Read koorete Yohanise 5 Bible Online

Yohanise 5 - koorete bible

Yohanise 5

¹Ye e geede Yesuusay Ayhuda massalaafa bidzi kuxutticho gisha Yerusaleeme e hando.

²Yahani Yerusaleeme katama qeyshi giddaa gelse sumitaafa bidzi <<Doriti Suma>> hidi hisso sumay e yecha. Ye suma buro Ibrayste nuunana <<Beetesayda[3]>> yeydi hisso waaxi eelay e yecha. Ye waaxi eela nuuna ichichi godo keexi xhange oomoy e yecha.

³Ye keexi xhange oomoni bal'iti, hamese danda'uwasiti, e kuchey e tokey siilleseesiti laga hargaxiti woy'iya u yecha. [Bidziya bidziya Wonto woosaxi afaafa hoddhi ye waaxe e en'usicha. Ye waaxi eelay en'onikewo burona essaa gelesi aba bisha harge e maaddhakoni be gara yese hargiyafa e loolicha. Ye e gisha waaxi en'esa u kakkicha.]

⁴

⁵Yahani haydzi tamma hazzuppi bera aallo hardese hargaxini e yecha.

⁶Yesuusani ye axi woy'iya yesesa e beedo. Laga bera aallo e hardesesa erdi <<Loole worguwa ne worge?>> hidi e oycco.

⁷Ye hargaxini <<Laaxo, waaxi en'eniya tamba aandi waassaa gelse axe keenguwasso. Gelese haga ta hineniyako taame buro feday gele>> hidi e hido.

⁸Yesuusani <<Dendi e gara ne woy'ichosha etti dhaddi ne tokena hanti hanguwa>> hidi e hido.

⁹Ye adeni yenniyawo e loollo. E gara be woy'ichoshani etti be tokena hanti hame e gello. Ye wontani sanbata wonte e maaqicha.

¹⁰Hinne Ayhuda afana maagiti ye loolla ade <<Hanzoy sanbatako. Essa ne woy'ichosha ne idduwannike wogay tucciko yese>> hidi u hido.

¹¹Ye adeni <<Ha tamba loolusasuko <Dendi e gara ne woy'ichosha etti dhaddi ne tokena hanti hanguwa!> yeydi hida>> hidi e hido.

¹²Usini <<Yeydi nemba hidasi oonena?>> hidi u oycco.

¹³Ye loolla adeni Yesuusay axi giddaaka gellecho gisha bemba loolusasi oone e maaqichonike erey esa iissho.

¹⁴Yeydi e maaddho geede Yesuusay Wonto Hayla Zawa qeyshi giddaa ye adiyara muti <<Hattesema loolliko ne yese. Ha esume gardese jheetey ne gara yooneesume hanzowafa sekke cubbo hantofuna!>> hidi e hido.

¹⁵Ye adeni bemba loolusasi Yesuusa maaqesa erdi handi Ayhudaxiti afana maagituko e oto.

¹⁶Usini Yesuusay ye esuke sanbata wonte axita e loolusicho gisha esa u maddhunxicha.

¹⁷Yesuusani <<Nuwadey uddi woggaako hatte aallo hanta e hante, tanini hantako hante>> hidi e mato.

¹⁸Ye esuna Ayhudaxiti Yesuusay sanbata wonte wogay <<Hantofita!>> hidi tuccechosha e hantosunawo e maaddhobaane Wonto <<Nuwade>> hidi hiyena bemba Wonto makko aandi e matosuna minsi esa wodhese u worgicha.

¹⁹Yesuusani <<Hinuse ta ohesi aadeko. Adey hantusune be beedosume feda yeley beese be adetona e hantesi bidzini baasso. Adey hantosako yeleni yeydiwo hante.

²⁰Adey yele eehako e eehe. Be hantesani uddiko be yele e beyse. Hi micoronike ha esume gardese hantako hanti e beyse.

²¹Adey haydhasita e densi yeso ususe e ingenike yeydiwo yeleni esuse ingese be worge axuse yesoko e inge.

