Read koorete Anxuttaasiti 24 Bible Online

Anxuttaasiti 24 - koorete bible

Anxuttaasiti 24

¹Ichichi wonte geedeni kahinituse afana ade maaqe Hanaaniyay bidzi bidzi cimitaara yaa'a zawa Rooma wogase ee'esa maaqe Terteloosiyara Qesaariya e hando. Hinne usini ye wude ahicha Filikooseko Phawlose esuna be luuke luufo u uqusso.

²Phawloseni xheygutti uddhine Terteloosey esa luukisine <<Kuxuttese Filikoose, neennako laga modhete nu degesso. Zarussi ne massoosunako nu axuse burosume arti dichoy e yoodo.

³Ha ne hanto modhete uddi godowakaara uddi woggakaara keddaydese galatanako nu ekke.

⁴Hatteni wogga bayso badi niyani gafusso badi oddhe ta zeeresa danda'ona ne siyorosako niya ta shi'e.

⁵Ha axi iita hargeko maaddhi saha gara yese Ayhudaxiti giddaaka uddi koyse e denxe. Nuukaafa inxhadhi kessa Nazrataxiti bade durkesi esako.

⁶Ye esumeni garsi Wonto Hayla Zawa dhohusese e hisuneko nu aytese. [Nu wogake e gara yaa'esuko nu massecha.

⁷Yeyko tooraxituse afana maaga maaqe Lusiyosey osana nu kuchiyafa esa e kesso.

⁸Luukichashitini neeko yooworosa e mato.] Esa nu luukesi be uddina aade e maaqenike hossi kessi esa oycci eresuko ne danda'e>> yeydi e hido.

⁹Ayhudaxitini <<Ha esi uddi aadeko>> hidi hissine ye luufose bidzi nuunawo u zeerdo.

¹⁰Ye wude ahicha Filikooseni be kuchena beysi Phawlosey zeerorosa e oto. Phawloseni <<Laga bera aallo ha wudese yaa'axe ne maaqesa ta ere gisha ta luufuttosuse sekke ta mahesa neeko ta ohesi fetto keddaysi maggisineko.

¹¹Wonto kuxese Yerusaleeme ta handosi tamma lam'i wonteme buro e garuwasa neni fettona oycci erese danda'ako ne danda'e.

¹²Wonto Hayla Zawaaka tani ooniyarani berso baasso. Ayhuda Bhikkilo Zawaani katamaani axe ta koysuxusune taa degexutto baasso.

¹³Hatte ta gara be uqusso luufose bidzi atoni uqusese danda'uttuwasso.

¹⁴Neeko ohese ta worgesa siwwa. Ye esini <Nuukaafa inxhadhi dhaddi kessasita> hidi usi hine geri badena eedhiko Laaxi ogena nuwadiyaxhiti Wonto ta kuxe. Muse wogakaara kaayaxiti fissharowakaara diizuttesesa uddiwoko ta aadexe.

¹⁵Usi beese be qinose gobbenike gizo maaqeesitaara gizo maaquwasitaaray haybowafa u dendenike tanini Wontona gobbako ta gobbe.

¹⁶Ha e gishako Wonto buruwakaara axi buruwakaara geeshi muxhuroy yesoronike uddi wogga ta kardutte.

¹⁷Yerusaleemefa ta kessowafa laga bera geedeni ta axita mare miijhe ingesaara Wontose kaasha kaasheshaarako hanke Yerusaleeme ta yoodo.

¹⁸Wonto Hayla Zawaa <Biya geeshe> hidi hisso woga alsese ye esa hantiya ta yesuneko taara u muto. Yenniyani laga axi taara badiko yecha, koysini dendo baasso.

¹⁹Maaquwaye baaka Isiyafa yooda bidzi bidzi Ayhudaxitako yaha yecha. Ye usiti taa luufiya beyese luufo esuna be luukesa keema'ayko ne buro yoodi luufuttuwaye.

²⁰Gate aheesiti buro ta ee'usune ta gara be degesso baysoy yesa'ayko haya yeseesiti ohuttuwaye.

²¹Aadewo u buro eedhi <Haybo denxoy yesako yese hidi ta hido gisha hanzo ta gara e yaa'uttorosa hi buro eedhiko ta yese> hidi hissine ta kato keddaysi ta zeerdosume feday baasso>> yeydi e hido.

²²Filikoosey Laaxi oge modhussi eresa be maaqicho gisha <<Tooraxituse afana maaga maaqe Lusiyosey yookete hi zeere alsako ta alse>> hidi hissine fede wontase e kiito.

²³Xhiixi gara afana maagako <<Esa kakkuwa, qeyshi giddaa sekke hanke e hantorosa tuccofuna, e iginitini esuse worguse abako marese yoosune oossofuna>> yeydi e hido.

²⁴Oddhe wonte geede Filikoosey Darusilla sunge Ayhudaxhiyo maaqe be machiyara e yoodo. Phawloseni xheygussi Yesuusi Kristosana aadexo gisha e ohusune haysi e siido.

²⁵Phawloseni gizetesaara bemba katti yese gishaara buro gara yoone yaa'asaara e zeerdine Filikoosey jhasshi <<Hattese dhaddi hanguwa, taase e bishe woggako niya ta xheyguse>> yeydi e hido.

²⁶Filikooseni Phawlosey esuse miijhe e ingenike gobbisine laga wogga xheydi e zeerusicha.

²⁷Lam'i bera geedeni Filikoose godo Qorqiyoose Fisxhoosey maagetto. Filikooseni Ayhudaxiti maggorosa hissine Phawloseni yaha e tufuttechonikewo dhaddi beese e kesso.