Read koorete Yohanise 4 Bible Online

Yohanise 4 - koorete bible

Yohanise 4

¹Ye woggaaka Farasaxiti Yesuusay Yohaniseme garsi be gara axe mahiya e yesenikiyara e xhamaqenikiyara u siido.

²Maaquwaye baaka e erusichoshiti xhamaqichosha baaka esi beese xhamaquwadiko yecha.

³Yesuusani ye esa Farasaxiti siidosa be erdo geede Yuuda wude dhaddi sekke Galila hamese e dendo.

⁴Galila aange ogey Samariya wudiyana garxesa e maaqicho gisha yeyna garey worgusesa e maaddho.

⁵Hinne Sikaare sunge Samariya katamaka e yoodo. Ye katamay Yayqoobey be na'i Yoosefese indecho sahase e da'aako e maaqicha.

⁶Yahani Yayqoobey bootti waaxe essaafa shonqicho e hoboloy yecha. Yesuusay oge be yoodo gisha gatti yaha e utto. Yenniyani sahay wontaafa izzuppi saate ellesa e maaqicha.

⁷Hinne bidzi ye wude indoy waaxe shonqese yaha i yoodo. Yesuusani iso <<Waaxe taase inguwa ta ussheeshe>> hidi e hido.

⁸Ye wogani e erusichoshiti kaxa woomese katamaaka dhaddi u handecha.

⁹Ayhudaxiti Samaraxitaara uddi ogena wola muhuwasa u maaqicho gisha ye indoni Yesuusako <<Neni Ayhudaxe maaqisine waydiwu Samaraxhiyo maaqe taakofa waaxe usheshe ne ga'e?>> hidi i hido.

¹⁰Yesuusay <<Wontoy aba bisha ingo neese ingesaara <Waaxe taa usshuwa!> hidi hinesi oone maaqesaara erdako esa ne ga'esako yecha, hidakoko esi neese koolona yeso inge waaxe ingaane>> hidi e hido.

¹¹Isini <<Laaxo, waaxe esuna ne shonqe miijhe hay keenguwannako, waaxini yedena zarako hobolowa yese. Hinne yeso inge waaxe ayafani ne degexe?

¹²Ha waaxi hobolo nuuse inda nuu yella ade Yayqoobeme neni garuwa gare? Esini e nayshini e keemoni ha hobolowafa waaxe usshiko yecha>> hidi i hido.

¹³Yesuusani <<Ha waassaafa usheshi be uddina sekkeko waaxe e sazze.

¹⁴Tani inge waaxe usheshimay koolo makkina sazzuwasso. Ye esini esukofa koolo makkina yesoy fol'e tultoko e maaqe>> yeydi e hido.

¹⁵Ye indoni <<Laaxo, sekke waaxe ta sazzeesume hayani shonqiya ta yooneesume ha ne ohe waaxe odde taase inguwa!>> yeydi i hido.

¹⁶Yesuusani <<Handi neeso ade etti yoowwa!>> hidi e hido.

¹⁷Isini <<Tani ade keenguwasso>> hidi i mato. Yenniyani Yesuusay << <Tani ade keenguwasso> hidi ne hidosi aadeko.

¹⁸Ichichi adiyaxhuko ne gellecha, hatte neera wolko yesesi eruttese ne ade maaquwasso. Ye e gisha aadeko ne zeerdo>> hidi e hido.

¹⁹Ye indoni <<Laaxo, yoonase kaayaxe ne maaqenike hattese erdusso.

²⁰Numba yella nuwadiyaxhiti ha bakka garako u dissicha. Hinuni Ayhudaxitimay <Axiti dissorosa e worgusesi Yerusaleemeko> hidiko hiine>> yeydi i hido.

²¹Yesuusani <<Nuunde! Ha neese ta zeere zeere <Aadeko> hidi ekkuwa! Ha bakka gara oo'oyne Yerusaleeme ade maaqe Wontose dissese hi maddhunguwa wonteko yoonesa.

²²Hinuni hi eruwasusuko hi disse, nunimay looloy Ayhuda badefa e yoone gisha nu ere Wontosuko nu disse.

²³Maaqe baaka <Aadenawo dissoko u disse> yeydi hiyutteesiti ade maaqe Wontose Ayaanana durkuttiyara aadenaara u disse woggako yoonesa. Fetto hatteni yoodiko e yese. Ade maaqe Wontoni eehesi yeydi disseesitako.

²⁴Wontoy Ayaanako, Wontose disse worgeesiti Ayaananaara aadenaara disseko uso e worguse>> yeydi e hido.

²⁵Ye indoni <<Kristosa hidi hiyutte Mesihey yoonesa erako ta ere. Esi be yooneniyaka uddi abakoko nuuko e ohe>> yeydi i hido.

²⁶Yesuusani <<Hay niya zeerusiya yese tani ye ne ohesako>> hidi e hido.

