Read koorete Yohanise 8 Bible Online

Yohanise 8 - koorete bible

Yohanise 8

²Guta ketiya sho'e assi Wonto Hayla zawaa e yoodo. Axitini uddina esuko u yoodine uttisine eruse e ayto.

³Muse woga eruseesitaara Farasaxitaaray bidzi indo i laggetichoyne ayti oodi laga axiti buro u esso.

⁴Usini <<Laaxo! Ha indoy laggetowafako i aykuttese.

⁵Ha esa bissheshe indoy shuchuna icutti i hay'oronike Muse wogaaka nuuse ohuttiko e yese. Nenichi? Ha isuse am ne ohe?>> hidi u oycco.

⁶Yeydi esume u hidosi e garafa zeere degessi esuna esa luufese oge worgiya be yecho gishako. Yesuusani yekke sahaa ullaydi be gil'ana saha gara diize e ayto.

⁷Mati mati esa oyce u gello geede wokke kedda hidi <<Ha hi giddaafa cubbo keenguwasi burona shuche etti iso icuwaye>> yeydi e hido.

⁸Assi yekke sahaa ullaydi saha gara diize e gello.

⁹Usini ye esa be siido wogga cimaafa ayti be uddina bidzo bidzoydi yaafa dhaddi kessi u hando. Hinne Yesuusaara ye indowarawoy yaha be goshe u atto.

¹⁰Ye e geede Yesuusay wokke keddaydi <<Nuunde! Niya luukichashiti ay yese? Ne gara yaadhay ooneni baye?>> hidi e oycco.

¹¹Isini <<Laaxo! Ooneni baasso>> hidi i mato. Yesuusani <<Tanini ne gara yaa'uwasso. Hanguwa, hanzowafa sekke cubbo hantofuna!>> hidi e hido.]

¹²Sekkeni Yesuusay <<Tani ha sahase fo'eko. Taara yesesi uddi yesowa aange fo'eko e degexesa baaka cencha gidda sekke hanke hantuwasso>> yeydi e hido.

¹³Farasaxiti <<Neni neese ne gisha ato maaddhako aadeko hidi efuttesa maaquwasso>> hidi u hido.

¹⁴Yesuusani <<Tani ta gisha zeerdako ayafa ta yoodonike aya ta hangenike ta ere gisha ta zeerey aadeko hidi efuttesako. Hinunimay ayafa ta yoodonikiyara aya ta hangenikiyara eruwaytako.

¹⁵Axi yaa'enikeko hi yaa'e, tani oone garani yaa'uwasso.

¹⁶Tani yaadhakoni ta yaa'e yaa'ay aadeko. Ye esini tani ta goshewo yaa'uwasso. Tamba ansa afaase adey taara wolkoko e yese.

¹⁷Lam'i axi bidzi nuunawo zeerdako ye zeerey <<Aadeko>> hidi efuttoronike hi woga fissharowa diizuttiko e yese.

¹⁸Hay, tani taasuko zeere, tamba ansa nuwadeni ta gishako zeere>> yeydi e mato.

¹⁹Usini <<Niyadey ay yese?>> hidi u oycco. Yesuusani <<Tambani maaqqe nuwadeni eruwaytako. Tamba erdesesa maaddhako nuwadeni erako hi eraane>> hidi e hido.

²⁰Ye esa e zeerdosi Wonto Hayla Zawa karaa miijhe essa dakkicho saaxhine da'aa axita erusisineko e maaqicha. E woggay ello badecho gisha esa ooneni ayto baasso.

²¹Yesuusani assi zeerisine <<Dhaddiko tani hange. Hinuni tamba worgoko hi worge, maaquwaye baaka hi cubbowara yesineko hi hay'e. Tani hange godo hinuni hamese danda'uwaytako>> yeydi e hido.

²²Ayhuda afana maagitini << <Tani hange godo hinuni hamese danda'uwaytako> yeydi e hinesi bemba wodhesuwa e hineni?>> yeydi u hido.

²³Esini <<Hinuni yekke oomofako, tani wokke afaafako. Hinuni ha saha garafako, tani ha saha garafa maaquwasso.

²⁴Ye e gishako <Hi cubbowara yesineko hi hay'e> yeydi ta hidosi. <Yesesako> hidi hiyuttesa ta maaqenike <Aadeko> hidi efe hi dheeba'ayko ta otonike hi cubbowara yesineko hi hay'e>> yeydi e hido.

²⁵Yenniya usini <<Hinne neni oonewa?>> yeydi u oycco. Esini <<Oone ta maaqenike hinuse burowafa ayti otiko ta yese.

²⁶Hi gisha ta zeeresaara ta yaa'esaara laga zeereko ta keenge. Ye esini yaha yesune, tamba ansasi beese aadaxuko. Tani esukofa ta siidosako ye esawo ha saha gara yese axuse ta ohe>> yeydi e hido.

²⁷Ade maaqe Wonto gisha e zeerdosi ususe gele e dheeddo.

²⁸Ye e gisha Yesuusani <<Axi yele hidi hiyuttesa keddaysi hi suxhoro woggaako <Yesesako> hidi hiyuttesa ta maaqenike hi ere. Yeydiwo adey tamba erusosa ta zeerenikiyara taakofa abani ta hantuwanikiyara ye woggaako hi ere.

²⁹Tamba ansasi taara wolkoko e yese. Tanini esa maggusese uddi wogga ta hante gisha esi ta goshe tamba dhagguwasso>> yeydi e hido.

