Read koorete Anxuttaasiti 16 Bible Online

Anxuttaasiti 16 - koorete bible

Anxuttaasiti 16

¹Phawlosey Darbe katamakaara Lisxhra katamakaara e hando. Lisxhra bidzi Xhimootoose sunge Laaxi oge hangesi e yecha. Esindoy aadexe Ayhudaxhiyo i maaqusune esadeni Grikaxe e maaqicha.

²Xhimootooseni Lisxhraara Iqoniyaara yeseesiti da'aa e nashutticha.

³Esani Phawlosey beera etti hamese e wordo. Yaha yecha Ayhudaxiti Xhimootoosiyadey Grikaxe maaqesa ericho gisha usume hissine gada e uttorosa e mato.

⁴Phawlosiyara Sillaasiyaray se katamaanna ha katamaanna garisine Yerusaleeme anxuttaasitaara cimitaaray <<Yeydiko e maaqe>> hidi uydo zeere hanta gara u feysshoronike aadexeesita siisiya u yecha.

⁵Yeydiwo aadexichashiti be aadexona u miingicha. U taaboni wontana wontana kossi e hangicha.

⁶Phawlosiyaxhi Wonto kato Isiya wude u ohuwannike Ayaana Geeshi tuccinne Frigiya wudiyannara Galatiya wudiyannara dhaddi u gardo.

⁷Gardi Miisiya wude gelese e wosulaa be ello woggaa Biituniya wude hamese massi u yechoyne Yesuusa Ayaanay u hanguwannike e tucco.

⁸Yahafa Miisiyani gardi Xhiro'ada dhaddi u hando.

⁹Ye qama Phawlosey harajena bidzi Maqadoone wude axi <<Hana Maqadoone fotti nuu maruwa!>> yeydi hissine eedhi shi'iya yesesa e beedo.

¹⁰Ye haraje e harajho geede ye wude axituse modhe odo nu ohoronike Wontoy numba xheydosi nuuse gelline yenniyawo ye wude hamese nu naqutto.

¹¹Xhiro'adaafa markabiya utti sekke hanke arto badi Samitraqe hidi hiyutte dhaanaa nu hando. Yahafani geede wonte Naaphule katamaa markabena nu ello.

¹²Yahafani dendi Filphisoose nu yoodo. Ye katamani Maqadooniya wudiya yese orje katamaara Roomaxituna eedhese katamaarako e maaqicha. Yaakani oddhe wonta nu garso.

¹³Sanbata wonte Ayhudaxiti Wonto shi'ese bhikkiluttesa nuu e bisshinne katamaafa kessi shoore nuunaa handi yaha nu utto. Bhikkiluttecha indowaxhituse ohe nu gello.

¹⁴Siya yecha indowaxhittaafani be yeluttena Tiyaxhirone katamaxhiyo maaqe Lidiya sunge bidzi indoy yaha i yecha. Isini e woomay keddaydese zo'o maa'o i zal'icha. Wonto kuxe indo i maaqicha. Phawlosey zeeresa haysi i siyoronike Laaxi i muxhuro dodho.

¹⁵Isaara i zawaa yecha geritaaray xhamaqutto. Ye e geede isini << <Aadewo Laaxe aadessiko i yese> hidi taa hitta'ayko yoodi haya hi dece aallo taaso aquwayte>> hidi hissine nuu minsi shidhi i eehusso.

¹⁶Bidzi wonte shi'e godo nu hangusune buro gara maaqesa xhoozuna durkutti laaheticha bidzi maaki ogiya nuura i muto. Ye bushoy laahetona be laaxituse laga miijhe gelsesa i maaqicha.

¹⁷Isini Phawlosiyara nu yesune nu geede yoodi <<Ha geriti uddime afana maaqe Wonto maraxitako! Loolese danda'uso ogeko hinuko u ohe>> yeydi hissine i uwwicha.

¹⁸Ye esani laga wonte aallo mati mati i hicha. Hinne Phawlosey kuleydi be geede maaddhi xhooze <<Yesuusi Kristosa sunxuna <I garafa kessuwa!> hidiko tayne!>> yeydi e hine xhoozi yenniyawo datti kesso.

