Read koorete Anxuttaasiti 21 Bible Online

Anxuttaasiti 21 - koorete bible

Anxuttaasiti 21

¹Yenniyani u garafa nu shahutto geede markabiya utti sekke hanke arto badi Qoosse dhaanaa nu hando. Guta Roode dhaanaa nu ello. Yahafani Phaxhira katamaa nu yoodo.

²Finqe wude hange markabeni yaha degessi essaa utti hame nu ayto.

³Qophrose dhaana aafena nu beedo geede hadursi bade datti nu gardo. Sooriya wude hangisine markabiya yechashiti Xhirose katamaa be idda hoxese u worgicho gisha yaha nu yoodo.

⁴Yahani Laaxi oge hangeesita wordi nu degesso geede laappi wonte u da'aa nu decco. Usini Ayaana Geeshuna durkutti Phawloseko <<Yerusaleeme handofuna>> hidi uydo.

⁵Yaha nu decco geede dhaddi hamese nu hine nu kesusune be uddina be maacaara be nayshitaara katamaafa wude aallo nuura u yoodo. Bagade da'aa bocunti Wonto nu shidho geede

⁶wola sawussi nuni markabiya gelli uttinne usini be zawa dhaddi u maaddho.

⁷Xhirose katamaafa dendi bagade garana nu hangicho oge alsi Phexhelemase katamaa nu ello. Wonto aadexeesitaara wola sawussi u da'aa bidzi wonte nu feyssho.

⁸Yahafani guta dendi Qesaariya nu ello. Laappukafa bidzo maaqicha modhe odo ohe axe maaqe Filphoose zawaa gelli yaha nu decco.

⁹Esuseni kaayo zeere oyddi woduraxhey u yecha.

¹⁰Laga wonteni yaha nu utto geede bidzi Agaaboose hidi hisso kaayaxi Yuuda wudefa e yoodo.

¹¹Ye kaayaxi nuuko yoodi Phawlosey esuna gixhichosha etti be kucheni be tokeni tutti <<Ayaana Geeshi <Ha esuna gixhicha axe Yerusaleeme yese Ayhudaxiti ha esukeysi tuttiko Ayhuda maaquwasituse garsi u inge> hidiko e hine>> yeydi e hido.

¹²Ye esani nu siido woggaaka numbani maaqqe yaha yecha axiti Phawlosey Yerusaleeme hanguwannike nu shidho.

¹³Hinne esi <<Ame hi yeeke? Ame ta muxhuro lam'e kessi higilsaa taa hi gelse? Tani Yerusaleeme tufuttewo e maaddho baane Laaxi Yesuusa sunxuna hay'eseni naquttiko ta yese>> yeydi e hido.

¹⁴Nu shidhine siye e dheeddine <<Yey Wonto maxo maaquwaye>> yeydi hissidi mikki hidi nu dhaddo.

¹⁵Oddhe wonte geedeni nuu naddhi Yerusaleeme nu hando.

¹⁶Qesaariya katamaa yecha Laaxi oge hangeesitafa bidzi bidziti nuura u yoodo. Burowafa ayti aadexicha Minasooneso nu yesorosa yaha nuu u aando. Esini Qophrose dhaanaxuko e maaqicha.

¹⁷Yerusaleeme nu elloniyani aadexichashiti maggana nuu u motto.

¹⁸Gutani Phawlosey nuura Yayqoobe da'aa handinne Wonto zawa cimitini uddi yaha u yoodo.

¹⁹Phawloseni uso be sawusso geede Wontoy e marona Ayhuda maaquwasiti giddaa hantosa e bidzi bidzina e oto.

²⁰Ye e otosani be siidoniya Wonto u galatto. Ye e geedeni <<Nuundo na'o! Beewwa, laga kumana taabutti yese Ayhudaxitako Laaxe ettesa. Ha usiti be uddina Muse wogase eedheseesitako.

²¹Neni Ayhuda maaquwasiti giddaa yese Ayhudaxita uddi <Nayshita gada uttussofita, wogani kattofita> yeydi erusiko Muse woga u dhaborosa ne mahe hidi hisoosa siidiko u yese.

