Read koorete Anxuttaasiti 13 Bible Online

Anxuttaasiti 13 - koorete bible

Anxuttaasiti 13

¹Anxhokiya yecha Wonto zawa axiti gidda kaayaxitaara eruseesitaaray u yecha. Ye usini Barnabase, <Karxi axe> hidi hiyutte Simoone, Qaranaxi Lukiyoose, ye wude ahesa maaqicha Herodisiyara wolko bidzi zawa diccecha Minahe, Sawle yeydiko u maaqicha.

²Usini Wonto u kuxusuniyara u xhoongusuniyara Ayaana Geeshi <<Barnabasiyara Sawliyara esuse ta xheydo hantase taase shati inguwayte!>> yeydi e hido.

³Yenniyani xhoondi Wonto be shidho geede be kuchita u gara gaddi shidhi u anso.

⁴Barnabasiyara Sawliyaray Ayaana Geeshi ansine Solooqiya hidi hisso katamaa u hando. Yahafani markabena Qophrose dhaana aallo u ello.

⁵Salamise hidi hisso godo be ello wogga Ayhuda Bhikkilo Zawittaa Wonto kato u erusso. Yohaniseni usaara yesine uso e maricha.

⁶Ye dhaana gara hanno birafa dendi seno bira aallo hangisine Phaaffo u ello. Yahani bidzi laaha Bar-Yesuusa hidi hiyutte Ayhuda maaqe zaade kaayaxe u degesso. Esini xhoozi osana micushe hanta e hanticha.

⁷Sargiyose Phawlose hidi hissoosaara wolko e feyshicha. Sargiyose Phawloseni ye dhaana ahe gaxe keenge axe e maaqicha. Barnabasiyara Sawliyara beeko xheydi Wonto kato siye e wordo.

⁸Grikaxiti nuunana Elmaase sunge ye laaha Bar-Yesuusay ye wude ahichashi Wonto e aadexuwannike wordi Barnabase garaara Sawle garaara e dendo.

⁹Phawlose sunge Sawley Ayaana Geeshi essaa kundine ye axi aafiya caddi beedi

¹⁰<<Doo, neno Humbaye maala! Aadena gizo maaqesa uddi iileyo, qaarusiyara iitetiyaray neeka kundeseyo! Ha Wonto oge gizo doomuse dhagguwannu?

¹¹Hay hatteni Wontoy be huula kuche ne gara densiko e yese. Bal'ako ne maaqe, oddhe woggani fo'e bewannako>> yeydi e hido. Yenniyawo e aafeni jhemmi jhemmissi beedi fettowo esuse e ceendo. Be kuche ayti durkesani be googe worge e ayto.

¹²Ye wude ahichashi ye maaddha base beedi Wonto e aadesso. Laaxi gisha be siido erana e micco.

¹³Ye e geedeni Phawlosiyara esaara yechashitaaray markabiya utti Phaaffo katamaafa dendi Phanfiliya yese Pherge hidi hiyutte katamaa u hando. Yohanisey usaafa shahutti sekke maaddhi Yerusaleeme e hando.

¹⁴Usimay Phergefa dendi Phisidiya wudiya bente Anxhokiya u hando. Sanbata wonte Ayhuda Bhikkilo Zawa gelli u utto.

¹⁵Musesafaara kaayaxiti fissharowafaara e zeerusutto geede Ayhudaxiti Bhikkilo Zawa afana maagiti <<Indo na'axhito, axita minxe kato keema'ayko zeeruwayte>> hidi hissine Phawlosiyaxhuko axuna u ohusso.

¹⁶Hinne Phawlosey dendi be kuchena beysi <<Isra'eele gerito, yeydiwo hinuno Wonto jhashe fede axito, siwwayte!

¹⁷Ha Isra'eele geri Wontoy buro nuwadiyaxhitako e xhardo, Gibxhe wudiya artaxita maaddhi u yesuneni uso laga axita e mato. Angussi be osanani yahafa uso e kesso.

¹⁸Oyddi tammi bera aalloni saha melaani uso be zahiya e iddo.

¹⁹Ye e geede Kene'aane wudiya be godo godo ayti yecha laappi kaataxhe baysi ye u saha uso e dhaalusso.

²⁰Ye esini uddi maaddhosi oyddi xhiixe ichichi tammi bera giddaako. Ye e geedeni kaayaxi Samu'eele be denso aallo uso ahesa yaa'axita e indo.

²¹Hinne usini kaate be gara e kaatexorosa Wonto u shidho. Wontoy e ommay Biiniyame maaqe Qiise na'i Sa'oole u gara e kaatesso. Esini oyddi tammi bera aallo u bakkaa e kaatto.

²²Sa'oole be oosso geede Dawite u gara e kaatesso. Dawite gisha zeerisine Wontoy <Ta muxhuroy esuna doojhesha ta massosa hantesa Isseye yele Dawite degesuusso> yeydi e hido.

²³Ye Dawite bohiyafa Wontoy <<Ingako ta inge>> hidi beydechosha Isra'eele loolusesa Yesuusako e indo.

²⁴Yesuusay yoodo baanne Isra'eele geriti be cubbo dhaddi maaddhi xhamaquttoronikeko Yohanisey burona e erusicha.

