Read koorete Anxuttaasiti 1 Bible Online

Anxuttaasiti 1 - koorete bible

Anxuttaasiti 1

¹Tawofilose, buro neese ta diizzosaaka Yesuusay hante aytosaafa densi xhardi be ansosituko Ayaana Geeshuna durkutti woosso be indo geede wona afaa be hando aallo e erusosaara e hantosaara uddi neese diizziko ta yecha.

³Lagana maddhundi be haydho geede dendi en'a be yesenike laga ogena addeydi ususe bemba e beyso. Oyddi tammi wonte giddaaka addaa benti Wonto kaatetey aba e maaqesa usuko e oto.

⁴Bidzi wogga usaarani wolko be yechoniya <<Hinuko ta otecho nuwadey hinumba gobbusese gobbo kakkuwayte baaka, Yerusaleeme katamaafa kessofita.

⁵Yohanisey waaxunako xhamadhi yecha, hinunimay oddhe wonta geedeko Ayaana Geeshuna hi xhamaqutte>> yeydi hissine usuko e oto.

⁶Usini bidzi godo esaara bhikkilutti yesine <<Nu Laaxo, Isra'eelese kaate sekke mati ne essesi hattiya?>> hidi u oycco.

⁷Yesuusani <<Yeenke yesesi an agunna, an bera e maaqenike nuwadeko beese be adetona mahesa. Hi erorosa hinumba mato baasso.

⁸Maaquwaye baaka Ayaana Geeshi hi gara yooneniya osako hi degexe, Yerusaleeme katamaani Yuuda wudiyani Samariya wudiyani uddi sahay matoynani ta gisha oheesitako hi maaqe>> yeydi e hido.

⁹Ye esa be oto geedeni u beesunewo wokke wokkeydi e hando, dhumaa gelli bente e dheeddo.

¹⁰E kesusuneni afaa tiddhissi beya u yesune booxi maa'o maadhese lam'i axi hay u da'aa eedhi

¹¹<<Hinuno Galila axito, abasun afaa beesine hi ee'e? Afaa e hangusune hi beedo Yesuusay afaa e hangusune hi beedonikewoko yekke maaddhi e yoone>> yeydi usuko u oto.

¹²Ye e geedeni e erusichoshiti Zayte Bakkaafa hanke Yerusaleeme u maaddho. Ye bakkani Yerusaleemefa bidzi kiilo meetireko e zare.

¹³Yoodini essa be yecho godo fooqiya u kesso. Ye usitini Phexhrose, Yohanise, Yayqoobe, Indiraase, Filphoose, Toomaase, Bartelemoose, Matoose, Ilfiyose yele Yayqoobe, biyade wudese eedhecha Simooniyara Yayqoobe yele Yuudaarako u maaqicha.

¹⁴Ye usiti be uddinawo bidzi muxhurona uddi wogga gafe baaka Wonto shi'ese u bhikkilutticha. Bidzi bidzi indowaxhitaara Yesuusayndo Maaramiyaray yeydiwo Yesuusayndo na'axhitaaray usaara u yecha.

¹⁵Yenniyani bidzi wonte Phexhrosey xhiixe lam'i tamme elle aadexeesiti buro eedhi

¹⁶<<Nuundo na'axhito! Yesuusa aytecha gerita durta Yuuda gisha Ayaana Geeshi Dawite badena Hayla Fissharowa ohuttecha katoy aaleko e worgusicha.

¹⁷Yuuday nuura bidzo maaddhi nu hante hantase shahaxuko e maaqicha>> hidi e hido.

¹⁸Ye Yuudani iita hanta hanti e wooma miijhe etti saha e woondo. Be deemonani undi giddaafa dhudhi e gawwo basini uddi kessi wora gutto.

¹⁹Yerusaleeme yechashitini uddi ye esa u siido. Hinneko ye sahay u nuunana <<Akeldaama>> hidi e xheygutto. Ye e bircheni <<Suuxi saha>> hidi hiyoko.

²⁰Phexhroseni sekke <<Ye esini yeydi e maaddhosi Zingale Fissharowa <E zaway kaya maaquwaye! Ooneni essa yessoppe> assi fede godo <E maagete feday ekkuwaye> yeydiko e diizuttese.

²¹Hatte Yesuusaara wolla kessi nu gelichoniya nuura yechashaafa ye esini Yohanisey esa xhamadhosaafa ayti afaa e kesso aallo nuura wolko yecha axitaafay bidzi nuura wolko e denxose ato maaqeko esa e worguse>> yeydi e hido.

²³Ye e geede lam'i axita u uqusso. Ye usini Barsabase oo'oyne Yostose sungicha Yoosefiyara Matiyasiyarako u maaqicha.

²⁴Wontoni shi'isine <<Uddi axi muxhuro ere Laaxo, Yuuday biya e worgusso godo handosi baliya ha marose anxuttase maaddhi maagetesa ha lam'ukaafa ne xhardesesa nuu beysuwa!>> yeydi u shidho.

²⁶Hixhani u olline Matiyase e etto, esini anxuttecha tamma bidzi gara e kosutto.