Read koorete Anxuttaasiti 26 Bible Online

Anxuttaasiti 26 - koorete bible

Anxuttaasiti 26

¹Agriphani Phawloseko <<Neni neese zeeruwa>> hidi e hido. Phawlosey be hanto baysoy baannike ohese be kuche buddi

²<<Kaato Agripha, Ayhudaxiti taa luutto luufose ta hanto baassoy baannike u erorosa e utta ne buro mahisine maggako ta magge.

³Nenini Ayhuda wogaara be giddaa aba gara u bersesaara uddi modhussi ne ere gisha ta ohesa dandadhi ne siyorosako niya ta shi'e.

⁴Ta nayjhetiyafa ayti ta wudiyakaara Yerusaleemiyakaara ta yecho yeso Ayhudaxiti uddiko u ere.

⁵Nu Wonto esuna nu kuxe woga uddiyademe garsi minsi kakkicha Farasaxitaafa bidzo ta maaqichonike burowafa erako u ere. Ha esi aade maaqenike zeerese worgo'ayko zeeruttuwaye.

⁶Hay hatte luufutti yaa'ase haya ta eedhosi Wontoy nuwadiyaxhituse <Ingako ta inge> hidi e hidesesa gobbo mahiyafa dendasunako.

⁷Nu tamma lam'i ommiti Wontoy <Ingako ta inge> hidi be hidesesa e ingete beyese gobbisine wontani qamani oseydiko Wonto u kuxicha. Kuxuttese kaato, taani Ayhudaxiti luuttosi ha gobbo gishako.

⁸Wontoy haydhaasita haybowafa e denxenike hinuni Ayhudaxiti abasuna <Aadeko> hidi hi ekkuwaane?

⁹Tanini ta badena <Nazrataxi Yesuusa sunxe ta danda'e makko inxhadhi e gara laga iita base hanteko taa e worguse> yeydi taydo.

¹⁰Yeysi Yerusaleemeni ta hanto. Kahinituse afana maagiti garafa ta etto adetona aadexichashita lagitako tufe zawaa ta gelsicha, uso wodhese u yaa'eniyani wodheesitaara wolko ta kungicha.

¹¹Laga woggaa Ayhuda Bhikkilo Zawittaa uddi u duruttoronikiyara <Nu aadexo dhaddiko nu yese> hidi u hiyorosaara ta mahicha. U gara keddaysi huulliko Ayhudaxitume wude yese katamittaa handi uso waayye beysi ta gooddicha.

¹²Bidzi wonte ha zeerena kahinituse afana maagiti garafa adetowara woossowara etti Damasiqo ta hangicha.

¹³Kuxuttese kaato, ogiyanna ta hangusune surinte saatawwa qoossi fo'e gare fo'e ta beedo. Feditaara wolla hangiya ta yesune nu googiya afaafa e faddho.

¹⁴Nu uddinani sahaa undi nu yesune Ibrayste nuunana <Sawle, Sawle, ame taa waayye ne beyse? Niya mahese oxhe kallo ne inxha'ayko ne gara miimoko e miinge> yeydi hine kato ta siido.

¹⁵Tanini <Laaxo, neni oonena?> yeydi tayne Laaxini <Tani waayye beysiya ne yese Yesuusako.

¹⁶Hatte dendi ee'uwa. Neese ta addeydosi hatte taa ne beedosunaara buro gara niya ta beysesunaara ta maraxaara ta ataxaara ne maaqorosa niya maagexesuko.

¹⁷Isra'eele axiti garafaara ussaa niya ta anxe Ayhuda maaquwasiti kuchiyafaara niya kessako ta kesse.

¹⁸U aafey beyorosa mati cenchaafa fo'iya ne garxorosa Humbaye adeto oomowafa Wontoko ne mahorosako nemba ta anxe. Yenniyani usi be cubbowafa u maarutte, taanna be aadesoosunako haylondeseesiti giddaani beese godo u degexe> yeydi e hido.

¹⁹Kaato Agripha, afaafa taase harajena ohuttasuse woosuttiko ta yese.

²⁰Burona Damasiqo yese axituse, sekkeni Yerusaleemiyakaara Yuuda wudiya yeseesitusaara uddi yeydiwo Ayhuda maaquwasituseni <Hi cubbo dhaddi Wontoko maaquwayte! Yeydi hi maaddhosi esuna erutte hanta hantuwayte> hidiko ususe ta oto.

²¹Ha e gishako Ayhudaxiti Wonto Hayla Zawaa ta yechoyne ayti taa wodhese u wordo.

²²Hanzo aallo Wontoko tamba marda. Hinneko haya eedhi oddhese orjeshe ohiya ta yese. Kaayaxitaara Musiyaray <Yeydiko e maaqe> hidi buro u zeerdechoshita baaka feda abani ta otoy baasso.

²³Ye esini <Mesihey e maddhunge, haydhasitume burona dendena Isra'eelaxitusaara Isra'eele maaquwasitusaara modhete fo'e e oduse> hidiko u hidecha>> yeydi e hido.

²⁴Esini yeydi zeeriya yesune Fisxhoosey katteydi <<Phawlose, goojhiko ne yese! Ne erdo laga eray niya goosshiko e yese>> yeydi e hido.

²⁵Phawloseni <<Kuxuttese Fisxhoose, tani goojho baasso. Goojho baa axi zeerenikeko aade zeeriya ta yese.

²⁶E buro jhashe baaka ta zeerdo kaati ha zeere erako e ere. Ha esi aachiya hantutto baassa e maaqe gisha kaati garafa bidzi zeereni tulxhuwannike erako ta ere.

²⁷Kaato Agripha, kaayaxiti otosa aadeko hidi hiwwanuwa? Aadeko ne hinesa erako ta ere>> yeydi e hido.

²⁸Kaati Agriphani Phawlose <<Hatte ha oddhe woggawo Kristosa ta aadexoronikiya taa ne mahe?>> yeydi e hido.

²⁹Phawloseni <<Oddhe woggani maaqqe aako woggaaka niyawo maaddho badi hanzo ha ta zeerdosa siidasiti be uddina ha tani tufutto tufewo baaka tani maaddhonike u maaqorosako Wonto ta shi'e>> yeydi e hido.

³⁰Ye e geede kaatini, ye wude ahichashini, Barniqeni, usaara yechashitini be uddina dhaddi u dendo.

³¹Kessi dhaddi hangisineni <<Ha axi haybose oo'oyne tufese biya ellusesa abani hanto baasso>> yeydi u hido.

³²Agriphani Fisxhooseko << <Rooma kaatuko taa garxuwayte> hidi hiye e dheeddako dafuttesuko e danda'icha>> yeydi e hido.