Read koorete Yohanise 7 Bible Online

Yohanise 7 - koorete bible

Yohanise 7

¹Yeenxhi uddi maaddho geede Yesuusa Ayhuda afana maagiti wodhese wordo gisha Yuuda wude sekke hanke hante inxhadhi Galila giddaa e hanticha.

²Yenniyani Ayhudaxiti kuxicho Asha Massalay uddho.

³Ye e gisha Yesuusayndo na'axhey esuko <<Neera yeseesiti ne hante hanta beyoronike hayafa dendi Yuuda wude hanguwa!

⁴Tiddhiya bentese worge axi aachiyaanna be hante hanta hantuwasso. Neni haanxhi abako hantesa maaqo'ayko nemba uddi axuse addusuwa!>> yeydi u hido.

⁵Yeydi hiyeseni u dandadhosi fetto esindo na'axhitaaraydi esa aadesso badecho gishako.

⁶Yesuusani <<Ta woggay ello badiko e yese. Hi woggamay uddi wogga bishesheshako.

⁷Ha saha axiti hinumba inxha'ese danda'uwasso. U hantay iita maaqesa addaa ta kesse gisha tambama inxha'ako u inxha'e.

⁸Hinuni massalaaka dhaddi hanguwayte, tanimay ta woggay ello badi yese gisha massalaaka hanguwasso>>

⁹yeydi hidi esi Galila atto.

¹⁰Yesuusayndo na'axhey Asha Massalaa handesune esi tiddhiyanna maaddho badi e yesune aachiyaanna ye massalaaka e hando.

¹¹Ayhuda afana maagiti massalaaka <<Ye axi ay e yese?>> hidi Yesuusa worgiya u yecha.

¹²Yaha yecha axi lagay e gisha tiddhiyanna maaquwasa sekke hanke wolko gugun'iya u yecha. Bidzi bidziti <<Esi modheko>> yeydi hiya yesune fediti <<Oo'o, axuko e haluxe>> yeydi u hicha.

¹³Maaquwaye baaka Ayhuda afana maagita be jhashoshuna e gisha ooneni tiddhissi zeeruwadiko yecha.

¹⁴Massala kuxisine e gidda yoodi axi ellusune Yesuusay Wonto Hayla Zawa qeyshi giddaa handi eruse e ayto.

¹⁵Ayhuda afana maagiti <<Esa erussay baanne ayafana ha axi ha e gede era e degesso?>> yeydi u micco.

¹⁶Ye e gisha Yesuusay <<Tani eruse eray tamba ansa ade garafa bentasuko baaka ta garafa maaquwasso.

¹⁷Tamba ansasi maxo hantese worgesi yesa'ayko ha eray Wontokofa bentase oo'oyne taakofa ta zeerdosa e maaqenike erako e ere.

¹⁸Beese be qinese zeeresi be qino kuxako e worge. Ansasi kuxa worgesimay aadaxuko zaadeni keenguwasso.

¹⁹Musey hinuse woga gaddo badiya e yecha? Maaquwaye baaka hi giddaaka ooneni woga kakkesi baasso. Hinuni ame tamba wodhese hi worge?>> yeydi e hido.

²⁰Axitini <<Xhoozuko ne gara yesa. Ooni niya wodhese worgesa?>> yeydi u hido.

²¹Yesuusani <<Tani bidzi hantako hanto, hinuni uddi ye bidzi hantanako huulana hi mice?

²²Musey hinuse gada utte woga diizziko e gaddese. Ye wogani e bentosi Museme buro yecha hinadiyaxhi garafa baaka Muse garafa maaquwasso. Hinne sanbata wonteko gada hi uttuse.

²³Yebo, Muse woga kafeme sanbata wonte gada hi uttusso geede hinne tani sanbata wonte axe e tokiyafa e qino makko ta loolusosuna ame hi huule?

²⁴Hi yaa'esa essaa gelli beedi gizo yaa'uwayte baaka afaafa yaadhofita!>> yeydi e hido.

²⁵Yerusaleeme katamaafa bidzi bidzi axiti <<Ha axe maaquwaye wodhese u worgichoshi?

²⁶Hay, esi addussiko erusiya yese, usini abakoydi e gara hiyutto baasso. Ha axi aadewo Mesihe maaqenike afana maagiti erdiya u hineni?

²⁷Fetto ha axi an bade axe e maaqenike erako nu ere. Mesihey yooneniyaka an badefa e yoodonike erese danda'esi baasso>> yeydi u hido.

