Read koorete Anxuttaasiti 20 Bible Online

Anxuttaasiti 20 - koorete bible

Anxuttaasiti 20

¹Koysi toydo geedeni Phawlosey Laaxi oge hangeesita bidzi godo xheygussi uso e osusso. Ye e geedeni uso sawussi Maqadooniya dhaddi e hando.

²Ye be hando godowa godowa uddi aadexichaashita lagana osussisine Grike wude e ello.

³Phawloseni yaha haydzi agunna e dooddo. Ye e geedeni markabena Sooriya hamese e masso. Ayhudaxiti be gara kundesesa be erdo geede Maqadooniyana gardi hamese e masso.

⁴Phawlosiyara handasiti Xhimootoose, Beriya katamaxe maaqe Phiirose yele Sofatere, Teselonqe katamaxita maaqe Aristrokosiyara Sikondosiyara, Darbe katamaxi Gaayoose, Isiya wudiyafa Tikiqosiyara Trofimosiyara u maaqicha.

⁵Ye usitini buro gardi Xhiro'ada nuu u katto.

⁶Helto Boora Massalay gardo geedeni nuni Filphisoosiyafa markabiya utti Xhiro'ada ichicho wonte uso nu ello. Laappi wonte yaha usaara nu garso.

⁷Samintiyafa acha wonte Laaxi qamete miyese bidzi godo nu bhikkilutto. Phawlosey guta hamese beyne gisha bhikkiluttecha axuse zeere gelli ekke wodhakka aalloni e galalso.

⁸Ye essaa bhikkiluttecho fooqiya laga faqey e yecha.

⁹Awtikose hidi hiyutte mullay maskoote gara e utticha. Phawlosey zeere galalsine dossey esa ayti iisshine e geto. Gehiya yechine haysso fooqiyafa yedena sahaa e undo. Axitini esa densine haydhesesa e maaddho.

¹⁰Phawloseni hodhi ye mulla gara zuddi beeko udundi <<E lubboy yesako yese du'eydofita>> hidi e hido.

¹¹Phawlosey fooqe zawaa wokke kessi aadexichashitaara wolla boora meyssi Laaxi qamete be muudo geede e wonto aallo usaara wolla zeerisine e decco. Ye e geedeni dhaddi e hando.

¹²Ye haydhechine denda na'eni etti u hando, ye esunani orjena u maddo.

¹³Phawlosey Asoone aallo beese tokena hamese be wordo gisha esume buro markabena esa yaha efese nu hamoronike e matine nuni ye katamaa markabena hame nu ayto.

¹⁴Asooneni esaara wolla nu mutoniya markabiya e gelline Mixhiline wolko nu hando.

¹⁵Yahafani guta dendi Kiiyose da'aa yese godowa handi nu ello. Sahay wontine Samoose handi guta Milixhine nu fotto.

¹⁶Phawlosey Phenxheqoste Massalay kuxutte wonte Yerusaleeme bentese be wordo gisha alleydi yaha ellese Isiya wudiya wogga garxeeme Efesoone gello badi gardi hamese e wordo.

¹⁷Phawlosey Milixhiniyafa Efesoone axe ansi Wonto zawa cimita e xheygusso.

¹⁸Esuko u yoodoniyani zeere e gello. <<Isiya ta hando wontiyafa ayti uddi wogga waydi hinunaara ta yechosha erako hi ere.

¹⁹Ayhudaxiti ta bakka kundi maddha u oodakoni fetto ta qino ullaysi aafunxunako ta Laaxuse ta hanticha.

²⁰Hi bhikkilo godowani maaqqe hi zawaaka seya haya erusisine hinumba go'esa uddi hinuse ta otosa baaka abani shato baasso.

²¹Ayhudaxitani maaqqe Ayhuda maaquwasitini be cubbo dhaddi Wontoko u maaqoronikiyara nu Laaxi Yesuusa u aadexoronikiyarako ususe minsi ta oto.

²²Hatteni Ayaana Geeshi <Hanguwa!> hidi taa woosineko Yerusaleeme ta hange. Abay yaha tamba ellesa eruwasso.

²³Yeydi e maaddhakoni aya katamani taase Yerusaleeme ta tufuttenikiyara maddhay taa elleninkiyara Ayaana Geeshi ohiyako e yese.

²⁴Gafiya ta yese gafani ye esini Laaxi Yesuusay ta hantoronike indo hanta ta alsoro aallo ta lubbose bidzoni hoodduwasso. Ye ta hantani Wontoy axuse keenge maxo modhete adduse modhe odo oheko.

²⁵Hatte aallo hi giddaaka sekke hanke hanti Wonto kaatete gisha ohisine hinunaara decciko ta yecha. Ha e geedema sekke ta aafe hi beewanike erako ta ere.

²⁶Ha e gisha hinukafa bidzi baatta'ayko ye suuxi gisha oycuttesa ta maaquwannike hay hanzo wontaako hinuse ta ohe.

²⁷Wonto maxo uddina hinuse addusekofa tamba ta katto woggay baasso.

²⁸Ayaana Geeshi Wonto bade maaqeesita uddi hi kaforonike hinumba maagessiko e yese. Yoonase hinunaara axitaara modhussi kakkuwayte! Laaxi beese be garafa gutta suuxuna e wozzo Wonto zawa axita kakkuwayte.

²⁹Ta hando geede hade focci muune sudhamuke axe higiluwasiti hinukaaka u gelenikiyara yeydiwo hi giddaafa bidzi bidziti dendi Laaxi oge hangeesita beeko mahese dooma era u erusenikiyara erako ta ere.

³¹Haydzi bera aallo qamaara wontaara yeekisine waydi yese hinumba e worgusenike eruse ta dhaddo baasa maxisine birti oseywayte.

³²Hatte Wontoy worguse basuna hinumba maroronike hi gisha Wonto oddeydiko ta shi'e. Esi axuse keenge maxo modhete ohe kato odde maxuwayte. Ha katoy hinumba dicheshaara Wontoy hayla mato axitaara wolko e inge tago nu eforonike mahesaarako.

³³Oone garafani worqeni birreni maa'oni wordo baasso.

³⁴Ta kuchena hantisine taaseni maaqqe taara yechashitani worgusesa degessi gadiya ta yechonike erako hi ere.

³⁵<Ekkesume ingesi suuzuttesesako> yeydi hinne Laaxi Yesuusa kato maxena nu kuchena hanti jheetaxita mare e worgusenike laga ogena hinumba beysiko ta yese>> hidi e hido.

³⁶Yeydi be zeerdo geede Phawlosey u uddiyara bocunti Wonto e shidho.

³⁷Be uddina orjena u yeetto. Beeko aytini u muuxxho.

³⁸Fetto esume u higillosini <<Ha e geede sekke ta aafusha beewaytako>> hidi e hido gishako e maaqicha. Ye e geedeni markabe aallo esa aandi u aasso.