Read koorete Yohanise 2 Bible Online

Yohanise 2 - koorete bible

Yohanise 2

¹Haysso wonte Galila wudiya yese Qaana katamaaka kuulay e yecha. Yesuusayndoy yaha i yecha.

²Yesuusaara e erusichoshitaarani kuulaaka xheygutti yoodi yaha u yecha.

³Ye kuulaaka u yesune weyne daanay itto. Hinne Yesuusayndoy Yesuusako <<Hay weyne daanay ittosso>> hidi i hido.

⁴Yesuusani <<Nuunde, aba hantuwaydini ne hine? Ta woggay ello badiko e yese>> hidi e hido.

⁵Esindoni yenniya ye kuula zawa hantichaashituko <<Yesuusay ohenike uddi hantuwayte!>> hidi i hido.

⁶Ayhudaxiti bemba geeshe woga u keengicho gisha yahani ususe izzuppi shuchi dimboy yecho. Ye dimboni be bidzi bidzina lam'i oo'oyne haydzi gombo waaxe aykesa e maaqicha.

⁷Yesuusani ye zawa hantiya yechashita <<Ha dimbita waaxe kunxuwayte!>> yeydi e hido. Usini ye dimbita e nuuna aallo u kunso.

⁸Ye e geede Yesuusay uso <<Yoonase shon'i kuulase ade maaqeesuse inguwayte>> hidi e hido. Usini shon'i u indo.

⁹Ye kuulaadeni waaxe maaqichashi weyne daanaaka artosa uudhi be beedo wogga ayafa e yoodosa erdo baasso. Yenniyani waaxe shon'asitimay erako u ericha. Hinne ye kuulaadey ekke na'e[1] beeko xheydi

¹⁰<<Axiti be uddina borsase burona e uqusesi sooqe weyne daanako, u goojho geedeko sooquwasa e uquse. Nenimay hatte aallo sooqe weyne daana ame inge ne dheeddecha?>> yeydi e hido.

¹¹Yesuusani be hanto micushe hantitume acha micushe hanta e hantosi Galila wudiyaka yese Qaana katamaakako e maaqicha. Yeysi be hantosuna be kuxa fuula e addusine e erusichoshiti esa aadesso.

¹²Ye e geede Yesuusay beyndowara beyndo na'axhiyara be erusichoshitaara yekke Qifirnahoome katama e hando. Yaakani oddhe wonta aallo u decco.

¹³Yesuusay Ayhuda Garo Massalay uddhecho gisha wokke Yerusaleeme e yoodo.

¹⁴Wonto Hayla Zawa qeyshi giddaaka maydaxhe, dorita, woyyitaaraysi ye usita zal'eesiti zal'iyakaara birre arxeesiti arxiyakaara u yesune e beedo.

¹⁵Yenniyani gane wol gara zuddhi jhiraafe naddhi doritani maydaxhitani keemo uddi Wonto Hayla Zawa karaafa[2] goodi e kesso. U arxicho miijheni e buddo. E gara gaddi u arxicho xharabheezani e gufunso.

¹⁶Woyya zal'icha axitani <<Ha esa hayafa ooxuwayte! Nuwade zawa gadhesa matofita>> yeydi e hido.

¹⁷Yenniyaka e erusichoshiti zingale fissharowa <<Ne zawase ta keenge modhe kardoy hade tamakeko ta gawwo e muune>> yeydi e diizuttechosha u gaxxho.

¹⁸Ye e geede Ayhudaxituse afana maagiti <<Ha esa yeysi mahese adeto ne keengesa esuna nu erorosa aba micushe abakoni numba ne beyse?>> hidi u oycco.

¹⁹Yesuusani <<Ha Wonto Hayla Zawa woddusuwayte, tani sekke matiko haydzi wontena ta keexhe>> hidi e hido.

²⁰Usini <<Ha Wonto Hayla Zaway keexhuttisine oyddi tamma izzuppi berako e alsecha. Hine neni <Haydzi wontenako sekke mati ta keexhe> hidi ne hinesi waakidina?>> hidi u oycco.

²¹Yesuusamay <<Wonto Hayla Zawa>> hidi e zeerdosi be gishako e maaqicha.

²²Yesuusay haybowafa dendosi geede e erusichoshiti ye e zeerdechosha u gaxxho. Ye e gisha Hayla Fissharowa zeeruttechashaara Yesuusay zeerdosaara <<Aadeko>> hidi u hido.

²³Yesuusay Yerusaleeme Garo Massalaaka yesune e mato micushe abako beedi laga axiti esa aadesso.

²⁴Yesuusamay axita e uddina be ericho gisha be maxo uddi be muxhurowafa kessi ususe oto baasso.

²⁵Axi muxhurowa yese base be ericho gisha ooneni axi gisha esuko ohorosa worgusuwadiko e yecha.