Read koorete Anxuttaasiti 15 Bible Online

Anxuttaasiti 15 - koorete bible

Anxuttaasiti 15

¹Bidzi bidzi geriti Yuudaafa Anxhokiya handi <<Muse wogay ohenike gada hi utto baasa loolese danda'uwaytako>> hidi hissine aadexichashita u erusicha.

²Phawlosiyara Barnabasiyaray ye zeere gisha axitaara orjena bersiyakaara koysiyakara u yecha. Ye e geedeni Anxhokiya yecha aadexichashiti Phawlosiyara Barnabasiyara fede bidzi bidzi indo na'axhitaara Yerusaleeme handi ye zeere anxuttaasitusaara cimitusaara u ohorosa u anso.

³Hinne Wonto zawa axiti uso ansine handi Finqiyanaara Samariyanaara garsine Ayhuda maaquwasitini Wontoko maaddhosa u oto. Ye odoni aadexichashita uddi e maggusso.

⁴Yerusaleeme u elloniya Wonto zawa axiti anxuttaasitaara cimitaaray uso motto. Ye usitini Wontoy usaara yesine hantosita uddina u oto.

⁵Farasaxiti badefa aadexichashiti bidzi bidziti dendi <<Ayhuda maaquwasiti gada uttorosaara Muse woga u kaforosaara maheko bishesha>> yeydi u hido.

⁶Anxuttaasitaara cimitaaray ye zeere arsi beyese u bhikkilutto.

⁷Laga u berso geede Phexhrosey dendi eedhi <<Nuundo na'axhito, Ayhuda maaquwasiti ta garafa modhe odo siidi u aadexorosa hi giddaafa Wontoy burowo taa e xhardosa erako hi ere.

⁸Axi muxhuro ere Wontoy Ayaana Geeshe niise buro be indonike ususeni Ayaana Geeshe ingena uso be ekkenikeko e beyso.

⁹Aadexona u muxhuro e geessho, ni giddaakaara u giddaakaara bidzoni shaho mato baasso.

¹⁰Hinne nuwadiyaxhitani maaddhi nini iddese ni danda'uwa idda Laaxi oge hangeesiti shashaa iddussi Wontose ame hatte hi woosuttuwaane?

¹¹Ninini loollosi hade usukewo Laaxi Yesuusay axuse be keenge maxo modhetiyafa dendi niise hanto hantana e maaqenike aadekoydiko nu hine>> yeydi e hido.

¹²Yenniyani axitini uddina mikki hido. Barnabasiyara Phawlosiyaray usuna Wontoy Ayhuda maaquwasiti giddaa micusheshaara du'use hantaara e hantosa u zeerusune u hayso.

¹³Zeerdini u also geede Yayqoobey <<Nuundo na'axhito, siwwayte!

¹⁴Wontoy be sunxe xheyda gerita xharese Ayhuda maaquwasita acha woggaa modhussi e beedonike Simooney hatte zeerdiko yese.

¹⁵Ye esaarani wolko bisheshi kaayaxituna ohutta zeereko yesa. Ye esini

¹⁶<Ha e geede maaqoko ta maaqe, woddecha Dawite zawani keexhako ta keexhe, medhi guttechashini qachako ta qache, sekke matiko ta esse.

¹⁷Haankeysi ta mahesini fede geritaara ta sunxe xheydi Ayhuda maaquwasitaaray uddi Wonto u worgorosako.

¹⁸Olowafa ayti haanxho erusa Wontoy yeydiko e hine> yeydi hinesako e maaqicha.

¹⁹Ha e gisha ta maxoy <Ayhuda maaquwasiti Wontoko yoosune maddhunxuwanxhiko> hidiko ta yese.

²⁰Ye esukofa ususe diize nimba e worgusesi <Kaashutti tuneyda kaxa muudofita, laggettofita, shufutti e suuxi gutto baane gitutti haydha keemo acho muudofita, suuxeni usshofita> yeydi hinesako.