²⁵Be hanta alsese be uqusoniya <Tani oonena hinumba bishe? Tani Mesihe maaquwasso, maaquwaye baaka e kobha bircheshi taa maaquwasi ta geedeko e yoone> hidiko e hidecha.

²⁶Hinuno Abrahaame fira fiixhaafa yeluttese wolindo na'axhito, hinuno Wonto jhasheeshito fede axito! Waydi nu loolorosa ohe katoy anxuttosi nuusuko.

²⁷Yerusaleeme yeseesitaara uso aheesitaaray Yesuusay loolusesa gaxhutto baasso. Sanbatana sanbatana kaayaxiti fissharo u zeerususune e ohesi ususe gello baasso. Yesuusa gara be yaadhosuna ye fissharoy otecho kato u also.

²⁸E hay'oronike elluse zeere e gara degexe dheeddakoni e hay'oronike Philaxhose u shidho.

²⁹E gisha diizuttechashe uddi be ittusso geede sussaafa hossi u mooddo.

³⁰Hinneko Wontoy haybowafa esa e denso.

³¹Galilaafa Yerusaleeme esaara yoodasituseni laga wontiti giddaa sekke sekke ususe e bento. Ye usitini be beedonike hatte axituse odusiyako u yese.

³²Nuni hinuse modhe odo ohesuko nu yoodo. Ye esini Wontoy nuwadiyaxhituse indecho gobboy Yesuusa haybowafa Wontoy densosuna u nayshe maaqe nuu giddaa e ittosako. Ye esini Zingale Fissharowaka yese lakkunxo zingale <Neni ta yeleko, hanzoko niya ta yello> yeydi e diizuttonikeko.

³³

³⁴Haybowafa densi sekke e hay'uwannike e mato. Wontoy <Haylaara aadexuttesesaara maaddhi Dawitese inguttese gobboko hinuse ta inge> yeydiko e zeerdese.

³⁵Assini Zingale Fissharowa fede godo <Ne haylaxe maaqesi haydhi boossa sandi attoronike mahuwannako> yeydiko e hidese.

³⁶Dawiteni be beraaka Wonto maxoke be hanto geede e haydho, biyadiyaxhitaarani moogutti e ahay sando.

³⁷Maaqe baaka Wontoy haybowafa denso Yesuusay sando baasso.

³⁸Yoonase indo na'axhito, cubbowafa maaruttey bentesi Yesuusana e maaqenike hay siidoytako, eruwayte.

³⁹Muse wogay cubbowafa geesshi gizusuwasso. Esa aadexesimay uddi cubbowafa geejjhiko gizo u maaqe.

⁴⁰Kaayaxitini zeerisine <Hinuno Wonto gara dhaaddeesito, beewayte, miccuwayte, baawayte! Ooneni hinuko odussako aadeko hidi hi hiwwa hantako hi beraa ta hante> yeydi hidechoshi hi gara e elleesume hinumba kakkuwayte>> yeydi e hido.

⁴¹

⁴²Phawlosiyara Barnabasiyaray Ayhudaxiti Bhikkilo Zawafa kesusune axiti ye zeere yoone sanbata wonte sekke u zeerorosa uso u shidho.

⁴³Bhikkiluttecha axiti budutto geede laga Ayhudaxitaara Ayhuda woga etti u Wonto kuxe geritaaray Phawlosiyara Barnabasiyara u hando. Usini ye axitaara zeerisine Wontoy ususe keenge maxo modhete giddaa miindi u yesorosa <<Oseywayte!>> hidi u minso.

⁴⁴Lakko sanbata wonte ye katama axitini oddhewoy attine lagay Laaxi kato siyese u bhikkilutto.

⁴⁵Ayhudaxiti axi lagete be beedo woggaa orjena u dhiiddho. Phawlose zeereni bersi inxhadhi esa u cassho.

⁴⁶Yenniyani Phawlosiyara Barnabasiyaray <<Wonto katoy acha hinuse zeerutte e worgusine, zeeruttiko e yese. Hinuni efe dheeddi <Koolo makkina yesoy nuuse bishuwassho> hidi hi gara hi yaadhosuna hatte nuni hi garafa maaddhiko Ayhuda maaquwasituko nu hange.

⁴⁷Laaxi Hayla Fissharowa <Ha saha wosula aallo yesesi neenna u looloronike Ayhuda maaquwasituse fo'e ne maaqoronike niya maagessiko ta yese> yeydi e hido. Ye woossonako Ayhuda maaquwasituko nu hange>> yeydi hissine naassi u zeerdo.

⁴⁸Ayhuda maaquwasitini ye esa siidi maddi Laaxi kato gisha Wonto u galatto. Koolo makkina yesose xharuttechashitini uddi u aadesso.

⁴⁹Laaxi katoy ye wudiya laga godo ohuttisine e hando.

⁵⁰Ayhudaxita durkichashiti Wonto kuxicha keddaydese indowaxhitaara katamaa yecha orje geritaaray Phawlose garaara Barnabase garaara axe suqussi densi u goodorosa mati be wudiyafa u kesso.

⁵¹Usini ususe ato e maaqoronike be toke xhuure fitti gussi Iqoniya katamaa u hando.

⁵²Laaxi oge hangeesiti orjena maddi Ayaana Geeshuna u kundo.