Read koorete Anxuttaasiti 12 Bible Online

Anxuttaasiti 12 - koorete bible

Anxuttaasiti 12

¹Ye wogga kaati Herodisey Wonto zawa axitaafa bidzi bidzita waayye beyse e ayto.

²Yohaniseyndo na'i Yayqoobe satatana e wodhusso.

³Ye zeerey Ayhudaxita maggusosa beedi sekke Phexhroseni assi e aykusso. Ye woggani Helto Boora Massala u kuxicho wogga e maaqicha.

⁴Esa be ayto geedeni tufe zawa gelsi Garo Massala geede axi buro yaa'ase u uqusoro aallo be shahona shahona yese oyddi tooraxitaafa be woggana woggana oydde oyddeydi u kaforosa e indo.

⁵Hinne yaha tufe zawaa e kafutticha. E gisha Wonto zawa axitimay oseydi Wonto shi'iya u yecha.

⁶Herodisey Phexhrose axiti buro oowusese massi e yesune ye qama lam'i sansalatana tufutti lam'i tooraxiti giddaaka gehiya e yecha. Fede tooraxitini ye tufe zawa sumaaka u kakkicha.

⁷E masso baane Wonto woosaxi yoodine Phexhrosey yecho zawani fo'ido. Phexhrose milliyani dolli <<Ukke denduwa!>> hidi hissine esani e denso. Yenniyani sansalatay e kuchiyafa birchutti undo.

⁸Wonto woosaxini <<Ne maa'o maa'uwa, ne kobhani gelsuwa!>> hidi e hinne e otonikewo e mato. <<Afana ne maa'icho maa'o maadhi taara yoowwa!>> hidi e hido.

⁹Phexhroseni kessi esaara hame ayto. Wonto woosaxi hantosi haraje e beenesa esa e bishosha baaka aade bisho badiko e yecha.

¹⁰Acha kakkichasheni lakko kakkichasheni gardi essaanna katamaa kessicho qanga gasa u ello. Ye gasani beesewo do'uttine kessi oddhe oge u hando geede yenniyawo Wonto woosaxi e garafa shahutto.

¹¹Phexhroseni gaxi hanke e gara yoone <<Wontoy be woosaxe ansi Herodise kuchiyafaara Ayhuda geriti taase u massecho zeeriyafaara uddi taa e maardosa hagako aadewo ta erdo>> yeydi e hido.

¹²Haanxhi uddi esuse gello geede laga axi bhikkilutti Wonto shi'iya yecho Marqoose sunge Yohaniseyndo Maarameso e yoodo.

¹³Phexhrosey wude essaanna kesuso gasa yoodi e dolloniya Rooda sunge bidzi maaki oone e maaqesa erese i uddho.

¹⁴E kato e maaqesani erdi orjena be maddo gisha gasa dodho badesine sekke woxxhi zawa gelli <<Phexhroseko sumaa eedhesa>> hidi i oto.

¹⁵Usini <<Goojhiko ne yese!>> yeydi u hido. Isini <<Aadewo esako!>> hidi hissine minsi i otine usi <<Esa bishe Wonto woosaxuko[1]>> yeydi u hido.

¹⁶Phexhroseni gasa sekke sekke dolline gasa dodhi esa beedi u micco.

¹⁷Esi mikku u hiyorosa be kuchena e beyso. Wontoy tufiyafa waydi biya kessonike e bidzi bidzina oti <<Ha esani Yayqoobesaara fede aadexeesitusaara ohuwayte!>> hidi e hido. Yahafani kessi fede godo dhaddi e hando.

¹⁸Ketiya sho'e kakkicha tooraxiti <<Phexhrosey ayn baado?>> hidi hissine uddina u koysso.

¹⁹Herodiseni esa wordi be dheeddo geede ye kakkichashitani hossi kessi oycci u hay'oronike e mato. Ye e geedeni Herodisey Yuuda wudiyfa Qesaare katamaa handi e yesso.

²⁰Herodisey Xhirose katamaxiti garaara Siidoona katamaxiti garaara iitana huulli e yecha. Usi kaxa u degexichoshi kaati wudiyafa e maaqicho gisha bidzo maaddhi yoodi kaati zawa gara adeto keengicha maaga Bilastosey beera kumorosa be eehusso geede kaataara naquttese u oycco.

²¹Naqose kiito wonte Herodisey kaati maa'e maa'o maadhi kuxuttese be uttuxi gara utti laga axituse aako zeere e zeerdo.

²²Laga axitini <<Ha esa zeeresi wontoko baaka axe maaquwasso>> yeydi hissine esa kuxisine kato keddaysi u koysso.

²³Herodiseni Wontose maaqe kuxa Wontose indo baa gisha yenniyawo Wonto woosaxi e gara dano ollo. Ye e geedeni guxhundi e haydho.

²⁴Wonto katoy diciyakaara aatti hamiyakaara e yecha.

²⁵Barnabasiyara Sawliyaray be maro ittussi Yerusaleemefa Anxhokiya hanke u maaddho. Marqoose hidi hiyutte Yohanise beera etti u yoodo.