Read koorete Anxuttaasiti 19 Bible Online

Anxuttaasiti 19 - koorete bible

Anxuttaasiti 19

¹Aphilosey Qorontoose yesune Phawlosey Isiya feeqaanna bursi gardi Efesoone e yoodo. Yaakani Laaxi oge hange oddhe gerita degessi

²<<Hi aadessoniya Ayaana Geeshe ettiya hi yecha?>> yeydi e oycco. Usini <<Ettobaanxhiko, fetto Ayaana Geeshi yesesani siidi eruwanxhiko>> yeydi u hido.

³Phawloseni <<Hinne aba bisha xhinqateni hi xhamaqutto?>> yeydi oycine usini <<Yohanise xhinqateko>> yeydi u hido.

⁴Esini <<Yohanise xhinqatemay be cubbo dhaddi u maaddhosi esuna eruttesako e maaqicha. Yohanisey zeerisine <Ta geede yoonesa aadexuwayte!> yeydiko e hidecha. Ye e hidechoshini Yesuusako>> yeydi e hido.

⁵Ye esani be siidoniya Laaxi Yesuusa sunxuna u xhamaqutto.

⁶Phawlosey be kuche u gara gaddo wogga Ayaana Geeshi u gara yoodine kille nuunana zeere u ayto, kaayoni u zeerdo.

⁷Ye geritini tamma lam'e ellesako u maaqicha.

⁸Haydzi agunna aallo Phawlosey uddi wogga Ayhuda Bhikkilo Zawa handi axaara sekke hanke mati zeerisine Wonto kaatete gisha ohuttase <<Aadeko>> hidi u eforosa uso mahisine naassi e erusicha.

⁹Bidzi bidziti e otosa inxhadhi <<Aadexuwanxhiko>> hidi u hido gishaara Wonto oge axi buro u cassho gishaara usaafa dhaddi e kesso. Laaxi oge hangeesita ussaafa shati beera etti handi Tironose sunge ade erunxi zawaa wontana wontana usaara wolko zeere e arxicha.

¹⁰Lam'i bera aallo yeysi e mato gisha Isiya yecha Ayhudaxitaara Ayhuda maaquwasitaaray be uddina Laaxi kato u siido.

¹¹Wontoy Phawlose kuchiya keddaysi micushe hanta e hanticha.

¹²Phawlose gara dolla maarabe oo'oyne maa'o etti hargaxita esuna u dolete be hargiyafa u loolicha, xhoozini uso datti dhaddi hangicha.

¹³Bidzi bidzi Ayhudaxiti seyna hayna hanti xhooze axi garafa goodeesiti <<Phawlosey ohicho Yesuusa sunxunako niya ta ohe, kesuwa!>> yeydi hissine Laaxi Yesuusa sunxe beese mahena xhoozita goodese u hicha.

¹⁴Kahinituse afana maaga maaqe Ayhudaxi Asqeway laappi nayshe e keengicha. Ye usini yeysi u mahicha.

¹⁵Maaquwaye baaka xhoozi <<Yesuusani erako ta ere, Phawloseni erako ta ere. Hinunichi? Ooniyaxhitani hinuni?>> hidi uso e hido.

¹⁶Xhoozi e gara yecho axi u gara doondi kardutti uso iisshine usini ye zawafa gundusewo zaydutti woxxhi u badho.

¹⁷Ye esani Efesoone yecha Ayhudaxitaara Grikaxitaaray uddi siidi orjena u jhassho. Laaxi Yesuusa sunxeni kedda kedda uyso.

¹⁸Yenniya Wonto aadesechashitaafa lagiti iita be hanta addaanna bazzisine yoowiya u yecha.

¹⁹Qayaxitaafaara xhoozi osana micushe hanta hanteesitaafaaray lagiti essaaka beedi be hanticho fissharo bhikkilli laga axiti buro tamana u meddo. Ye fissharo woomani maxusune ichichi tammi kuma birre maaddhi e bento.

²⁰Ye ogenani Laaxi katoy orjena iishiyara aattiyaara hamiya e yecha.

²¹Yeenxhi uddi maaddho geede Phawlosey Maqadooniyanaara Akkayanaara Yerusaleeme beese hamese massi <<Yaha ta elloyna Rooma hameko taa e worguse>> yeydi e hido.