³⁰Yeydi e zeerdoniyaka lagiti esa aadesso.

³¹Yesuusani bemba aadessa Ayhudaxituse <<Hinuni ta erusenike yesa'ayko aadewo taara wolko yeseesitako.

³²Aadeni erako hi ere, ye aadeko hinumba maaketowafa shawo kesesa>> yeydi e hido.

³³Usini <<Numba yella adey Abrahaameko. Fetto ooneseni maala maaddhi eruwanxhiko. <Maaketowafako shawo hi kese> yeydi waydini numba ne hine?>> yeydi u hido.

³⁴Esini <<Hinuse ta ohesi fetto aadeko. Cubbo hantesi be uddina ye cubbose e maalako.

³⁵Maalay bidzi zawa yessakoni koolo makkina ye zawaxe maaquwasso. Yelemay koolo makkina ye zawaxuko.

³⁶Wonto yeley hinumba maaketowafa kessa'ayko aadewo kessesesako hi maaqe.

³⁷Abrahaame nayshe hi maaqenikema erako ta ere. Maaquwayte baaka hinuse ta otosa siidi efe hi dheeddo gishako tamba wodhese hi dendo.

³⁸Tani nuwadiyara yesine ta beedosako ta zeere, hinuni hinadekofa hi siidosako hi hante>> yeydi e hido.

³⁹Usini <<Numba yella adey Abrahaameko>> hidi u hido. Esini <<Abrahaame nayshe hi maaddhako Abrahaamey hantosako hi hantaane.

⁴⁰Hattema Wontokofa ta siido aade hinuse zeerda tambako wodhese hi dendese. Abrahaamey yeysi hanto baasso.

⁴¹Hinuni hinadey hanticho hantako hi hante>> yeydi e hido. Usini <<Nuni laggetona yelutta woyleysa maaquwanxhiko. Bidzi adeko nu keenge, esini Wontoko>> yeydi u hido.

⁴²Yesuusani <<Wontoy hinade maaddhako tani Wonto da'aafa kessi ta yoodo gisha tamba eehako hi eehaane. Esako tamba ansosa baaka taase yoodo baasso.

⁴³Abasuwa ta zeeresi hinuse e geluwaane? Ta zeeresa efese hi danda'uwa gishako.

⁴⁴Hinuni hinade maaqe Humbaye nayshuko. Hi worgesi hinade maxo hanteko. Esini achaafa densi axe woddhesesako. Aade be keenguwa gisha aadiyara wolko muhuwasso. Zaade be zeereniya beekofako e zaade. Esi beese zaadaxuko, zaadeseni e xhabhoko.

⁴⁵Tanimay aadewo ta zeere gisha <Aadeko e zeere> hidi hiwaytako.

⁴⁶Hinukaafa tamba <Neni cubbaxuko> yeydi hinesi oonena? Hinne aade zeeresa ta maaddho geede abasuwa ta zeere <Aadeko> hidi hi ekkuwaane?

⁴⁷Wontokofa maaqesi Wontoy ohesako e siine. Hinunimay Wontokofa hi maaquwa gisha siwwaytako>> yeydi e hido.

⁴⁸Sekkeni mati Ayhudaxiti << <Neni iita Samaraxuko, xhoozuko ne gara yesa> yeydi nu hidosi aade maaquwaye?>> hidi u hido.

⁴⁹Yesuusani <<Ta gara xhoozi baasso, tanimay nuwadeko kuxe. Hinuni tambako hi eerse.

⁵⁰Tani taa kuxorosa worguwasso. Tani kuxuttorosa worgesaara taase yaa'esaaray feday yesako yese.

⁵¹Hinuse ta ohesi fetto aadeko. Ta ohenike yesesi yesa'ayko koolo makkina hay'uwasso>> yeydi e hido.

⁵²Ayhudaxitini <<Hattema xhoozi ne gara yesesa erdiko nu yese. Fetto Abrahaameni haydhiko yese, kaayaxitini haydhiko yese. Hinne neni waydiwu <Ta ohenike yesesi yesa'ayko koolo makkina hay'uwasso> yeydi ne hine?

⁵³Fetto neni nuu yelli haydha ade Abrahaameme garuwa ne gare? Esi haydhiko yese, kaayaxitini haydhiko yese. Hine <Tani ooneko> hidini niya ne hine?>> yeydi u hido.

⁵⁴Yesuusani <<Tani taanna taa kuxa'ayko ta kuxay wooma keenguwasso. Tamba kuxesi <Nu Wontoko> hidi hiine nuwadeko.

⁵⁵Ye nuwade hinuni eruwaytako baaka tanimay erako ere. Tani <Esa eruwasso> hidi hinesa maaddhako hade hinuke tani zaadaxuko maaqe. Maaquwaye baaka tani erdiko e katoni ta kakke.

⁵⁶Hinumba yella ade Abrahaamey ta wonta beyesuko e col'o. Beedini e maddo>> yeydi e hido.

⁵⁷Ayhudaxiti yenniya <<Ichichi tammi berani kundo baa neni waakidiwu <Abrahaame ta beedo> hidi ne hine?>> yeydi u hido.

⁵⁸Yesuusani <<Hinuse ta ohesi aadeko. Abrahaamey yelutto baaneni tani yesesawoko>> hidi e hido.

⁵⁹Hinne usini shuchuna esa iceshe shuche u etto. Yesuusay u da'aafa biya aasshi Wonto Hayla Zawa karaafa kessi dhaddi e hando.