Read koorete Anxuttaasiti 27 Bible Online

Anxuttaasiti 27 - koorete bible

Anxuttaasiti 27

¹Markabena Xhaaleya nu hangoronike e maaddhoniya Phawlosiyara fede tufaxitaara Rooma kaati Awgusxhoose tooraxitaafa Yuliyose sunge xhiixi gara afana maaga kuchiya u gaddo.

²Isiya bagade nuunaaka yecha katamittaa hange Adramixhise katama axi markabiya utti hame nu ayto. Maqadoone wude yese Teselonqe katamaxi Aristrokoseni nuurako e yecha.

³Geede wonte Siidoona nu ello. Yuliyosey Phawlosese modhe maxo be keengicho gisha be iginituko handi biya worgusesa e degexorosa <<Hanguwa>> hidi e hido.

⁴Yahafa nu dendusuneni nu burona burona hanke agexi oxhicho gisha Qophrose dhaanay agexe nu garafa tuccinne hame nu ayto.

⁵Kilqiya wude nuunannaara Phanfiliya wude nuunannaara gardi bagade gara handi Luqiya wudiya yese Murra hidi hisso katamaa nu ello.

⁶Yahani xhiixi gara afana maagay Iskindiriyafa Xhaaleya hange markabe degessi essaa nuu e uttusso.

⁷Laga wonte loddidi hangisine laga maddhana Qenidoose sunge wudese e da'aanna nu gardo. Nu buro garani nu hangesa agexi oossine Salmoone nuunana gardi Qerxhese dhaanay yoocha agexe tuccine hangisine

⁸laga maddhana ye dhaanase e nuunaanna nuunaanna gardi Laasiya katama da'aa yese <<Kaxe Ekkuso>> hidi hiyutte katama handi nu ello.

⁹Hamiya nu yesune ogiya laga wontiti gardinne woggay Xhooma Wonta geede e maaqicho gisha bagade garana hamey lubbose iitana maddhunxesa e maaqicho gisha Phawloseni

¹⁰<<Gero, gero! Nu buro yese hamuwaka maddhaara bayese danda'e abakowaray yesesako ta beene. Hi idda garaara, markabe garaarawo e maaddho baanne ye esi e yoonesi axi garaarako>> yeydi e oto.

¹¹Xhiixi gara afana maagay Phawlosey zeeresa siyekofa markabe durke adesaara ye markabiyadesaara u zeeresa e siicha.

¹²Ye <<Kaxe Ekkuso>> hidi hiyutticha godoy bargo garxese bishuwa godo e maaqicho gisha ye markabiya yecha laga axiti <<E danda'utto'ayko Finqe shidhi yaha bargo nu garsakoko e bishaane>> yeydi hissine be maxo u uqusso. Qerxhese yese Finqey qoossi gele bade maaqisine afa badefani oomo badefani gele markabese do'eko e maaqicha.

¹³Oomo badefa agexi oddhe agetusune beedi u massechonike maaddhesesa uso e bisshinne dhaddi hamese u dendo. Ye markabey ee'icho godofani dendi ye dhaana nuunana nuunana ayti hamiya u yecha.

¹⁴Oddhe wogga geedeni <<Afa Bade Agexe>> sunge iita osaxi agexi dhaana badefa dendi usuko e agetto.

¹⁵Agexi markabe ur'ine nu worge oge hame danda'e dheeddi agexuwoy ur'i be agete bade etti e aando.

¹⁶Qeeda sunge dhaanay agexe tuccine hangisine lubbo maarese ye markabena goochutti yoocha zabha bayese e hichoyne ayti hayyisi nu maardo.

¹⁷Ye zabha waassaafa markabiya kessi u gaddo. Ye e geede markabiyaditi ye markabey me'eeme ganena e oomona aassi xhaaxhi u tutto. Markabey Surte hidi hiyutte waassaa bhikkiluttese siisukaa e geleeme jhasshi markabey esuna hangichosha e qinowafa u hossine agexi be agete bade etti e aando.

¹⁸Jhirahoy miindi maddhunso geede guta ye markabiya yecha idda bagadiya dafe u ayto.

¹⁹Markabey hangoronike maricha abakita haysso wonte kessi waassaa be kuchena u datto.

²⁰Laga wonte qoosseni xhoolinteni beedo baanxhiko. Agexi iitana nu maddhunsoniya <<Ha essaafa sekke attese danda'uwanxhiko>> hidi hissine gobbo nu burso.

²¹Axitini laga wonte kaxa muudo badi u dooddo. Hinne Phawlosey u giddaa dendi eedhi <<Ha axito! Hinuko ta otosa siidi Qerxhesefa dende hi dheeddesako haanxhi maddhaara abako bayowaray hinumba elluwadiko yecha.

