Read koorete Yohanise 21 Bible Online

Yohanise 21 - koorete bible

Yohanise 21

¹Ye e geede Yesuusay be erusichoshituse Xhibiriyadoose bagade[21] da'aa assi bemba e beyso. Bemba e beysosini ha esukeko.

²Simoone sungicha Phexhrosey, Didimose sungicha Toomaasey, Galila Qaana katamaxe maaqe Natina'eeley, Zabdoose na'axhiyara fede lam'i e erusichoshitaaray wolko u yecha.

³Simoone sungicha Phexhrosey <<Tani gulxhe aykiyako dhaddi hange>> hidi e hido. Usini <<Neerako nunini hange>> hidi hissine yahafa kessi handi zabhaaka u gello. Ye qama bidzoni gulxhe ayto badi u adho.

⁴Sahay wonto geede Yesuusay erusichoshiti bagade nuuna e ee'usune beedi esa u hallo.

⁵Yesuusani <<Gere! Hi aytese gulxhey yesa yese?>> hidi e oycco. Usini <<Bidzini baasso>> hidi u hido.

⁶Esini <<Maarabe zabhase oshichi badena dakkuwayte, aykoko hi ayke>> hidi e hinne bagadiya maarabe u datto. Laga gulxhe e aytese gisha maarabe goosshi kessey uso iissho.

⁷Yesuusay eehicho e erusichoshi Simoone sungicha Phexhroseko <<Laaxema!>> hidi e hido. Phexhroseni ye esa be siidonikewo be garafa afana maa'o be kessecho gisha sekke be maa'o maadhi Yesuusako yoowese bagadiya doondi e gello.

⁸Fede e erusichoshiti bidzi xhiixi meetire ellesawo sahame zardi be yecho gisha gulxhey essaaka kundese maarabe zabhana goosshi u yoodo.

⁹Bagade nuuna yoodi zabhaafa be kesso geede booraara tama aa'a gara yese gulxhiyara u beedo.

¹⁰Yesuusani <<Hatte hi ayto gulxhiyafa oowayte!>> hidi hido.

¹¹Hinne Simoone sungicha Phexhrosey zabhaaka e gello. Bidzi xhiixe ichichi tamma haydze malla malla gulxhena kundese maarabe waassaafa goosshi bade gara e kesso. Maarabey haanxhi gulxhe aytakoni feedhutto badiko e yecha.

¹²Yesuusani <<Yoodi muuwayte!>> hidi uso hido. Laaxi Yesuusa e maaqenike be erdecho gisha usaafa ooneni <<Neni oonew?>> hidi esa oyceshe naassay bidzini badiko yecha.

¹³Esini hanke uddhi boora etti u miyorosa ususe e indo. Yeydiwo gulxheni e indo.

¹⁴Haybowafa e dendo geede e erusichoshiti esa u beesune ha esi haysso woggako e maaqicha.

¹⁵Kaxa u muudo geede Yesuusay Simoone sungicha Phexhroseko <<Yoona yele Simoone! Ha usume garsi taa eeha ne eehe?>> hidi e oycco. Esini <<Eewa Laaxo! Nemba ta eehenike neni erako ere>> hidi e hido. Yesuusani <<Ta qalincha muussuwa!>> hidi e hido.

¹⁶Lakkunxo assi <<Yoona yele Simoone! Taa eeha ne eehe?>> hidi e oycco. Phexhroseni <<Eewa Laaxo, nemba ta eehenike neni erako ere>> hidi e hido. Esini <<Ta dorita yeenguwa>> hidi e hido.

¹⁷Haysso assi <<Yoona yele Simoone! Tamba eeha ne eehe?>> hidi e oycco. Haysso wogga <<Tamba eehaa ne eehe?>> hidi e hidosa Phexhrosey higilli <<Laaxo! Neni uddi basuko ne ere. Nemba ta eehenikeni erako ne ere>> hidi e hido. Yesuusani <<Ta dorita muussuwa!

¹⁸Neese ta ohesi aadeko. Mulla yesine neese ne maa'o maadhi ne eeto wude ne hangicha. Ne cindo geedema ne kuche neni beyse, fede axi nemba maysi ne worguwa wudeni etti e hange>> yeydi e hido.

¹⁹Ha esa esume e zeerdosini Phexhrosey abakeydi haydhi Wonto e kuxusesa ohesuko. Ye e geedeni Phexhroseko <<Taara yoowwa!>> hidi e hido

²⁰Phexhroseni be geede maaddhi Yesuusay eehicho bidzi e erusichoshi u geede yoosune e beedo. Ye esini buro ye qamete u muusune Yesuusa washeko uddhi <<Nemba garsi ingesi oonewa?>> hidi hissine oycechashuko e maaqicha.

²¹Phexhrosey ye axeni beedi Yesuusako <<Laaxo, ha axichi?>> hidi e oycco.

²²Yesuusani <<Tani <Ta yoone aallo yesuwaye> hidi esa ta hidako am nemba essaaka gelsesa? Neni neese taara yoowwa>> hidi e hido.

²³Ye e gisha aadexeesiti giddaaka <<Ha axi hay'uwasso>> yeydi hine odoy e budutto. Yesuusamay <<Tani <Ta yoone aallo yesuwaye> hidi esa ta hidako am nemba essaaka gelsesa?>> hidi e hidosa baaka <<Hay'uwasso>> hidi hido baasso.

²⁴Haanxhi zeere beedi otasaara ha esita diizesaaray ye e erusichoshako. E otosini aade maaqenike erako nu ere.

²⁵Yesuusay hanto laga abakitako assiwo yesa. Taase e bishenike e hanto hantiti uddi e bidzi bidzina diizuttesesa maaddhako ye diizutta fissharo beese ha sahay aykese danda'uwadiko e yecha.