Read koorete Yohanise 6 Bible Online

Yohanise 6 - koorete bible

Yohanise 6

¹Ye e geede Yesuusay Xhibiriyadoose hidi hiyutte Galila bagade semfa bade e fotto.

²Laga axiti hargaxita loolussi e hanto micushe hanta be beedo gisha e geede u hando.

³Esini bakka gara kessi be erusichoshitaara yaha e utto.

⁴Yenniyani Ayhuda Garo Massalay uddhi e yecha.

⁵Yesuusani ye wogga laga axiti beeko yoonesa keddaydi beedi Filphoosekoni <<Haanxhi axe uddi elle kaxa ayafaw nu woome?>> hidi e oycco.

⁶Esini Filphoose yeydi oyccoshi e ohesa siyeme baaka beese hantese be hinesa erako e ericha.

⁷Filphooseni <<U bidzi bidzise fetto me'o me'o ellusese laga kuma miijhena[4] woondakoni elluwasso>> hidi e mato.

⁸E erusichoshitaafa bidzi Phexhrose sunda Simoonese esindo na'i Indiraaseni

⁹<<Ichichi bache banga booraara lam'i gulxhiyara aytese bidzi yeleko haya yesa. Hine waa hissetewa ha booray haanxhi axe ellese e danda'e?>> hidi e hido.

¹⁰Yesuusani <<Axita uttusuwayte!>> hidi e hido. Yahani modhe leddoy yechoyne axitini utto. Asanxiti taafoni ichichi kuma ellesako e maaqicha.

¹¹Ye e geede Yesuusay boora densi Wonto galatti ye uttecha axituse e taddo. Yeydiwo gulxheni e taddo[5].

¹²Axitini be uddina be worge makkoni muudi u missho. Yesuusay be erusichoshituko <<Atta baxi laaqani attuwannike bhikkiluwayte!>> hidi e hido.

¹³Usini bhikkillo. Ye ichichi bache banga booraafa axiti muusune atta baxe tamma lam'i kofa u kunso.

¹⁴Axiti Yesuusay hanto micushe hanta be beedoniya << <Ha saha gara e yoone> yeydi hiyutticha kaayaxi aadewo ha esako>> yeydi u hido.

¹⁵Yesuusani axiti esa osana kaatexese wordesesa be erdo geede be goshewo dhaddi bakka gara assi e kesso.

¹⁶Sahay dhaddi qamese hinne e erusichoshiti bagade nuuna dhaddi u hando.

¹⁷Yesuusay yoodo baane sahay ceendo. E erusichoshiti zabhaa gelli dhaddi Qifirnahoome hamese u aadho.

¹⁸Agexi iitana bagade gara yoonne jhirahoy waaxe sekke hanke hisse e gello.

¹⁹E erusichoshiti ichiche oo'oyne izzuppi kiilo meetire ellesa bagade garana shardi u handesune Yesuusay waaxi garana tokena hanti yoodi zabha uddhi e yoosune beedi u jhassho.

²⁰Esini <<Jhasshofita, tambako!>> hidi e hido.

²¹Usini maggana <<Esa zabhaa nu effeese>> hidi u hido. Zabhani izziyawo u hangicho godowa ello.

²²Bagade semfa attecha axiti sahay wontinne bidzi zabhawoy bagade gara yesune u beedo. Fede zabhana e erusichoshiti Yesuusay essaaka baasa beesewo u fotechonike u ericha.

²³Yenniyawo fede zabhiti Xhibiriyadoosiyafa Yesuusay Wonto galatti laga axita boora muussecho godose e da'aa u yoodo.

²⁴Attecha axitini Yesuusani maaqqe e erusichoshiti beera baasa be erdo wogga ye zabhitaaka gelli Yesuusa worge Qifirnahoome katamaa dhaddi u geede u fotto.

²⁵Bagade semfa bade fotti Yesuusa be degesso geede usini <<Laaxo! Aydena haya ne yoodo?>> hidi u oycco.

