koorete Yohanise 19 Bible Online

Yohanise 19 - koorete bible

Yohanise 19

¹Ye e geede Philaxhosey Yesuusa etti durusso.

²Tooraxitini anke xhaaxhi e qinowa u gaddo, zo'o maa'oni u mayso.

³Esuko uddhi <<Ayhuda kaato, sawoyte, modheyte!>> hidi hissine e anqani u baqicha.

⁴Philaxhoseni sekke assi wude kessi Ayhudaxituko <<E gara bidzi baysoni ta dheeddosa esuna hi eroronike hatte esa hinukoko wude ta kesse>> hidi e hido.

⁵Hinne Yesuusay ankey e qinowa gadutti zo'o maa'o maaddhi be yesenike wude e kesso. Philaxhoseni <<Hay beewayte!>> hidi e hido.

⁶Kahinituse afana maagitaara yebitaaray esa be beedoniya <<Suxhuwa! Suxhuwa!>> hidi u koysso. Philaxhosey <<Tani ta badena e gara bidzi baysoni ta beedoy baasso. Eeha'ayko hinuse aandi suxhuwayte>> hidi e hido.

⁷<<Nuni woga keemako nu keenge. <Wonto yeleko tani> yeydi hinesa ye wogay eehuwasso. Ha e gisha ha axi hay'uwaye!>> yeydi u hido.

⁸Philaxhosey yeydi u hidosa be siido geede burome garsi iitana e jhassho.

⁹Qeyshi giddaa assi hanke gelli <<Doo! Neni ayafani?>> hidi Yesuusa e oycco. Esini hanke esuse bidzoni mahe e dheeddo.

¹⁰Hinne Philaxhosey <<Taara zeerashuna? Tani nemba birchesheni nemba suxheseni adeto ta keengesa eruwanu?>> hidi e hido.

¹¹Yesuusani <<Wontokofa adetoy neese ingutte dheeddako ta gara aba adeteni fetto keenguwadiko ne yecha. Ne kuchiya tamba garsi inda axi neeme gardese cubboko e keenge>> hidi e hido.

¹²Philaxhosey Yesuusay zeerdosa be siido woggaa esa birshi dafese e wordo. Ayhudaxiti <<Ha axe birchesha ne maaqo'ayketese Rooma kaatuse[15] u bade maaquwannako. Ye esini bemba kaate mahesi Rooma kaatuse e iilaxuko>> yeydi hissine u koysso.

¹³Philaxhoseni ye esa be siido geede Yesuusa wude e kesso. Shuchi Loche sunge godo[16] yaa'ese e utto. Ye godoni Ibrayste nuunana Gabatako e sungicha.

¹⁴Ye wontay Garo Massalase Ayhudaxiti naqutte wonteko e maaqicha. Wontaafa izzuppi saate e elle wogga Philaxhosey Ayhudaxita <<Hay hi kaati!>> hidi e hido.

¹⁵Usini <<Sena ooxuwa, ooxuwa! Suxhuwa!>> hidi u koysso. Philaxhoseni <<Hi kaate suxhaa ta suxhe?>> hidi e oycco. Kahinituse afana maagiti <<Rooma kaate baaka fede kaate nuni keenguwanxhiko>> hidi u hido.

¹⁶Yenniyani Philaxhosey Yesuusay suxhuttorosa usuko garsi e indo. Usini ayti etti dhaddi u hando.

¹⁷Ye e geede Yesuusay be suxi mixe beesewo iddi <<Qino Qooce[17]>> yeydi hiyutte godo e kesso. Ye godoy Ibrayste nuunana Golgotako e sungicha.

¹⁸Yahani esa u suxxho. Esaara wolkoni lam'i axiti se bade ha bade hissi Yesuusa giddaa gaddi u suxxho.

¹⁹Philaxhoseni <<Nazrataxi Yesuusa Ayhuda kaate>> yeydi hine diizuttesesa esuna erorosa e suxhutto mixi gara e gaduttoronike e mato.

²⁰Esuna e diizuttosini Ibrayste nuunana, Grike nuunana, Rooma nuunanako e maaqicha. Yesuusay suxhuttosi katamase ukke e maaqicho gisha laga Ayhudaxiti ye esa u zeerussicha.

²¹Kahinituse afana maagiti Philaxhose <<Neni <Ayhuda kaatuko> hissine diizzofuna, ne diizorosi <Esi <<Tani Ayhuda kaatuko>> hidiko e hido> hidi hinesa diizuwa>> hidi u hido.