²⁸Ye zeeriyafa dendasuna Yesuusay Wonto Hayla Zawa karaa erusisine be kato keddaysi <<Taa erako hi ere. Ayafa ta yoodosa erako hi ere. Hi erdakoni tani taase ta adetona yoodo baasso. Tamba ansasi beese aadaxuko. Esa eruwaytako.

²⁹Tanimay esukofa ta yoodo gishaara esi tamba anso gishaara esa erako ta ere>> yeydi e hido.

³⁰Ye woggaaka esa aykese wordi u yecha. Worguttuwaye baaka e woggay ello badecho gisha ooneni esa aykese dandadho baasso.

³¹Axitaafa lagay esa aadesso. Usini <<Mesihey be yoone woggaaka ha axi hantoosume gare micushe hantaa e hante?>> yeydi u hido.

³²Axiti Yesuusa gisha yeydi gugun'usune Farasaxiti u siido. Ye e gisha kahinituse afana maagitaara Farasaxitaaray Yesuusa aykese wordi be yebita esuko u anso.

³³Yesuusani yenniyaka <<Hinunaara wolko oddhe woggako ta dece. Ye e geede tamba ansasukoko ta hange.

³⁴Tamba worgoko hi worge, worguwayte baaka degexuwaytako. Tani yese godo hamese danda'uwaytako>> yeydi e hido.

³⁵Hinne Ayhuda afana maagiti wolko sekke hanke <<Nuni esa degexeesume ha axi ayni hamese e hine? Hanno Ayhuda maaquwasiti giddaaka Ayhudaxiti budutti yese godo handiya Ayhuda maaquwasita erusese e hine?

³⁶<Tamba hi worge, worguwayte baaka degexuwaytako. Tani yese godo hamese danda'uwaytako> yeydi e hisune abaydi hiyona?>> yeydi u hido.

³⁷Wontay massalase aallicira wonte maaqisine keddaydese wonte e maaqicha. Yesuusani axiti giddaa dendi eedhi be kato keddaysi <<Waaxe sazzay yesa'ayko taako yoodi ushuwaye!

³⁸Tamba aadexeesuse Hayla Fissharoy ohenike yeso waaxi tultoy e gawwaafako e fol'e>> yeydi e hido.

³⁹Ye esani e zeerdosi esa aadexesi ekke Ayaana Geeshi gishako e maaqicha. Yenniya Yesuusay be wontunte kuxa fuulaaka arto badi yecho gisha Ayaana Geeshi hodho badiko e yecha.

⁴⁰Axitukaafa bidzi bidziti ye esa be siidoniya << <Yootako e yoone> hidi hiyutticha kaayaxi ha esako>> hidi u hido.

⁴¹Feditini <<Ha esi Mesiheko>> hidi u hido. Feditini assi <<Mesihey yoonesi hinne Galilaafa?

⁴²Mesihey Dawite fira fiixhaafa e yeluttenikiyara Dawite katamaafa Beeteleemiyafa e yoonenikiyara Hayla Fissharowaka diizutti baye?>> yeydi u hido.

⁴³Ha e gisha Yesuusa garana axiti wola u shato.

⁴⁴Bidzi bidziti aykese wordiko u yecha. Maaquwaye baaka ooneni esa ayto baasso.

⁴⁵Ye e geede yebiti kahinituse afana maagitukowara Farasaxitukowara maaddhi u yoodo. Woossechashitini <<Ame Yesuusa ayti oowe hi dheeddo?>> hidi u oycco.

⁴⁶Yebitini <<Esukewo zeere axi hatte aallo ha saha gara benti eruwasso>> hidi u hido.

⁴⁷Farasaxitini <<Hinumbani assi halussi?

⁴⁸Yebo, afana maagitaafa oo'oyne Farasaxitaafa esa aadesase beediya hi yese?

⁴⁹Ha e geede hamiya yese axiti Muse woga gisha am u ere? U bisha axiti aacutteseesitako>> yeydi u hido.

⁵⁰Buro Yesuusako handecha usaafa bidzo maaqe Niqodomosey

⁵¹<<Ni wogaaka bidzi axi be luufutto luufo burussi siido baanniyara aba e hantosi erutto baanniyara e gara e yaa'uttoronike yesa e yese?>> hidi e hido.

⁵²Usini <<Nenini esuke Galilaafaani? Kaayaxi Galilaafa denduwannike Hayla Fissharowaaka naddhi wordi beedi eruwa!>> yeydi u hido. [

⁵³Yenniyani be bidzi bidzina be zawa zawa dhaddi u budutto.