Read koorete Anxuttaasiti 14 Bible Online

Anxuttaasiti 14 - koorete bible

Anxuttaasiti 14

¹Iqoniya katamaa Phawlosiyara Barnabasiyaray Ayhuda Bhikkilo Zawa gelli yaha <<Ha esi aadeko>> u hiyoro aallo u otine Ayhudaxitaara Ayhuda maaquwasitaaray Wonto u aadesso.

²Aadesso baa Ayhudaxiti Ayhuda maaquwasita Phawlose garaara Barnabase garaara densi u inxha'oronike u mato.

³Usini Laaxi gisha naassi zeerisine laga wonte yaha u dooddo. Wontoy axuse keenge maxo modhete ohe kato odusiya u yecha. Ye odusiya u yechoshi aade maaqesa Laaxi be osa ususe indi micusheshaara du'usesaara u hantoronike mati e addussicha.

⁴Katama axiti shahutti badey Ayhudaxitaara badey anxuttaasitaaraydi lam'e u kesso.

⁵Ye woggani Ayhuda maaquwasitaara Ayhudaxitaaray biya ahe afana maagitaara wolko Phawlosiyara Barnabasiyara iisesaara shuchuna iceshaara u wordo.

⁶Usini ye esa be erdo geede Liqa'oone wudiya bente Lisxhra katamakaara Darbe katamakaara u googe yese wudita badhi u hando.

⁷Yahani modhe odo u oto.

⁸Lisxhra katamaa toke doondese bidzi axi e yecha. Be yeluttosafa ayti qaadhese danda'uwasa e maaqicha.

⁹Phawlosey zeerusune mikke haysi e siicha. Phawloseni ye axe tiddhissi beedi <<Loolako ta loole>> hidi e aadexenike erdi

¹⁰<<Dendi gizzi ee'uwa!>> hidi orje katona e hidine ye adey doondi dendi hame e ayto.

¹¹Axitini Phawlosey hantosa be beedo wogga be kato keddaysi <<Nu wontiti axe bisshi nuuko yoodiko u yese!>> yeydi hissine Liqa'oonaxiti nuunana u koysso.

¹²Barnabase Diya, Phawlosey zeere durtechashe e maaqicho gisha esani Hermeene hissine be wontiti sunxe u sunso.

¹³Ye katama da'aa yese Diya hayla zawa kahiney maydo kormitaara fiire naddhi katama sumaa oodi axitaara wolla kundi Phawlosesaara Barnabasesaara kaasha uqusese u wordo.

¹⁴Anxuttaasita maaqe Phawlosiyara Barnabasiyaray ye esa be siido woggaa huulli be maa'ita feeddhi axi gara woxhisine kato keddaysi

¹⁵<<Gero, gero! Ame ha esa hi hante? Hinuni axe maaqenike nunini axuko. Haya nu yoodosi ha go'uwaa bassaafa zardi afani sahani bagadiyaara ussaa yeseesitaara uddi meddha yesona yese Wontoko hi maaqorosa modhe odo ohesuko.

¹⁶Garda beriti giddaa ha saha gara yese axiti be uddina beese be ogiyaannawo u hangusune beedi Wontoy mikku e hido.

¹⁷Mikku hidakoni be wontunte esuna addusese modhe hanta hante dhaddo baasso. Ye esini afaafa ira e bukusso, kaxay aafe kaxhe agunna e indo, kaxanaara magganaara hi muxhuro e doojhusho>> yeydi u hido.

¹⁸Yeydi zeerdakoni beese kaasha u uqusuwannike orje maddhanawo tuceshe u dandadho.

¹⁹Ayhudaxiti Anxhokiyafaara Iqoniyafaara yaha yoodi axita u gara u densine Phawlose shuchuna u icco. <<Haydhiko e yese>> hidi hissine katamaafa goosshi u kesso.

²⁰Maaqe baaka Laaxi oge hangeesiti e googe gooddi yesune dendi katamaa e gello. Guta Barnabasiyara Darbe katamaa e hando.

²¹Ye katamaakani modhe odo oti laga axita Laaxi oge hangeesita be mato geede Lisxhra, yahafa Iqoniya, yahafa Anxhokiya u maaddho.

²²Ye wudittaaka uddi Laaxi oge hangeesiti be aadexo gara miingorosa osusisiniyara minxisiniyara <<Wonto kaatetiya gelese laga maddha efeko nii e worguse>> yeydi u hicha.

²³Be godowa godowa yese Wonto zawa axituse cimitani u maagesso. Xhoondi Wonto be shidho geede aadexiya u yese Wontoy ususe worguse basuna maroronike Wonto oddeydi u shidho.

²⁴Phisidiya wudiyana gardi Phanfiliya wudiya u hando.

²⁵Pherge katamaa Wonto kato oti Axhaliya katamaa dhaddi u hando.

²⁶Ye e geedeni markabiya utti Sooriya wudiya yese Anxhokiya u maaddho. Anxhokiyafa buro Wonto hanta hantese u kesusune yaha yecha aadexeesiti Wontoy be maxo modhetena uso marorosa u shidhecha.

²⁷Yahani handi be ello woggaa Wonto zawa axita bidzi godo bhikkilli Wontoy usaara hantosa uddi Ayhuda maaquwadechashitini esa aadexoronike waydi suma e dodhosa u oto.

²⁸Ye e geedeni yaha Laaxi oge hangeesitaara laga wonte u dooddo.