²⁶Yesuusani <<Hinuse ta ohesi fetto aadeko.Tamba hi worgesi boora muudi hi missho gisha baaka micushe hanta hi beedo gisha maaquwasso.

²⁷Baane kaxase hantofita! Koolo makkina yeso inge kaxase hantuwayte! Ye esani axi yele hidi hiyuttasi hinuse ingako e inge. Ade maaqe Wontoy axi yele hidi hiyuttesuna be maxo be hantenike addussiko e yese>> hidi e hido.

²⁸Axitini <<Hinne Wonto hanta hantese waa hiye nuu e worguse?>> yeydi u oycco.

²⁹Yesuusani <<Wontoy hi hantoronike worgesi Wontoy ansosa hi aadexorosako>> yeydi e mato.

³⁰Usini <<Hine nuni beedi aadexoronike aba micushe hantana ne mahe? Am ne hante?

³¹<U miyorosa afaafa boora ususe e indo> yeydi fissharowa e diizuttonike olo nuwadiyaxhiti saha melaa yesine manna hidi hiyutte boora u muudo>> yeydi u hido.

³²Yenniyani Yesuusay <<Hinuse ta ohesi fetto aadeko. Afaafa hoddha boora hinuse indasi Muse maaquwasso nuwadeko. Esini hinuse aade boora hidi hiyutte boora afaafa ingako e inge.

³³Wontokofa ingutta aade booray afaafa hodhi ha saha gara yese axituse yeso ingesako>> hidi e hido.

³⁴Ye e gisha axiti <<Laaxo! Ye esuke yese boora uddi wogga nuuse inguwa!>> hidi u hido.

³⁵Yesuusani <<Yeso inge booray tambako. Taako yoonesi koolona naayuttuwasso, tamba aadexesi koolona sazzuwasso.

³⁶Hinuse ta otonike hinunimay tamba beedi taa aadesso baytako.

³⁷Adey taase indosi taako yootako e yoone, taako yoonesa tani wude gooduwasso.

³⁸Ye esini esume afaafa ta hoddhosi tamba ansasi maxo hantese baaka ta maxo hantese maaquwasso.

³⁹Tamba ansasuse e maxoy taase e indosaafa uddi bidzini bayorosume katti aallicira wonte haybowafa ta denxorosako.

⁴⁰Nuwade maxoy yele beedi esa aadexesi uddi koolo makkina yeso e degexorosako. Tanini aallicira wonte haybowafa ye esa denxako ta denxe>> hidi e hido.

⁴¹Ayhudaxitini <<Afaafa hoddha booray tambako>> hidi e hido gisha umbu umbu hiye u ayto.

⁴²Assiwo <<Ha esi esade esindo nu eresa maaquwaye? Ha Yoosefe na'i Yesuusa maaquwaye? Hine waydiwu <Afaafako ta hodho> hidi e hine?>> hidi u hido.

⁴³Yesuusani ususe mahisine <<Sekke hanke wolko umbu umbu hidofita.

⁴⁴Tamba ansa adey taako gooshosha baaka taako yoowese ooneni danda'uwasso. Taako yoonesa tani aallicira wonteko haybowafa esa ta denxe.

⁴⁵Kaayaxiti fissharowaka <Axiti uddi Wontokofa erdesesako u maaqe> yeydiko e diizuttese. Ye e gisha adekofa siidi erdeseesiti uddinako taako u yoone.

⁴⁶Yeydi ta hisune <<Ade beedese axuko yesa>> hidi hiye maaquwasso. Ade beedesesi e da'aafa yoodasewoko.

⁴⁷Hinuse ta ohesi aadeko. Taa aadexesi koolo makkina yesoko e keenge.

⁴⁸Tani yeso inge boorako.

⁴⁹Hinadiyaxhiti olo saha mela manna hidi hiyutte boora u muudo. Maaqe baaka u haydho.

⁵⁰Afaafa hoddha booray axi muudi hay'uwannike mahe boorako.