²¹Yeydi esume taydosini olowafa ayti Muse woga sanbatana sanbatana Ayhuda Bhikkilo Zawaa zeerususune se katama ha katama ohuttisine e yecho gishako>> yeydi e hido.

²²Ye e geedeni anxuttaasitaara cimitaaray Wonto zawa axitaara uddi be giddaafa oddhe axita xhardi Phawlosiyara Barnabasiyara Anxhokiya anxese wolko u kundo. Aadexeesiti giddaa durkena eruttecha Barsabaase hiyutte Yuudaara Sillaasiyara u xhardo.

²³Be diizechoshani usuna u anso. Ye diizuttechashini <<Nuni hinindo na'axhey anxuttaasitaara cimitaaray Anxhokiyakaara Sooriyakaara Kilqiyakaara yese Ayhuda maaquwa badefa aadexeesito, sawa modhiya hi yese?

²⁴Nu da'aafa bidzi bidzi axiti nu woosso baanne hinuko handi hinumba be erusoosuna u maddhunsonikiyara hi buro u baysonikiyara siidiko nu yese.

²⁵Ye e gisha woosaxita xhardi nu eehe indo na'axhitaara Barnabasiyara Phawlosiyara hinuko anxese bidzi muxhuronako wolko nu kundo.

²⁶Usini be lam'una Laaxi Yesuusi Kristosa gisha be yeso haybo aallo garsi indechashitako.

²⁷Yuudaara Sillaasiyara nu diizositawo nuunana hinuse u ohorosa ansiko nu yese.

²⁸Nuusaara Ayaana Geeshushaara modhe bisshi bentasi ha e oomo yese worguse zeerewo baaka fede deexho idda hinumba idduse worgusuwasso.

²⁹Kaashuttese kaxa muudofita, suuxeni ushofita, shufutti e hine suuxi gutto baa acho muudofita, laggettofita ye usitaafa uddi hinumba hi kattako modheko hi hanto. Modhena yesuwayte>> yeydi hinesako e maaqicha.

³⁰Woosuttechashitini u ansine Anxhokiya dhaddi u hando. Aadexichashitani be uddina bhikkilli diizuttechasheni usuko u indo.

³¹Ye esa be zeerusso geede be siido woossona orjena u maddo.

³²Yuudaara Sillaasiyaray kaayaxita[2] be maaqicho gisha aadexeesituse laga zeerdi uso osussi u minso.

³³Yahani oddhe wonte be decco geede aadexeesiti modhena ansine biya ansechaashituko maaddhi u yoodo.[3]

³⁴<<Silaasey <Hayako ta atte>.

³⁵Phawlosiyara Barnabasiyaramay fede laga axitaara Laaxi kato erusisiniyara ohisiniyara Anxhokiya u atto.

³⁶Oddhe wonte geedeni Phawlosey Barnabaseko <<Yoowwa, sekke maaddhi buro ususe Laaxi kato ni otecho katamittaa uddi yese aadexeesita nu beyyeese, waydi u yesesani nu erreese>> yeydi e hido.

³⁷Barnabaseni <<Marqoose hidi hiyutte Yohanise etti wolko nu hammeese>> hidi e hido.

³⁸Phawlosemay Marqoosey buro hamowa Phanfiliya usaafa shahutti atti hanta usaara also badecho gisha beera e hamorosa e inxhadho.

³⁹Hinne be bidzi bidzina wol garafa be shahuttoro aallo orjena wolla u berso. Ye e geede Barnabasey Marqoose etti markabena Qophrose hando.

⁴⁰Phawloseni Sillaase xhardo. Aadexeesiti Laaxi be maxo modhetena uso marorosa oddeydi Wonto u shidho geede dhaddi u kesso.

⁴¹Usini be godowa godowa yese Wonto zawa axitani osusisine Sooriya wudiyannaara Kilqiya wudiyannaara dhaddi u gardo.