Read koorete Anxuttaasiti 23 Bible Online

Anxuttaasiti 23 - koorete bible

Anxuttaasiti 23

¹Phawloseni yaa'ichashituko tiddhissi beedi <<Nuundo na'axhito, hanzo wonta aallo Wonto buro geeshi muxhuronako ta yese>> yeydi e hido.

²Kahinituse afana ade maaqe Hanaaniyay Phawlose da'aa ee'ichashita <<E nuuna baquwayte!>> hidi e hido.

³Yenniyani Phawlosey ye adese <<Neno booqana tishuttese zihe! Wontoy niya oxhoko oxhe. Wogana yaa'ese utti yesiniya woga keenguwasa taa u oxhorosa ne ohe?>> hidi e hido.

⁴Yenniyani yaha yecha axiti Phawlose <<Wontoy kahinituse afana gaddo adiya ne cashe?>> yeydi u hido.

⁵Phawloseni <<Nuundo na'axhito! Tani kahinituse afana ade e maaqesa erdo badiko ta yecha. <Axiti afana maaga gara iita zeerdofuna> yeydiko e diizuttese>> yeydi e hido.

⁶Phawlosey yaha yecha axita badey Sodoqaxita badey Farasaxita maaqesa beedi <<Nuundo na'axhito, tani Farasaxukofa yelutta Farasaxuko. Hatte hay yaa'axiti buro esuna ta uddhosi <Haydhasiti dendako dende> hidi gobbo ta keenge gishako>> yeydi hissine gate aheesiti giddaa be kato keddaysi e zeerdo.

⁷Yeydi e zeerdine Sodoqaxituseni Farasaxituseni u gidda bersay dendine bhikkiluttechashiti lam'e shahutto.

⁸Ye esini Sodoqaxiti <<Haybo denxoy baasso, Wonto woosaxiti baasso, iita ayaanani maaqqe modhe ayaanani baasso>> hidi hineesita u maaqusune Farasaxiti <<Ye usiti uddiko yese>> hidi hineesitako u maaqicha.

⁹Yenniyani iitana u koysso. Farasaxiti bade maaqe bidzi bidziti Muse woga eruseesiti dendi <<Nuni ha axi gara iita zeere beedobaanxhiko. E badena ayaanay oo'oyne Wonto woosaxi zeerdosa am nuni ere?>> yeydi hissine ye zeere gara miindi u berso.

¹⁰Bersay fettona aatti handine axiti Phawlose meyssi u gusseesume tooraxituse afana maagay jhasshi <<Handi Phawlose axi giddaafa shoddi oowayte, tooraxiti essa yese godowani sekke aanguwayte!>> hidi hissine be tooraxituko e oto.

¹¹Ye e guta qamani Laaxi Phawlose da'aa eedhi <<Oseywa, Yerusaleeme ta gisha ne zeerdonike yeydiwo Rooma katamaani taase ne zeeroronikeko e worguse>> yeydi e hido.

¹²E wonto geede u taafoy oyddi tamme gardese Ayhudaxiti aachiyaanna bhikkilutti <<Phawlose woddho badi kaxa muuwanxhiko, waaxeni ushuwanxhiko>> yeydi hissine u caadho.

¹⁴Usini kahinituse afana maagitukowara gate cimitukowara yoodi <<Phawlose woddho badi abani nu dadda'uwannike wolla minsiko nu caadhese.

¹⁵Yoonase hinuni gate aheesitaara wolla kundi koso zeere e garafa oycci ekkesa bishusshi tooraxituse afana maaga Phawlose hinuko e anxorosa oycuwayte. Haya yoodi e ello baanne esa wodhese naquttiko nu yese>> yeydi u hido.

¹⁶Hinne Phawloseyndo busho na'i ogiya aachunti kafese u hinesa siidi tooraxiti essa yese godo handi gelli Phawloseko ye wolla u kundesesa e oto.

¹⁷Phawloseni xhiixi gara afana maagitaafa bidzo xheydi <<Ha na'i tooraxituse afana maagako ohe zeerey yese gisha esuko aanguwa>> hidi e hido.

¹⁸Xhiixi gara afana maagani ye na'iyo esuko etti gelli <<Tufaxi Phawloseko taa xheydi ha na'i neeko ohe zeerey yese gisha neeko ta ooworosa taa shidhine ta oodo>> yeydi e hido.

¹⁹Tooraxituse afana maagani ye na'i kuche ayti e gooshewo bade gara etti kessi <<Amuna taako ne ohe?>> hidi e oycco.

²⁰Ye na'ini <<Ayhudaxiti Phawlose koso zeere oycesha bishusshi guta gate aheesiti buro ne uqusorosa niya oyceshuko u kundese.

²¹<Esa woddho badesine kaxani muuwanxhiko, waaxeni ushuwanxhiko> hidi hissine caadhi oyddi tammi axe gareesiti ogiya aachunti esa wodhese kafiyakako u yese. Hatte neekofa siyewoko attesa. Ha e gisha eetofuna!>> yeydi e hido.

²²Tooraxituse afana maagani <<Ha taako ne otosa <Esukoko ta oto> hidi hissine oonekoni zeerdofuna>> yeydi hissine ye na'iyoni e anso.

²³Ye e geedeni tooraxituse afana maagay xhiixi gara afana maagitaafa lam'e hanke beeko xheydi <<Qama haydzi saate e maaqusune Qesaariya hange lam'i xhiixi tooraxitaara laappi tammi faradzena hange tooraxitaara lam'i xhiixe dhozzena darge tooraxitaara naquwayte.

²⁴Phawloseni e gara utti hange keemo naddhi wude ahe Filikooseko modhena handi e ellorosa mahuwayte!>> yeydi e hido.

²⁵Woossoni Filikoosese diizisine

²⁶<<Qelawdoose Lusiyosekofa, wude ahe kuxuttese Filikoosese, modhiya sawa ne yese?

²⁷Ha axe Ayhudaxiti ayti wodhesuko u hicha. Maaqe baaka Roomaxe e maaqesa ta erdo geede tooraxitaara elliko ta maardo.

²⁸Abase esa u luukesa erese ta wordo gisha u gate aheesiti buro oodiko ta yecha.

²⁹Esa u luukichoshini be wogame hissine e maaqesako ta erdo. Hidakoni e tufuttorosa oo'oyne e hay'orosa ellusesimay baasso.

³⁰Ha axe wodhese u kundesesi taako ohuttoniyako yenniyawo neeko ta anso. Luukeesiti ne buro u luuforosa usuko otiko ta yese>> yeydi hissine diizzi e anso.

³¹Hine tooraxiti be woosuttonike qamawo Phawlose Antiphaxhrose hidi hisso godo u ellusso.

³²Gutani faradziyaditi Phawlosiyara hamoronike mati be godo hanke u maaddho.

³³Faradziyaditini Qesaariya elli diizuttecha woosso ye wude ahicha Filikooseko indi Phawlose e buro u uqusso.

³⁴Esini ye diizuttechashe be zeerusso geede Phawlose <<Aan wudaxuna neni?>> hidi e oycco. Kilqiya wude axe e maaqesa erdi

³⁵<<Niya luukichaashiti yoosuneko ne zeere ta beyye>> hidi hissine kakkeesituse <<Herodise qeyshi giddaa esa kakkuwayte>> hidi e hido.