⁵¹Afaafa hoddha en'a booray tambako. Ha booraafa muunesi ooneni koolo makkinako e yese. Ha saha gara yese axi yeso u keemoronike ta inge booray ta achoko>> yeydi e hido.

⁵²Yenniyakani Ayhudaxiti <<Ha axi e acho nu miyoronike waakisini mahese e danda'e?>> yeydi sekke hanke wolko u zeericha.

⁵³Ye e gisha Yesuusay ususe <<Hinuse ta ohesi fetto aadeko. Axi yele hidi hiyuttesi acho hi muudo baasaara e suuxe hi ussho baasaara koolo makkina yesoy hinuse baasso.

⁵⁴Ta achoy aade kaxaydi hiyutte kaxako ta suuxini aade ussheydi hiyutte usshuko. Ye e gisha ta acho muunesaara ta suuxe usheshaaray be uddina koolo makkinako e yese. Tanini aallicira wonte haybowafa esa denxako ta denxe.

⁵⁵

⁵⁶Ta acho muunesi ta suuxe usheshi esini taara bidzo maaddhiko e yese, tanini esaara bidzo maaddhiko yese hidiko.

⁵⁷En'a maaqe adey tamba ansonikiyara tanini esuna en'a maaddhonikiyara yeydiwo tamba muunesi ooneni taanna en'ako e maaqe.

⁵⁸Yoonase, afaafa hoddha booray ye esako. Esini hinadiyaxhiti muudonike yesesa maaquwasso. Ye boora muudasiti haydhiko u yese. Ha boora muunesimay koolo makkinako u yese>> yeydi e hido.

⁵⁹Yesuusay ha esa e zeerdosi Qifirnahoome katamaaka Ayhyda Bhikkilo Zawaa be erusicho woggako.

⁶⁰Yesuusaara hangichashitaafa lagay yeydi e zeerdosa be siido wogga <<Ha zeerey deexhako e deexhe, ooni efese danda'esa?>> yeydi u hido.

⁶¹Yesuusani umbu umbu uynesa beese erdi ususe <<Ha zeerey hinumba dhumusesuwa?

⁶²Axi yele hidi hiyuttesi be yecho godo maaddhi dhaddi e kesusune beeta'ayko waa hiyese hiine?

⁶³Yeso ingesi Wonto Ayaanako. Axi osamay abani go'ese danda'uwasso. Tani hinuse zeerdo katoy Ayaana ingesako, yesoni ingesako.

⁶⁴Maaquwaye baaka hi giddaaka bidzi bidzi aadexuwa geritako yesa>> yeydi e hido. Yesuusay ye esa zeerese e dandadhosi burowafa ayti aadexuwasiti oone u maaqenikiyara bemba garsi ingesi oone e maaqenikiyara be ericho gishako.

⁶⁵Sekkeni Yesuusay << <Nuwadey <<Yoowwa!>> hidi hidosa baaka taako yoonesi baasso> hidi hinuko ta otosi hi giddaaka aadexuwasiti yese gishako>> yeydi e hido.

⁶⁶Ye esuna esaara hangichashitaafa lagay dhaddi be geede u maaddho. Ye woggaafa ayti Yesuusaara hame u dhaddo.

⁶⁷Hinne Yesuusay be erusicho tamma lam'use <<Hinunini dhaddi hamesuwa hi worge?>> yeydi e oycco.

⁶⁸Yenniyakani Phexhrose sunda Simooney <<Laaxo, oonekoni nu hamme? Neni koolo makkina yeso inge katoko ne zeere.

⁶⁹Nunimay nemba Wonto hayla ne maaqenike <Aadeko> hidi ettiko nu yese, erdiko nu yese>> yeydi e hido.

⁷⁰Yesuusani <<Ha hinumba tamma lam'e xhardasi taa maaquwaye? Yey, hinukaafa bidzi Humbayeko>> yeydi e hido.

⁷¹Yeydini e zeerdosi Asqorotaxe maaqe Simoone na'i Yuuda gishako. Ye Yuuday tamma lam'ukaafa bidzo maaddhakoni Yesuusa buro gara garsi ingese hinesako.