Read koorete Anxuttaasiti 18 Bible Online

Anxuttaasiti 18 - koorete bible

Anxuttaasiti 18

¹Ye e geedeni Phawlosey Ateenaafa dendi Qorontoose katamaa e yoodo.

²Yahani Phanxhosaxe maaqe Aqila hidi hisso bidzi Ayhudaxe e degesso. Ye esini Rooma kaati Qelawdooseni <<Ayhudaxiti uddi Roomafa kesuttuwaye!>> hidi u kesorosa oti e yecho gisha oddhe wonta buro be machi Pharsiqilaara Xhaaleyafa e yoodecha. Phawlosey handi usaara e erutto.

³E hantani usukewo maa'o zawa sife e maaqicho gisha usaara wolla yessine maa'o zawa sife e ayto.

⁴Sanbata wonte wonte Ayhuda Bhikkilo Zawa yoodi Ayhudaxitaarani maaqqe Grikaxitaara wolla zeerdi <<Aadeko>> hidi u hiyoro aallo mahese e kardutticha.

⁵Sillaasiyara Xhimootoosiyaray Maqadoone wudiyafa yoodoniya Phawlosey <<Yesuusay Mesiheko>> hidi Ayhudaxituse e ohichosha baaka feda hantuwadiko e yecha.

⁶Ayhudaxiti esa inxhadhiniyara cashiniyara be maa'o yaha tigissi <<Hi yaa'utto'ayko hinunnana hi gara hi oodo yaa'ako. Tani essaa baasso. Yoonase Ayhuda maaquwasitukoko dhaddi ta hange>> yeydi e hido.

⁷Yahafani kessi e zaway Ayhuda Bhikkilo Zawa da'aa maaqe Wonto kuxe Titose Yostose hidi hisso adeso handi e gello.

⁸Qarsaphase sunge Ayhuda Bhikkilo Zawase afana maagay be zawa axitaara uddi Laaxe u aadesso. Phawlosey ohichosha siidini Qorontoose laga axiti aadessi u xhamaqutto.

⁹Bidzi qama harajena Laaxi Phawloseko <<Tani neerako yese, ooneni ne gara iita hantese dendesi baasso. Jhasshofuna, ohuwa, mikki hidofuna! Taase maaqe axiti ha katamaa lagako yese>> yeydi e hido.

¹¹Ye e gisha Phawloseni Wonto kato erusisine bidzi beraara izzuppi agunnaara yaha e utto.

¹²Akkaya wude Galiyosey ahichoniya Ayhudaxiti wolko kundi Phawlose gara u dendo. Esani yaa'a zawa aandi

¹³<<Ha axi nu wogay eehuwa ogena Wonto axi kuxoronikeko hanti erussi beeko mahiya e yese>> yeydi u hido.

¹⁴Phawlosey zeerese haga hineniya Galiyosey Ayhudaxita <<Ha Ayhudaxito! Hi luutto luufose hi gara e hanto miidhay oo'oyne iita abakoy yessako hi zeere dandadhiko ta siyaane.

¹⁵Bidzi kato degessi e gara, bidzi abako sunxe degessi e garaara hi woga garaara bersesa hi maaqo'ayketese ye esi hinuse hinuni alsesako, ha e bisha gara tani yaa'ese worguwasso>> yeydi e hido.

¹⁶Ye esani oti yaa'aafa uso e kesso.

¹⁷Be uddina Ayhuda Bhikkilo Zawa afana maaga maaqicha Sostenese yaa'aade buro u durdo, yenniyani Galiyosey abani washiya gaduwadiko e yecha.

¹⁸Phawlosey Qorontoosiya aadexeesitaara laga wonte be dooddo geede uso sawussi markabiya utti Pharsiqilaara Aqilaara Sooriya hame e gello. Be saallecho gisha e saaloy esuna eruttorosa Kinkira'oose katamaa be qino e meedusso.

¹⁹Efesoone katamaa handi u ello. Pharsiqilaara Aqilaaray yaha u atto. Phawlosey Ayhuda Bhikkilo Zawa handi Ayhudaxitaara e zeericha.

²⁰Laga wonte aallo yaha e dooggorosa u shidhinne e inxhadho.

²¹<<Wonto maxo e maaqo'ayko fede wonteko hinuko ta yoowe>> hidi hissine Efesoonefa uso sawussi markabiya utti dhaddi e hando.

²²Qesaariya be ello geede yahafa Yerusaleeme handi Wonto zawa axita sawussi Anxhokiya e yoodo.

²³Yahani oddhe wonte be dooddo geede sekke dendi Galatiya wudiyakaara Frigiya wudiyakaara seya haya hanti Laaxi oge hangeesita uddi e osusicha.

²⁴Aphilose hidi hisso Iskindiriya katama yelutte maaqe bidzi Ayhudaxi Efesooniya e yoodo. Esini Wonto Hayla Fissharo modhussi erdesesaara zeerena eruttese axaarako e maaqicha.

²⁵Laaxi ogese axi esa erusesako e maaqicha. Esini zeerese Ayaanana meggutti Yesuusa gisha aadewo ohiyakaara erusiyakaara yesine Yohanise xhinqate gishawo e ericha.

²⁶Ayhuda Bhikkilo Zawaa naassi zeere e ayto. Pharsiqilaara Aqilaaray ye e zeerdosa be siidoniya be zawa etti handi Wonto oge burome garsi esuse modhussi gelsi u oto.

²⁷Akkaya wude hamese Aphilosey massoniya Wonto aadexeesiti e maxo u kiiddho. Laaxi oge hange ye wude yechaashiti modhussi mokkorosa diizzi esuko u indo. Handi be elloniyani Wontoy axuse keenge maxo modhetiyafa dendasuna aadesaasita e mardo.

²⁸Yesuusay Mesihe maaqenike Wonto Hayla Fissharowafa addussi ohisine be zeeresa u dheegge aallo laga axi buro bersi Ayhudaxita e iichicha.