²²Philaxhoseni <<Yey, ta diizosa diizziko ta yese>> hidi e hido.

²³Tooraxiti Yesuusa be suxxho geede e maa'o etti wol genno genno e elloronike oyddi godo u shato. Essaafa e gara kumena maa'uttesi e yecha. Ye esini keliyafa ayti qicamilina bidzowo maaddhi meddhuttesesa e maaqicha.

²⁴Hinne <<Ha maa'o feedhuwanxhiko, oone e ellenike hixha olliko nu effe>> hidi wolko u kundo. Ye esuna <<Ta maa'o woluse u shato, ta maa'o efese hixha e gara u ollo>> yeydi Hayla Fissharowa ohuttecha kaayoy itto. Tooraxiti matosi ye esako.

²⁵Yesuusay suxhutti yesune e da'aa esindoy, esindoyndo bushoy, Qelepha macho maaqe Maaramey, Magdoolaxhi Maaramey hidi ee'iya u yecha.

²⁶Yenniyani Yesuusay esindowara e eehicho bidzi e erusichoshaaray yaha ee'iya u yesesa beedi beyndo <<Nuunde! Beewwa, esa ne yele mahuwa!>> yeydi e hido.

²⁷Ye be erusichoshuko <<Beewwa, iso neyndo mahuwa!>> hidi e hido. Yenniyafa ayti be zawa etti handi e gaddo.

²⁸Ye e geede Yesuusay uddi abakoy ittosa be erdo geede Hayla Fissharowa diizuttecha katoy aalorosa <<Waaxuko ta sazzo>> hidi e hido.

²⁹Yahani dhooqo abakoy essaaka kundese otay e yecha. Hinne yaha yecha axiti huxha bissheshesha etti ye dhooqowaaka gelsi <<Hisoophe>> hidi hisso mixi qinowa gaddi e nuunaa u uqusso.

³⁰Yesuusani ye dhooqo laaqiyo be xhunxho geede <<Uddi abakoy ittose>> hidi e hido. Be qino ullaysi kaxe e kesso.

³¹Ye e geede Ayhuda afana maagiti ye suxhutta geriti ahay suxi mixi gara e yeseeme u fashane meyssi u hoxoronike Philaxhose u shidho. Esume u shidhosini ye wontey sanbatase u naqutticho wonta e maaqicho gishaara sanbataafa ye sanbatay fetto fede sanbatitume keddaydesesa e maaqicho gishaarako.

³²Hinne tooraxiti handi Yesuusaara suxhuttecha geriti fashane u meysso.

³³Yesuusako u uddhoniya burona e haydhesesa beedi e fashane meyse u dhaddo.

³⁴Meyse dhabuttuwaye baa toorasaafa bidzi e milliyanna toorana e caddo. Ye e caddonikewo suuxaara waaxaaray kesso.

³⁵Hinuni <<Aadeko>> hidi hiyorosa ye esa beeda axi ato maaddhi zeerdiko e yese. E atoni aadeko, aade be zeerenike beese erako e ere.

³⁶Yeydini e maaddhosi Hayla Fissharowa <<E meqetiyafa bidzini me'uwasso>> hidi ohuttechashi ittorosako.

³⁷Fede godo assi <<Ye be caddechosha beetako u beene>> yeydi hinesi yecho gishako.

³⁸Ye e geede bidzi Yoosefe sunge Armatiyase katamaxi Ayhuda afana maagita be jhassho gisha aachiyaanna Yesuusa bade maaqichashi Philaxhoseko gelli Yesuusa aha e ingete etti mooggese e oycco. Philaxhoseni <<Ekkuwa!>> hidi hido. Hinne Yoosefey handi aha etto.

³⁹Ha esume buro bidzi qama Yesuusako yoodecha Niqodomosey haydzi tamma oyddi kiilo[18] elle karawaara col'e cichaaray wolko worquttese shitto etti e yoodo.

⁴⁰Usini aha etti hade Ayhudaxiti aha aykichonike ayti shittona tisshi talbaafa hantuttese maa'ona u acco.

⁴¹Yesuusay suxhuttosi da'aa abakoy tofutte godoy e yecha. Yaha ooneni essaaka moogutti eruwadecho kille boossay e aykuttecha.

⁴²Ayhudaxiti sanbatase naqutticho wonta e maaqe gishaara ye boossay ukke maaqicho gishaara Yesuusa aha oodi boossa gelsi u woyso[19].