²²Beera hantichaashitaafa lam'e Xhimootoosiyara Erasxhoosiyara Maqadooniya ansi Phawlosey beese Isiya oddhe wonte e decco.

²³Ye woggaani Laaxi oge gisha keddaydese koysi Efesoone katamaa e dendo.

²⁴Bidzi Dimexhrose hidi hissoosi birre hashushi naqesi e yecha. Esini <<Arxhemise>> hidi hiyutte u wontose i hayla zawa bisha naddhi hashushi naqeesituse laga miijhe e gelsicha.

²⁵Ye hashushi hantichaashitaara ye usukeydi hanticha feditaara bhikkilli <<Gerito! Ha hantana laga miijhe ni degexesa erako hi ere.

²⁶Phawlosey <Ha esi axi be kuchena hantosi wonto maaquwasso> hidi hissine Efesooniyawo e maaddho baane oddhe wudewoy attosa baaka Isiyafa an aallo laga axita <Aadeko> hidi u hiyoro aallo beera bidzo e matosa hi aafenani beediko hi yese hi washenani siidiko hi yese.

²⁷Ha ogenani ni hantay haassuttesuko e hine. Ye esawoni maaquwasso, Isiyakaara saha aallowaara yese axi uddi iso kuxicho angussi wonto maaqicha Arxhemise hayla zaway kuxa keenguwasa attesuko e hine, i fuulay bayesuko hine>> yeydi e hido.

²⁸Axitini ye esa be siidoniya iitana huulli <<Efesoone Arxhemisey anguzziyoko!>> hidi uwwe u ayto.

²⁹Ye katamaa yecha axiti be kumena u koysso. Axitini Phawlosiyara hamiya yecha Maqadoonaxita Gaayoosiyara Aristrokosiyara ayti goochishine malla u Bhikkilo Zawa etti u woxxho.

³⁰Phawlosey bhikkiluttese axuko hamese e hine Laaxi oge hangeesiti oosso.

³¹Isiya wude afana maagitukafa esa eehicha bidzi bidzi axita esuko ansi <<Axi bhikkilutte godo handofuna!>> hidi hissine u shidho.

³²Axi giddaa laga koysi yecho gisha fetto abase be bhikkiluttosa lagay eruwadiko yecha. Bidzi ha esuse uwwusune feday assi se esuse u uwwicha.

³³Ayhudaxiti Iskindire hidi hisso axi buro gardi e zeeroronike esa ur'iya u yecha. Axiti giddaafa bidzi bidziti e zeerorosa u wordo. Esini ha essaafa kessese be kuchena beysi zeerese e naqutto.

³⁴Maaquwaye baaka axitini uddi Ayhudaxe e maaqesa be erdoniya <<Efesoone Arxhemisey anguzziyoko>> hidi hissine bidzo maaddhi lam'i saate aallo u uydo.

³⁵Ye katamase afana maagay axe mikki beyso geede <<Efesoone gerito! Ha katama axiti anguzziyo maaqe Arxhemise hayla zawaara afaafa hoddha i bishaara kafiya ni yesesa ha saha gara eruwa axi ooni yesa?

³⁶<Ha esi zaadeko> hidi hiyese ooneni danda'uwa gisha mikki hiyorosaara alleydi abakowa hi geleeme hinumba hi kaforosaarako e worguse.

³⁷Ha etti hi yoodese axiti hayla zawafa abako kaysutto baase, nu wonto cashutto baase.

³⁸Dimexhrosiyara esuke hantichaashitaaray u luuke axi yesa'ayko yaa'a wonteni yesako yese, hay yaa'eesitini yesako yese, yaha luufuttuwaye!

³⁹Fede hi worge zeerey yesa'ayko kaati wogana bhikkilutte axuko bircheshe danda'esa.

⁴⁰Hanzo maaddha zeerena <Koysuko u densese> hidi hiyutti luufutto badi dhagguwanxhiko hidi jhashoko nu jhashe. <Ha koysi ame dendo?> hidi axi nuu oyccako sekke nu mahe basi baasso>>

⁴¹yeydi e zeerdo. Ye e geede bhikkiluttecha axita e buddo.