²²Axiti ade be kuxenike yeleni u kuxorosa adey uddiyade gara e yaa'oronike adeto yelese e indesesa baaka adey bidzi garani yaa'uwasso. Yele kuxuwasi ye yele ansa adeni kuxuwasso.

²³

²⁴Hinuse ta ohesi fetto aadeko. Ta kato siidi tamba ansase aadexesi koolo makkina yesoko e keenge. Ye esi haybowafa yesowa e gardosa baaka e gara yaa'uttuwasso.

²⁵Hinuse ta ohesi fetto aadeko. Haydhasiti Wonto yele kato u siine woggako yoonesa. Ye woggani hay elliko yese. Siineesiti be uddina yesowakako u gare.

²⁶Yeydini maaqese e danda'esi adey yesose tulto maaqenike yeydiwo yeleni yeso tulto maaqoronike matiko e yese.

²⁷Yeley axi yele hidi hiyuttase e maaqe gisha yaa'a e yaa'orosa adeto esuse adey indiko e yese.

²⁸Ye esuna micofita! Boossaaka yeseesiti uddi Wonto yele kato u siine wontako yoonesa.

²⁹Modhe hantasiti haybowafa dendiko yeso degessi u yese. Iita hantasiti haybowafa u dende, u gara e yaa'utte.

³⁰Tani taase ta adetona abani hantese danda'uwasso. Maaqe baaka adekofa ta siidonikeko ta yaa'e. Tamba ansasi maxo alsese ta worgesa baaka ta maxo alsese ta worguwa gisha ta yaa'e yaa'ay gizoko.

³¹Tani taase ta qinose zeerdako ta zeerdosa aadeko hidi ekkesi baasso.

³²Maaqe baaka ta gisha zeeresako feday yesa. Esi ta gisha zeeresi aade e maaqenike tani erako ere.

³³Hinuni Yohanisekoko axe hi woossecha. Yohaniseni aade gisha zeerdiko e yecha.

³⁴Ha esa ta hidosi hi loolorosa baaka taase axi zeerorosa e worgusine maaquwasso.

³⁵Yohanisey hade eexhiya yesine fo'e inge faqeke yesesako. Hinuni oddhe woggase e fo'ena maggesuko hi eeto.

³⁶Tanimay Yohanisey oone ta maaqenike zeerdosume garsi taase zeeresa keemako ta keenge. Ta alsoronike adey taase indo hanta hantiya ta yesesako adey tamba ansonike beysesa.

³⁷Tamba ansa adey ta gisha otiko e yese. Bidziyani e kato hi washena siidobaytako, e aafusha beedobaytako.

³⁸Adey ansosa hi aadexuwa gisha e katoy hi muxhurowa uttuwasso.

³⁹Hinuni Hayla Fissharowaka koolo makkina yesoy yesesa hinumba e bisshineko degexese worgiya hi yese. Hayla Fissharomay ta gisha ohesako.

⁴⁰Maaquwaye baaka hinuni yeso degexese taako yoowe worguwaytako.

⁴¹Tani kuxa axukofa worguwasso.

⁴²Wonto hi eehuwannike hinumba erako ta ere.

⁴³Nuwade sunxuna ta yoonne, tamba ettobaytako. Feday beese be sunxuna yoodako efako hi ekke.

⁴⁴Wolla sekke hanke hi kuxe. Bidzi Wonto garafa bente kuxa worge hi inxhadho geede waydini tamba aadexese hi danda'e?

⁴⁵Tani ade buro hinumba luukenike hinuse bisshoffe! Hinumba luukesi bidzi yesako e yese. Esini esa gobbe hi mahe Museko.

⁴⁶Musey ta gisha diizese gisha esuse <Aadeko> hidi hi ettako taaseni <Aadeko> hidi efako hi efaane.

⁴⁷E diizosa <Aadeko> hidi efe hi dheeddo geede ta otosa waysi aadeko hidi efese hi danda'aane?>> yeydi e hido.