²⁷Yenniyani e erusichoshiti be handecho godofa u yoodo. Yesuusay ye indowara zeerusune beedi u micco. Maaquwaye baaka ooneni ye indo <<Am ne worge?>> hidi oo'oyne esa <<Abasuna ha indowara ne zeere?>> yeydi oycco baasso.

²⁸Ye e geede ye indoy be waaxi ota yaha datti dhaddi katamaaka handi axituko

²⁹<<Bidzi axuko ta hanto hanta e uddina hanke mati taase zeerdasi yesa. Ye esa yoodi beewayte. Hanno esi Mesihe maaddho badi dheegguwasso>> hidi i hido.

³⁰Axitini katamaafa kessi Yesuusako u yoodo.

³¹I handoniyakani e erusichoshiti Yesuusako <<Laaxo, bolto muuwa!>> hidi u hido.

³²Esini ususe <<Hinuni eruwasako tani muune kaxay yesa>> hidi e hido.

³³Ha e gisha e erusichoshiti <<E muune kaxaaneso hanno axi esuse oodi indo?>> hidi wolko u hido.

³⁴Yesuusani <<Ta miyoy tamba ansasi maxo hantiyara e hanta alsiyarako.

³⁵Hinuni <Kaxa bhikkilese oyddi agunnako yoona attesa> yeydi maaquwaye hiinesi? Tanimay hinuse hinesi kaxa naddhi beewayte. Melli bhikkiluttese elliko e yese.

³⁶Kaxa aceshi ye be aceshi wooma efako e ekke. Koolo makkina yesese danda'e aafeko e bhikkille. Ye e gisha aylesini aceshini wolko maggako u magge.

³⁷Ha essaafa dendasuna <Ha esi ayle se esi ace> yeydi hiyutta zeerey aadeko.

³⁸Hi gatto baasa hi acoronike ta anso. Fediti hantana u gatto, hinunimay u gafa giddaa gelli hinuse hi etto>> yeydi e hido.

³⁹Ye indoy <<Ta hanto hanta uddi hanke taako e oto>> hidi i hidosuna ye Samariya katamaafa laga axiti esa aadesso.

⁴⁰Usini esuko be yoodo woggaa beera e decoronike esa u shidho. Esini lam'i wonte aallo yaha usaara e feyssho.

⁴¹E otosa siidi fede laga axiti esa aadesso.

⁴²Usini ye indoko <<Ha e geede esa nu aadexesi neni nuuko otosunawo e maaddho baane nuni nuuse nu siido gishaara aadewo ha saha gara yese axe loolusesa e maaqenike nu erdo gishaarako>> yeydi u hido.

⁴³Yesuusay Samariyaka lam'i wonte be feyssho geede yahafa dhaddi Galila e hando.

⁴⁴Beesewo <<Kaayaxi be wudiya kuxuttuwasso>> yeydi e zeerdecha.

⁴⁵Galila e handoniyaka axiti Garo Massalase Yerusaleeme be handecho wogga yaha e hanto laga hanta uddi be beedecho gisha esa modhussi u motto.

⁴⁶Ye e geede ye wudiya yese Qaana katamaaka assi e hando. Ye katamani buro waaxe weyne daana e matecho katamaako e maaqicha. Yenniyakani Qifirnahoome katamaaka e yeley hardese bidzi kaati maagay e yecha.

⁴⁷Ye maagani Yesuusay Yuuda wudefa Galila e yoodosa siidi esuko handi <<Taara Qifirnahoome aadhuwa! Ta yeleko yaha hardi lubbosewo yesa. Odde taase loolusena!>> hidi e shidho.

⁴⁸Yesuusani <<Hinuni micushe abakowara du'use abakowara hi beedo baasa fetto <Loolusako e looluse> hidi taa gobbuwaytuwa?>> hidi e hido.

⁴⁹Ye maagani <<Laaxo, odde, ta yeley haydho baane ukkenawo yedena aadhuwa>> hidi e hido.

⁵⁰Yesuusani <<Dhaddi ne zawa hanguwa! Ne yeley loolliko yese hay'uwasso>> hidi e hido. Ye maagani <<Yesuusay otosa aadewoko>> hidi hissine be zawa dhaddi e hando.

⁵¹Ogiya hamiya e yesune e maaliti esaara ogiya muti <<Ne yeley loolliko yese>> yeydi u oto.

⁵²Ye maagani ye be yeley loollo saate e oycco. Usini <<Zine laappi saatenako michay toydine e loollo>> hidi u hido.

⁵³Ye yeliyadeni Yesuusay <<Ne yeley loolliko yese hay'uwasso>> hidi hidecho saate e maaqichonike e erdo. Ye wontiyafa ayti esaara e zawa axitaaray uddi Yesuusa aadesso.

⁵⁴Yuudafa Galila yoodi e hantusune ha esi lakkunxo micushe hantako.