Read koorete Yohanise 3 Bible Online

Yohanise 3 - koorete bible

Yohanise 3

¹Niqodomose sunge bidzi adey e yecha. Esini Farasaxitaafa maaqisine Ayhudaxituse afana maagaafa bidzo e maaqicha.

²Bidzi qama Yesuusako yoodi <<Laaxo, Wontoy esaara yesesa baaka hatte ha neni hantiya yese micushe hanta ooneni hantese danda'uwasso. Ha e gisha Wontokofa yooda laaxe ne maaqenike erako nu ere>> yeydi e hido.

³Yesuusani <<Neese ta ohesi fetto aadeko, axi sekke be yelutto baasa Wonto kaatetiya gelese danda'uwasso>> yeydi e hido.

⁴Niqodomoseni <<Hinne axi be cindo geede waydi yeluttese e danda'e? Sekke assi beyndo gawwaa gelli yeluttese danda'aa e danda'e?>> hidi e oycco.

⁵Yesuusani <<Neese ta ohesi fetto aadeko. Axi waaxukofaara Ayaana Geeshukofaara be yelutto baasa Wonto kaatetiya gelese danda'uwasso.

⁶Axukofa yeluttasi axuko. Ayaanakofa yeluttasi ayaanako.

⁷Ha e gisha <Sekke yelutteko hinumba e worguse> hidi ta zeerdoosuna micofuna.

⁸Agexi be worge badeko e agete, e katoni ne siine. Siwwa baaka an badefa e yoodonikiyara an bade e hangenikiyara eruwannako. Ayaanakofa yeluttasi uddi ye esako e bishe>> hidi e mato.

⁹Niqodomosey <<Ha esi waydi e maaqe?>> hidi e oycco.

¹⁰Yesuusani <<Neni Isra'eelaxita erusesa maaqisine ha esa eruwanuwa?

¹¹Neese ta ohesi fetto aadeko. Nu eresako nu zeere, nu beedosako nu ateyne, hinunimay nu ato aadeko hissine ettobaytako.

¹²Ha saha zeere ta zeerusune <Aadeko> hidi hiye hi dheeddo geede afa zeere ta zeerusune waanidi <Aadeko e zeerdo> hidi hiyese hi danda'aane?

¹³Afaafa hoddha axi yele hidi hiyuttesa baaka afaaka kessasi ooneni baasso.

¹⁴Axi yele hidi hiyuttesa aadexesi be uddina koolo makkina yeso degexoronike Musey saha melaaka shooshe keddaysi suxhonike yeydiwo ye axi yeleni keddaydi suxhutteko esa e worguse.

¹⁶Wontoy bidzi be yele be ingoro makko ha saha gara yese axita keddaysi e eeto. Ye e gisha e yele aadexesi uddina koolo makkina yeso u degexesa baaka bayuttuwasso.

¹⁷Wontoy be yele ha saha gara e ansosi ha saha gara yese axiti e yelena looloronike baaka ha saha gara yaa'ese maaquwasso.

¹⁸Esa aadessasi gara yaa'uttuwasso. E yele aadesso baasimay bidzo maaqe Wonto yele be aadesso baa gisha olowoko e yaa'uttese.

¹⁹Fo'ey ha saha gara e yoodo. Axiti u hantay iita maaqicho gisha fo'eme cencha u eeto. Ye esini ususe yaa'ako.

²⁰Iita hanta hantesi be uddina fo'eko e inxha'e, e hanta iitay tiddhiya keseesume fo'iyaka yoowasso.

²¹Aade hantesimay e hante hantay Wonto maxoke hantuttesesa e maaqenike e addeyorosako fo'iyaka e yoone>> yeydi e mato.

²²Ye e geede Yesuusay be erusichoshitaara wolko dhaddi Yuuda wude handi usaara oddhe woggase yaha e decco. Axitani e xhamadho.

²³Yohaniseni assi ye wogga Saaleme ukke yese Henone sunge godo waaxi lagay yecho gisha axe e xhamaqicha. Axitini xhamaquttese u yoocha.

²⁴Ha esi yeydi e maaddhosi Yohanisey tufuttosume buroko e maaqicha.

²⁵Yohanisey erusichoshitaafa bidzi bidzitaara bidzi Ayhudaxaaray bemba geeshe woga gisha wolko berse u gello.

²⁶Yohaniseko hanke e erusichoshiti uddhi <<Laaxo! Yordanose waaxi semfa neera wolko yechashi neni esuse atteydechoshi ye esi xhamaqiyako yese. Axitini uddi esuko hamiyako yese>> yeydi u hido.

²⁷Yohaniseni <<Ooneni Wontokofa e ingutto baasa abani etti hantese danda'uwasso.

²⁸<Mesiheme buro ta anxuttosa baaka tani esa maaquwasso> yeydi hinuko ta zeeredechonike hinuni taase atoko.

²⁹Gele bushoy ekkesukoko i hange. Gaanamay ye ekke na'i kato e da'aa eedhi be siineniyaka keddaysiko e magge. Ye maggesi hatte taa maaqusune bidzi muxhurona keddaysiko ta magge.

³⁰Esi kedda kedda hikkete tanimay ulla ulla hiyorosako e worguse.

³¹Wonafa yoonesi uddime afanako. Ha sahaafa maaqesi ha sahako e bishe, ha saha zeereko e zeere. Afaafa yoonesi uddime afanako.

³²Esi be siidosaara be beedosaara e otineko, e otosa siidi ekkesi dheeddo.

³³E otosa <Aadeko> hidi hissine ekkesimay Wontoy aadaxe maaqenikeko e adduse.

³⁴Wontoy be Ayaana esuse lagussi e inge gisha e ansosi Wonto katoko e ohe.

³⁵Adey be yele eehako e eehe. Uddi abako e kuchiyako e indese.

³⁶E yele aadexesi koolo makkinako e yese. E yelese woosuttuwasimay Wontoy e gara huulesa baaka yesowa geluwasso>> yeydi e hido.