¹⁹Ye i laaxiti i badena beese yoocha miijhey ususe attosa be beedo woggaa Phawlosiyara Sillaasiyara u ayto. Goosshini axiti essa bhikkilutticho godo aandi ahiya yecha afana maagiti buro u uqusso.

²⁰Rooma kaati gaddecho maagiti gara oodi <<Ha geriti Ayhudaxitako, nu katamaako koyse u denxe.

²¹Rooma wude omma maaqe nuni efesaara hantesaara nu danda'uwa wogako u oduse>> yeydi u hido.

²²Axi lagani wolla kundi u gara u dendo. Ye maagitini u maa'o u garafa bon'i etti u duroronike u mato.

²³Laga uso be durdo geedeni tufe zawa u gelso. Kakkichashuko <<Oseydi kakkuwa!>> hidi u oto.

²⁴Ye e otosa be siido geede ye tufe zawa gidda geedena yese godowa gelsi u toke naquttese missaa gelsi minsi e tutto.

²⁵Qamaafa ekke wodhakka Phawlosiyara Sillaasiyaray Wonto shi'iyakaara zingaliyakaara u yesune yaha tufiya yecha feditini haysi u siicha.

²⁶Maxutto e baanne tufe zaway e gara keexhuttecho godoy jhigguttoro aallo sahay en'o. Sumitini be uddina bidzi woggaakawo u do'utto. Tufaxita tuttecha qangay u bidzi bidzi garafa e birchutto.

²⁷Kakkichashini be gehunsaafa birti tufe zawa sumiti do'uttosa be beedoniya tufaxiti kessi dhaddi baadosa esa e bisshinne satata densi biya wodhese e hido.

²⁸Hine Phawlosey <<Nu uddina hayako nu yese, ne gara abako matofuna!>> yeydi kato keddaysi e hido.

²⁹Ye woggaani kakkichashi faqe oowussi sena gidda gelli kobursine Phawlosesaara Sillaasesaara u buro deemona e undo.

³⁰Wudeni uso kessi <<Ta laaxito, ta looloronike am hante taa e worguse?>> yeydi e oycco.

³¹Usini <<Laaxi Yesuusa aadexuwa! Neera ne zawa geritaaray loolako hi loole>> yeydi u hido.

³²Usini esusaara e zawa axitusaara Laaxi kato u oto.

³³Ye qamani ye woggaawo kakkichashi usoni etti u mada e shoto. Esaara e zawa geritaaray yenniyawo be kumena u xhamaqutto.

³⁴Beeso etti handi kaxa muussi Wonto be aadesso gisha be zawa axitaara keddaysi e maddo.

³⁵Sahay wontine ye wude ahicha maagiti <<Ye gerita tufiyafa kessi dakkuwa!>> hidi hissine be yebita u anso.

³⁶Tufe zawa kakkichashini Phawloseko <<Hi kesorosako ahiyase afana maagiti axe ansese. Ha e gisha dhaddi kessi modhena hanguwayte!>> yeydi e oto.

³⁷Phawloseni <<Nuni Roomaxe maaqusune nu gara e yaa'utto baasa axiti buro tiddhiya durdiko tufe zawa nuu u gelsecha. Hidiya hatte aachiyaanna nu kesorosa nuu u mahe? Yeydi maaquwasso! Beenna yoodi nuu kessuttuwaye!>> yeydi sekke e mato.

³⁸Yebitini ye zeere ahicha maagituko handi u oto. Roomaxitani u maaqesa be siido wogga orjena u jhassho.

³⁹Yoodini u garafa maaro oycci tufe zawaafa uso be kesso geede ye katamaafani dhaddi u hamoronike u shidho.

⁴⁰Phawlosiyara Sillaasiyarani tufe zawafa kessi Lidiya zawa u hando. Yahani aadexeesita degessi <<Oseywayte!>> hidi be hido geede ye katamaafani dhaddi u hando.