Read koorete Anxuttaasiti 25 Bible Online

Anxuttaasiti 25 - koorete bible

Anxuttaasiti 25

¹Fisxhooseni e gara be maagetto wude be gello haydzi wonte geede Qesaariyafa Yerusaleeme e hando.

²Yahani kahinituse afana maagitaara Ayhudaxituse anguzaxhe maaqicha bidzi bidzitaaray Phawlose gara be luufo u denso.

³Esani ogiya aachunti katti wodhese be worgicho gisha Phawlose Yerusaleeme oowussi ususe modhe e hantorosa u shidho.

⁴Fisxhooseni <<Phawlosey Qesaariya kafuttiyako e yese, tanini ukkenawoko sekke maaddhi hange.

⁵Hi maagiti taara Qesaariya hanguttuwaye, Phawlosey keenge baysoy yesso yaha luufuttuwaye>> yeydi e hido.

⁶Fisxhooseni hazzuppe oo'oyne tammi wonta aallo u da'aa be decco geede hanke Qesaariya e maaddho. Ye e gutani yaa'ase utti Phawlose u ooworosa e oto.

⁷Phawlosey uddhoniyani Yerusaleemefa yooda Ayhudaxiti esa gooddi eedhi laga deexho luufo e gara u uqusso. Ye be luutto luufose ato uqusey uso iissho.

⁸Phawloseni <<Tani Ayhuda wogaseni maaqqe Wonto Hayla Zawa garani oo'oyne Rooma kaati garani ta hanto baysoy baasso>> yeydi hissine ye zeerese e utta sekke e mato.

⁹Fisxhoosey Ayhudaxiti maggoro gisha hidi hissine Phawlose <<Yerusaleeme handi yaha ta buro yaa'ase ee'e worguwa ne worge?>> yeydi e oycco.

¹⁰Phawloseni <<Rooma kaati yaa'axi buro eedhiko ta yese, ta gara yaa'e e worgusesi usoko. Nenini modhussi erenike Ayhudaxiti gara ta hanto baysoy bidzini baasso.

¹¹Baysaxe maaddhi haybose mahe bayso ta keema'ayko <Haybowafa ta attoose> hidi hiwwasso. Ha u luukesi yaho maaqo'aykoma ooneni ususe taa garsi inguwasso. Rooma kaatuko taa garxuwa!>> yeydi hissine hanke e mato.

¹²Fisxhooseni yenniyawo beera hanticha maagitaara wolla kundi << <Rooma kaatuko taa garxuwa!> hidi neydo gisha Rooma kaatuko hamako ne hamme>> yeydi e hido.

¹³Oddhe wonta geedeni kaati Agriphaara Barniqiyaray <<Haballe modhena ne yoodo!>> yeydi Fisxhooseni sawusese Qesaare u yoodo.

¹⁴Yahani laga wonte be uttoniyaka Fisxhoosey Phawlose gisha kaati Agriphako <<Filikoosey tutti gaddese bidzi axuko haya yesa.

¹⁵Yerusaleeme ta yechoniya kahinituse afana maagitaara Ayhuda cimitaaray ha axi gisha taase be oto geede <E gara yaa'uwa> hidiko taa u hidecha.

¹⁶Tani <Luufuttesi luukeesiti buro eedhi be luufuttosuse e utta e mato baane luufuttase e gara yaadhi garsi ingey Rooma kaati woga maaquwasso> yeydi ususe ta mato.

¹⁷Hinneko luukichashiti bhikkilutti hanke u yoodine dooddo badesinewo guta alleydi yaa'ese utti <Phawlose ta buro oowayte!> hidi taydo.

¹⁸Esa luukichashiti eedhi e luufo uqususune <Iitako e hantese> hidi ta massechoyne deexho luufo e gara uquse u dheeddo.

¹⁹Maaquwaye baaka esa u luukichoshi be Wontose be keenge be woga gishaara haydhi yechashe <En'ako e yese> hidi Phawlosey hine Yesuusa gishaarako.

²⁰Ha esuke yese zeere ta birche ogey ta buro baanne Phawloseko <Yerusaleeme handi yaa'ase yaha ee'e worguwa ne worge?> hidi tayne

²¹Phawlosey e zeerey angussi Rooma kaati buro oycuttorosa wordi <Taa garxuwayte!> hidi e hine yaha e hamoro aallo tufe zawa e decorosa ta oto>> hidi hissine kaati Agriphako e zeerdo.

²²Kaati Agriphay Fisxhoose <<Tanini ye axi zeerusune siyesuko ta worge>> yeydi e hido. Fisxhoosey <<Gutako ne siye>> yeydi hido.

²³Hinneko guta Agriphaara Barniqiyaray keddaydese kuxa fuulana be tooraxituse afana maagitaara katamaa yecha orje axitaara yoodi yaa'ase bhikkiluttuso aako zawaa u gello. Yenniyani Fisxhoosey <<Phawlose oowayte!>> hidi otine Phawlose u oodo.

²⁴Fisxhooseni <<Kaato Agripha, hinuno nuura haya yeseesito uddi! <Ha axi ha e geede yesorosa worgusuwasso> yeydi hissine uwwisine Yerusaleemeni hayani yese Ayhudaxiti uddi e gara ta yaa'orosa taa u oyccoshi hay ha hi beene axuko.

²⁵E hay'orosa elluse bayso e gara ta degessoy baasso. <Rooma kaati buro taa garxuwa> hidi e hine <<Yaha anxako ta anxo>> hidiko taydese.

²⁶Yeydi e maaddhakoni ta Laaxuko esume ta anxesi <Ha esako> hidi hiyutte zeere degesso baasso. Ha e gishako hossi kessi esa nu oycco geede ta diizesa degexese hi burowara kaati Agripha burowara hay ta uqusso.

²⁷Tufaxe afana maagako garxisine esuna e luufuttosa adduse dheebey muyoonteko taa e bishe>> yeydi e hido.