Read koorete Anxuttaasiti 22 Bible Online

Anxuttaasiti 22 - koorete bible

Anxuttaasiti 22

¹<<Nuundo na'axhito, nuwadiyaxhito! Ta hanto baysoy baannike hi erorosa hinuse ta zeerete siwwayte>> yeydi e hido.

²U nuunana e zeerusune siidi burome fetto mikku uydo. Phawloseni zeerisine

³<<Tani Kilqiya wudiya Xharsese katamaa yelutta Ayhudaxuko. Ta diccoshini Yerusaleeme katamaako. Gamaliya garafa niyadiyaxhiti wogani e yesenike shato badi naddhi modhussi erdi hanzo hinuni hantenikeko Wontose eedhesesa ta maaqicha.

⁴Ha Laaxi oge hangeesita u hay'oro aalloko waayye uso ta beysicha. Asanxitani maachitani tuttiko tufe zawaa u geloronike ta mahicha.

⁵Ye esi aade maaqesa kahinituse afana adiyara gate aheesitaaray be kumena taase atoko. Usini Damasiqo yecha beenkeydese Ayhuda maagituse be diizzicho diizzo u indine etti Damasiqo yecha aadexeesita tutti Yerusaleeme oowesaara u gara yaa'usesaarako ta hangicha.

⁶Handi Damasiqo katama ta uqusune ta masso baane surinte saatawwa orje fo'ey afaafa ta googe e faddho.

⁷Yenniyani sahaa ta undo. <Sawle, Sawle, ame waayye taa ne beyse?> yeydi hinne kato ta siido.

⁸Tanini <Ta laaxo, neni oonewa?> yeydi ta oycco. Esini <Tani goodiya ne yese Nazrataxi Yesuusako> yeydi e hido.

⁹Taara yechashitini fo'e u beedosa baaka taa e zeerususune e kato siyutto baasso.

¹⁰Tanini <Laaxo, waani tayye?> hidi tayne Laaxi <Dendi Damasiqo hanguwa! Ne hantorosa neese maxutteseesiti uddi yahako neese ohutte> yeydi e hido.

¹¹Fo'ey laci laci hidi ta aafiya caddosuna beye ta dheeddinne taara yecha geriti ta kuche ayti goochishine Damasiqo u aando.

¹²Hanaaniya hidi hisso bidzi axini yaha e yecha. Ye adeni yaha yese Ayhudaxiti be uddina esa nashesha Muse woga modhussi kakke kuxuttese axuko e maaqicha.

¹³Esini ta da'aa yoodi eedhi <Nuundo na'o, Sawle! Ne aafey beewaye!> yeydi e hido. Tanini yenniyawo ta aafey beedine esa ta beedo.

¹⁴Esini <Nuwadiyaxhiti Wontoy e maxo ne eroronike gizo maaqe esa ne beyoronikiyara e kato ne siyoronikiyara burowoko niya e xhardecha.

¹⁵Yeysini niya e matosi ne beedosaara ne siidosaara esuse ato maaddhi uddi axuse ne ohorosako.

¹⁶Hinne ame hatte ne doogge? Dendi e sunxe xheydi xhamaquttuwa! Ne cubbowafa shohuttuwa!> yeydi e hido.

¹⁷Yerusaleeme hanke maaddhi Wonto Hayla Zawaa Wonto shi'ichine harajena ta beedo.

¹⁸Hinneko Laaxi taase benti <Ta gisha ne ohesa u siwwa gisha Yerusaleemefa ukke kesuwa!> hidi e hido.

¹⁹Tanini <Laaxo, Ayhuda Bhikkilo Zawa handi niya aadexichashita ta tukkichonikiyara ta durichonikiyara usini beese erako u ere.

²⁰Ne gisha ohicha Isxhifanoose u woddhoniya tanini ye woddhaasiti maxo eetiko yaha eedhi u maa'o ta kakkicha> yeydi ta hido.

²¹Laaxini <Zara yese Ayhuda maaquwasituko niya ta anxe gisha dendi hanguwa!> yeydi taako e hido>> hidi Phawlosey hido.

²²Phawlosey zeerusuneni axiti haysichine u giddaafa be kato keddaysi <<Haanke yesesi saha bakkaa e yesorosa worgusuwasso, hay'uwaye!>> yeydi hissine u uydo.

²³Be maa'o wora datti xhuure etti afaa buddisine u uwwicha.

²⁴Toorase afana maagani yenniya ye esa beedi Phawlose tooraxiti essaa yese godowa u gelsorosa e oto. Abase axiti e gara ha e makko u uydosa erese <<Duruwayte bazzeese!>> hidi e hido.

²⁵Lohana kuche toke e oge oge tutti durese uysune Phawlosey be da'aa yecha xhiixi gara afana maaga <<Roomaxe maaqe axe e gara e yaa'utto baanne hi duroronike kaati wogana maaddhiya e yese?>> yeydi e hido.

²⁶Xhiixi gara afana maagay ye e otosa siidi be afana maagako handi <<Aba hantiya ne yesesa erdiya ne yese? Ha axi Roomaxema!>> hidi e hido.

²⁷Hinne ye maagay Phawloseko yoodi <<Mee, taako ohuwa, neni Roomaxuwa?>> hidi e oycco. Phawloseni <<Eewwa!>> hidi e hido.

²⁸Afana maagay <<Tani Roomaxe maaqese laga miijheko ta shando>> hidi e hinne Phawlosey <<Tani ta yeluttowafa ayti Roomaxuko>> hidi e hido.

²⁹Esa durdi bazzusese naquttechaashiti yenniyawo e da'aafa dhaddi u hardo. Afana maagani Roomaxe maaqichashe lohana be tuttosa erdi e jhassho.

³⁰Toorase afana maagay Ayhudaxiti Phawlose esuna luuttosa addussi erese wordi guta kahinituse afana maagitaara gate aheesitaara be uddina u bhikkiluttorosa e oto. Phawlose tufiyafa birshi aandi u buro e uqusso.