²²Ne yoodosa siido badi dhagguttuwasso. Hinne am nuuse bishesha?

²³Ha e gisha nu ohenike hantuwa. Saalo keenge oyddi geritako nu gidda yesa.

²⁴Uso etti usaara wogay ohenike niya geeshuwa. Be qino u meedusorosani wooma shanguwa. Yeysi ne hantete ne gara odusutta odoy yaho e maaqesaara nenini Muse woga ne kakkesaara uddinako u ere.

²⁵Ayhuda maaquwa aadexeesituse <Kaashashe kaashuttese kaxa muudofita, suuxeni usshofita, shufutti e hine suuxi gutto baa acho muudofita, laggettofita> hidi hinesa diizzi ansiko nu yese>> yeydi u hido.

²⁶Hinne Phawlosey guta ye gera etti handi bemba geeshe woga alsese usaara biya geejjhe e ayto. U geejhe wontay ayde e aalesaara u bidzi bidzise kaashay an wonte inguttesaara ohese Wonto Hayla Zawaa e gello.

²⁷Laappunxo wontay aale uddhine Isiyafa yoodecha Ayhudaxiti Wonto Hayla Zawaa Phawlose beedi axita uddi koyssuse densi <<Isra'eele gerito! Nuu maruwayte! Nu axitani, Muse wogani, ha Wonto Hayla Zawa u inxha'oronike uddi godo uddi axe erusiya yesesi ha axuko. Ye esi ello baasso hidiko ha hayla zawaa Grikaxitani gelsi hayla godo e dhohusso>> yeydi uwwussine esa u ayto.

²⁹Esume yeydi u hidosini Efesoonaxe maaqe Trofimose buro Phawlosiyara katamaa be beedecho gisha Wonto Hayla Zawaa etti e yoodosa uso e bisshineko.

³⁰Katamaxitini uddi koysi be yechoyna woxxhi yoodi u bhikkilutto. Phawloseni ayti Wonto Hayla Zawa karaafa goosshi kessi yenniyawo qeyshi gasa u ayso.

³¹Esani wodhese uydine <<Yerusaleeme katamaako koysi undese>> hidi hine woossoy Rooma toorase afana maagako e hando.

³²Hinne tooraxitaara xhiixi gara afana maagitaraysi etti ye geriti gara e woxxho. Usitani be beedoniya ye geriti Phawlose be durichosha u dhaddo.

³³Ye afana maagani yoodi Phawlose ayti <<Lam'i sansalatena tukkuwayte!>> hidi e hido. Oone e maaqesaara aba e hantosaara erese e oycco.

³⁴Axitaafani bidzi bidziti seesa haasa u hicha, afana maagani axi koysine abaydi uynesi esuse gele dheeddine <<Phawlose tooraxiti yese godo aanguwayte!>> hidi e hido.

³⁵Phawlosey be deemena deemena yese keela elli e yesune axiti uddi e gara dendese iitana ur'iya u yecho gisha tooraxiti iddi etti u hando.

³⁶Axitini <<Wodhuwayte!>> hidi uwwisine hamiya u yecha.

³⁷Tooraxiti be godowa aandi esa gelse u uddhesune Phawlosey toorase afana maagako <<Bidzi zeere neeko ta zeerreese>> yeydi e hido. Afana maagani <<Grike nuuna era ne ere?

³⁸Hinne ukke woggaa toora densi <Axe woddhechashita> hidi hiyutticha oyddi kuma axe etti saha melaa kessecha Gibxhaxi niya maaquwaye?>> yeydi e oycco.

³⁹Phawloseni <<Tani Ayhudaxuko! Kilqiya wude yese eruttese Xharsese katamaako ta yelutto. Ha axuse ta zeerreese hidiko nemba ta shi'e>> hidi e hido.

⁴⁰Esini Phawlose <<Zeeruwa!>> hidi e hinne kedda godowa eedhi axi mikki hiyorosa kuchena e beyso. Mikki uydo geede Ibrayste nuunana zeere e ayto.