Read koorete Anxuttaasiti 11 Bible Online

Anxuttaasiti 11 - koorete bible

Anxuttaasiti 11

¹Anxuttaasitaara Yuuda wudiyaka yecha aadexeesitaaray Ayhuda maaquwasitini Wonto kato ettosa u siido.

²Phexhrosey maaddhi Yerusaleeme handoniya gada uttecha Ayhuda maaqe Kristosa aadexeesiti

³<<Abasuna Ayhuda maaquwasiti zawa gelli usaara kaxa ne muudo?>> hidi e gara u huullo.

⁴Hinneko Phexhrosey zeere uddi e bidzi bidzina ohe e ayto.

⁵<<Bidzi wonte Iyophe katamaa Wonto shi'iya ta yesune haraje ta beesune orje maa'o bisshesheshi oyddi biraanna aykutti afaafa taako e hodho.

⁶Ye essaakani tiddhissi ta beesune oyddi tokena hangeesita, bo'ita, gawwona hangeesita, fangena hangeesitani ta beedo.

⁷Yenniyani tamba <Phexhrose, dendi shutti muuwa!> hidi hine kato ta siido.

⁸Tanimay <Laaxo, fetto muuwasso, <<Geeshe maaquwasako, tuneydesesako>> hidi hiyuttesa fetto tani gaggona ayti eruwasso> yeydi taydo.

⁹Lakkunxo woggani <Wontoy <Geeshuko> hidi hidosa <Tunako> hidi hidofuna> yeydi hine kato afaafa ta siido.

¹⁰Ye e bishana haydzi woggani sekke maaddhi maaddhi e bento. Ye e geede uddina wokke afaa e efutto.

¹¹Ye e efuttonikewo Qesaariyafa haydzi axiti taako woosutti ta yecho zawaaka u hando.

¹²Cooce baaka usaara ta hamoronike Ayaana Geeshi taase oto. Aadexiya yese ha izzuppi geriti taara handi ye taa xheyda adeso nu gello.

¹³Esini <Wonto woosaxi ta zawaa ee'usune ta beedo. Ye woosaxini <<Axita Iyophe ansi Phexhrose hidi hiyutte Simoone neeso xheyguwa!

¹⁴Esi neera ne zawa axitaaray uddi loole oge beysako e beyse>> yeydi e hido> hidi nuuse e oto.

¹⁵Dendi zeere ta aytoniyani Ayaana Geeshi nu gara acha be hodhonike u garani e hodho.

¹⁶Yenniya <Yohanisey waaxuna e xhamadhecha, hinuni Ayaana Geeshunako hi xhamaqutte> hidi Laaxi hidecho katoy taase maxutto.

¹⁷Laaxi Yesuusi Kristosana nu aadessoniya Wontoy nuuse be indecho ingo Ayhuda maaquwasituse indako hine Wonto ooxese tani danda'aa danda'e?>> yeydi e hido.

¹⁸Usini ye esa siidi be bersichosha dhaddi <<Yebo, Wontoy Ayhuda maaquwasituse be cubbo dhaddi maaddhi yeso u degexe oge ususe dodhosso>> yeydi hissine Wonto sunxe kedda kedda uyso.

¹⁹Isxhifanoose u woddhoniya denda goodona budutti aadexichashiti Finqe aallo, Qophrose aallo, Anxhokiya makko handi u ello. Yenniya Wonto kato Ayhudaxituse baaka fedeesituse ohuwadiko u yecha.

²⁰Qophrosaxitaara Qaranaxitaara maaqichashiti bidzi bidzi aadexeesiti hanke Anxhokiya yoodi Laaxi Yesuusa modhe odo ohisine Ayhuda maaquwasituseni u oto.

²¹Wonto osani u gara yecha. Orjena laga axiti aadessi Laaxuko u yoodo.

²²Yerusaleeme yecha Wonto zawa axiti ye esa be siidoniya Barnabase Anxhokiya u anso.

²³Esini handi Wontoy be maxo modhetena ususe hantosa be beedoniya maddi be uddina bidzi muxhurona Laaxuna miindi u yesorosa uso e osusso.

²⁴Esini beese Ayaana Geeshi essaa kundese aadexona miindese modhe axe e maaqicha. Laga axiti Laaxuko u yoodo.

²⁵Ye e geede Barnabasey Sawle worgese Xharsese e hando.

²⁶Be degessoniyani Anxhokiya e oodo. Yaha yese Wonto zawa axitaara wolko bhikkilutti bidzi bera kume laga axita u erusso. Laaxi oge hangeesiti acha wogga <<Kristosaxe>> yeydi u xheyguttosi Anxhokiyako e maaqicha.

²⁷Ye woggaa bidzi bidzi kaayaxiti Yerusaleemefa Anxhokiya u hando.

²⁸Usaafa bidzi Agaaboose hidi hissoosi dendi ha saha gara uddi orje naayey maaqesa Ayaana Geeshi densine kaayo e zeerdo. Ye naayeni Rooma kaati Qelawdoosey kaatto beraakako e maaddho.

²⁹Laaxi oge hangeesitini be bidzi bidzina be osake miijhe kessi Yuuda wude yecha aadexeesituse maro miijhe anxese u kundo.

³⁰Miijhe kessini Barnabasenaara Sawlenaara cimituko u anso.