Read koorete Yohanise 9 Bible Online

Yohanise 9 - koorete bible

Yohanise 9

¹Yesuusay oge garichine bal'a maaddhi yeluttecha bidzi ade e beedo.

²E erusichoshiti <<Laaxo! Ha adey bal'a maaddhi yeluttoronike cubbo hantasi oonena? Esa yella adiyara indowarani esuwara?>> yeydi u oycco.

³Yesuusani <<Wonto hantay esuna addaa bentorosa baaka esa yella geritani maaqqe esi hanto cubbona maaquwasso.

⁴Wonta e yesune tamba ansasi woosso hanteko taa e worguse.[6] Ooneni essaanna hantese danda'uwa qamako yoonesa.

⁵Ha saha gara yesine tani ha sahase fo'eko>> yeydi e hido.

⁶Ye e geede cuche yekke sahaa cutti cuchuna saha timussi ye urqana ye ade aafe e tissho.

⁷Ye bal'a <<Handi Selihoome eelaa shohuttuwa!>> yeydi e hido. Siloome hidi hiyoy anxuttase yeydi hiyoko e maaqicha. Hinne ye adey handi shohutti beesine yoodo.

⁸Dooditani maaqqe buro abako e shi'usune beedechaashitini <<Ha axi hade utti e shi'usune nu beecho axe maaquwaye?>> yeydi u hido.

⁹Bidzi bidziti <<Eewa esako>> hidi u hido. Feditini assi <<Esa e bishesha baaka esa maaquwasso!>> hidi u hido. Esimay <<Tambako>> hidi e hido.

¹⁰Axitini <<Hinne ne aafey waanidi beyese dandadho?>> hidi u oycco.

¹¹Ye adeni <<Yesuusa sunge adeko saha timussi ye urqana ta aafe tisshi <Handi Siloome eelaa shohuttuwa> hidi e hineko handi shohutti ta beedo>> yeydi e hido.

¹²Usini <<Hinne ay ye axi yese?>> hidi u oycco. Esini <<Aya e yesesa tani eruwasso>> hidi e hido.

¹³Ye e geede axiti ye bal'a maaqichine loolla ade Farasaxiti buro u aando.

¹⁴Yesuusay saha urqa mati ye ade aafe e loolusso wontay sanbatako e maaqicha.

¹⁵Hinne Farasaxiti ye ade <<Waakidini beyese ne dandadho?>> hidi u oycco. Ye adeni <<Ta aafe urqana e tisshineko shoti hay ta beedo>> hidi e hido.

¹⁶Yenniyani Farasaxitaafa bidzi bidziti <<Ha axi sanbatase wogay otesesa be kakkuwa gisha Wontokofa maaquwasso>> hidi u hido. Feditini assi <<Hine cubbache maaqe axi ha e bisha micushe hantita waydi hantese e danda'e?>> yeydi u hido. Ye esuna u giddaaka shahoy gello.

¹⁷Ye e gisha ye bal'a maaqicha ade <<Ha ne aafey beyorosa mata ade gisha am neni ohe?>> hidi assi u oycco. Esini <<Kaayaxuko>> hidi e hido.

¹⁸Ayhuda afana maagiti esa yella gerita xheydi waydi bal'a e maaqichonikiyara e beedonikiyara be oycoro makko bal'a e maaqichosha <<Aadeko>> hidi hiye u inxhadho.

¹⁹Usini <<Ha esi hi yeliya? Aafe bal'a maaddhiko e yelutto yeydiya hiine? Hinne hatte waydi beyese e dandadho?>> hidi u oycco.

²⁰E geritini <<Ha esi nu yele e maaqenikiyara bal'a maaddhi e yeluttonikiyara erako nu ere.

²¹Hatte waysi e beedosaara ooney esa loolusosaara eruwanxhiko. Esi beese uuxhako, beese be qinose zeerako e zeere. Esa hinuse oycuwayte>> yeydi u hido.

²²Esa yella geriti esume yeydi u hidosi Ayhuda afana maagita be jhassho gishako e maaqicha. U jhasshichoshini << <Yesuusay Mesiheko> yeydi hinesi yesa'ayko nu Bhikkilo Zawaafa goodako nu goode>> hidi u hidecho gishako.

²³Hinne yella geriti <<Esi beese uuxhako, esa oycuwayte>> hidi u hidosi.

²⁴Ye e gisha ye bal'a maaqicha axe assi hanke beeko xheydi <<Neni neese <Meddha Wontoppa> hidi caadhi aade zeeruwa[7]. Ha axi cubbache maaqenike nuni erako nu ere>> hidi u hido.

²⁵Ye adey <<Cubbache esi maaqe esi maaqe dheebe tani eruwasso. Ta eresi bidzi basuko. Ye esini bal'a ta maaqicha, hatte hay beyaka ta yese>> hidi e hido.

²⁶Usini <<Am neese e hanto? Waakisiwu ne aafey beyoronike e mato?>> hidi u oycco.

²⁷Esini <<Burochi ta otinne siye hi dheeddechoshi. Hinne assi abasuwa sekke siyese hi worge? E bade maaqesuwa hiineni?>> hidi e hido.

²⁸Usini <<Nenko neese e badey, nuni nuuse Muse badeko.

²⁹Wontoy Muse zeerusonikeko nuni ere. Ha Yesuusa hissoosi ayafa e maaqesa eruwanxhiko>> hidi hissine e gara u huullo.

³⁰Ye adeni << <Ha axi ayafa e maaqenike eruwanxhiko nuni> yeydi hiidosi micushako e micushe. Hinuni yeydi hiwayte baaka ta aafema loolusasi esako.

³¹Wontoy cubbachituse e siwwasa erako nu ere. Wontoy biya kuxesusaara be maxoke hantesusaarako e siine.

³²Ha sahay meddhuttowafa ayti bal'a maaddhi yeluttecha axe loolusa axuko yesa yeydi hiyutti eruwasso.

³³Ha axi Wontokofa maaqe dheeddako aban hantese danda'uwadiko e yecha>> yeydi e hido.

³⁴Usini <<Neni cubbache maaddhi yeluttese axi numba erusesuwa neyneni?>> yeydi hissine Bhikkilo Zawafa wude esa u kesso.

³⁵Ye bal'a maaqicha ade be Bhikkilo Zawafa u kessosa Yesuusay e siido. Esani degessi <<Axi yele hidi hiyuttase aadexa ne aadexe?>> yeydi e oycco.

³⁶Ye adeni <<Laaxo! Esa ta aadexoronike esi oonewa?>> hidi sekke e mato.

³⁷Yesuusani <<Hade buro ne beedechoshako ha niya zeerusesini esako>> yeydi e hido.

³⁸Ye adeni <<Laaxo! Niya aadexako ta aadexe>> yeydi hissine e disso.

³⁹Yesuusani <<Beewadechashiti beyoronike beya yechashiti bal'a u maaqoronike yaa'esuko ha saha gara ta yoodo>> yeydi e hido.

⁴⁰Ye woggani Yesuusa da'aa yecha bidzi bidzi Farasaxiti <<Hinne nunini bal'a?>> yeydi u oycco.

⁴¹Yesuusani <<Bal'a maaddhessakoma cubbache maaquwadiko hi yecha. Hattema <Beyako nu yese> yeydi hiine gisha cubbache maaqisineko yaha hi atte>> yeydi e mato.