²²Hatteni markabewoko iitesa baaka hinukafa bidzi axini hay'uwasso. Ha e gisha <Oseywayte, jhasshofita> hidiko tayne.

²³Esuse ta maaqe ta kuxe Wontoy anso woosaxi onxe ta da'aa eedhi

²⁴<Phawlose, jhasshofuna, Rooma kaati buroko ee'e nemba e worguse. Wontoy neera hangeesita uddi u hay'uwannike matiko e yese> yeydi hissineko taako e oto.

²⁵Ha e gisha oseywayte. Wontoy otosa tani gobbako ta gobbe, taako e zeerdonikewo maaqoko e maaqe.

²⁶Ageximay bidzi dhaanaaka aandi nuu datto badi dhagguwasso>> yeydi e hido.

²⁷Mediteraniya bagade garana sekke hanke maddhundi hamiya nu yesune tamma oysso qama ekke wodhakka markabiyadita saha yoodi nu uddhosa uso e bissho.

²⁸Markabe gara yesine be oomo yekke waaxi yese aallo gane datti u mattine oyddi tammi meetire e maaddho. Oddhe shiddhi sekke u dattine haydzi tammi meetire e maaddho.

²⁹Bagade nuuna yese shuchuna essa nu yecho markabey keerutteeme hooddi ye markabese e ee'orosa e geede badena oyddi malahiqe bagadiya u datto. Qama maaqicha sahay wontorosani Wonto shi'iya u yecha.

³⁰Markabiyaditi be lubbo maarese oddhe zabhaa utti tulxhese u masso. Ye e gisha markabe essese malahiqita buro badena dafese hinesa bisshi markabiyaka yecha oddhe zabha bagadiya u hosso.

³¹Yenniyani Phawlosey xhiixi gara afana maagakowara tooraxitukowara <<Ha markabiyaditi ha malla markabe gara mikkidi utto baa aallo ha waassaafa attese danda'uwaytako>> yeydi e hido.

³²Ye e geedeni tooraxiti markabiyara oddhe zabha wol gara tuttecha gane bursi bagadiya u datto.

³³Phawloseni wontese e hinne be uddina kaxa u miyorosa ohisine <<Kaxa muudo badi hay'eseni atteseni e feeqa yesine hi dooddoynay hay hanzo tamma oysso wonteko.

³⁴<Odde, kaxa muuwayte!> hidiko hinumba ta shi'e. Hi muudoyna hi attoronikeko hinumba e mare. Hinumba miidhe basi fetto bidzini baasso>> yeydi uso e osusso.

³⁵Ye esa be zeerdo geedeni boora densi uddiyade buro Wonto galatti meyssi miye e ayto.

³⁶Phawlosey zeerdosunani oseydi be uddina kaxa etti miye u ayto.

³⁷Markabiyaka yecha axiti lam'i xhiixe laappi tamma izzuppi axitako nu maaqicha.

³⁸Muudi be missho geede markabey iddecho gossa bagadiya u dattine markabey shawutto.

³⁹Sahay wontine saha u beedo. Ye be ello godo erdo badiko u yecha. Waaxi sekke sahaa gardese godo handi elli essaanna be kese saha shankeydesesa u beedo. E danda'utto'ayko hidi hissine markabe yaha bagade nuuna aamese u wordo.

⁴⁰Bagadiya be dattecho malahiqiti ganita u burso. Yenniyani markabe durkicha mixe e godowafa etti be tuttechosha gane birshi ye mixe sekke oomona e baliya u gelso. Buro badena agexuse yecha oddhe maa'o wokke hissi bagade nuuna dhaddi kesese u aadho.

⁴¹Hine bidzi godo duuluttese siisuka markabey gelline siisi ayto. Buro badenani aykutti en'e e dheeddine geede badena jhirahoy oxhicho gisha me'e e ayto.

⁴²Tufaxitaafa bidzini u burofa dhaddi u tulxhuwannike uso wodhese tooraxiti wolla u kundo.

⁴³Xhiixi gara afana maagamay Phawlose maarese be wordo gisha be maxoke u hantuwannike e oosso. <<Daake ereesito, markabiyafa waassaa doondi daakaddhi saha melaa dhaddi kesuwayte!

⁴⁴Attaasitini essaaka yecha massuttese mixe etti feditini ha markabe me'ita etti esuna daakaddhi bagadiyafa kesuwayte>> hidi e hido. Ye ogena be uddina bagadiyafa modhenawo sahaa u kesso.