Read koorete Anxuttaasiti 28 Bible Online

Anxuttaasiti 28 - koorete bible

Anxuttaasiti 28

¹Bagadiyafa sahaa modhetena nu kesso geede essa nu kesso dhaanay Malta hiyutte godo e maaqesa nu erdo.

²Ye dhaanaa yechashitini orje modhete nuuse u hanto. Irani bukka toyyani toyya hidi hiya yecho gisha nu kashorosa nuuse tama essi nuu u motto.

³Phawlosey unxha bhikkilli tamaa gadeniya ye tama binnana shooshi kessi e kuche saaxxhi i ayto.

⁴Ye dhaana yecha axiti Phawlose kuche shooshi saaxxhi aytesesa be beedoniya <<Ha axi aadewo axe woddhesesako! Bagade jhirahowafa modhena kessakoni yaa'e Wonto hidi nu hinesi yaa'a garafa tulxhi attese dandadho baasso>> yeydi u hido.

⁵Phawloseni ye shooshe be kuche garafa tamaa tigissi datti bidzoni abako hido badi e atto.

⁶Axitini <<Hatteko e garay kixhe, hatteko dedha e hay'e>> hidi hissine laga woggaaka u kattine aban e gara elle dheeddosa be beedo wogga be maxo arsi <<Ha esi wontowafa bidziko>> yeydi u hido.

⁷Ye nu yecho godowa nu da'aa ye dhaana yese axe durkicha ade maaqe Puupiliyose sahay e yecha. Esini be zawaa nuu motti haydzi wonte modhussi numba e kusso.

⁸Esadeni michanaara shootenaara hardi woy'usune Phawlosey esuko gelli be kuche e gara gaddi Wonto shidhi esa loolusso.

⁹Ye adey loollo geede ye dhaanaa yecha fede hargaxitini Phawloseko yoodi be hargiyafa u loollo.

¹⁰Axitini laga ogena numba u kusso. Hamese markabena nu dendo woggaa nuuse worgusesa uddi mikkewo oodi markabiya u gelso.

¹¹Malta dhaanaa haydzi agunna aallo nu dooddo geede bargo yaha garsecha Iskindiriya katamaafa yooda markabiya gelli nu dendo. Be Wonto mati u kuxicho Diyosqorose sunge wonto gara markabey e sungicha. Axi ye markabe sunxe esuna erorosa ye Diyosqorose bisha naddhi ye markabiya burona u gadicha.

¹²Sirakuse katamaa handi haydzi wonte yaha nu feyssho.

¹³Yahafa dendini bagadiyanna hangisine Regiyome sunge katamaa nu ello. Yahani bidzi wonte feysshi oomo badefa agexi agetto gisha lakko wonte Putiyolose katamaa nu hando.

¹⁴Yahani aadexeesita nu degessinne usaara nu aqorosa u shidho. Laappi wonte geedeni Rooma katamaa hamese nu dendo.

¹⁵Rooma katamaa aadexichashiti nu yoonesa siidi nuu mokkese Afiyose gadhesa aallo fediti assi <<Haydzi Aqussi Zawa>> hidi hiyutte godo aallo nuu mokkese u yoodo. Phawloseni uso beedi Wonto galatti e oseydo.

¹⁶Rooma katamaa nu ello. Yaha Phawlose kakke bidzi tooraxi inguttine be gooshe e yesoronike u mato.

¹⁷Phawloseni haysso wonte geede Rooma katamaa yecha Ayhudaxita durkeesita e xheydine u bhikkilutto. Esini <<Nuundo na'axhito, Isra'eele axiti garaara nu adiyaxhiti woga garaara ta hanto baysoy baanne yahowo Yerusaleeme taa tutti Roomaxituko u indo.

¹⁸Roomaxitini hossi kessi taa be oycco geede haybo yaa'ase aandi ellusesa ta gara dheeddi mikke taa dafese u wordo.

¹⁹Ayhudaxiti <Mikke dafuttuwasso!> yeydi u hido woggaa <Rooma kaatuko taa garxuwayte!> hidi ta hiyoronike e maaddho. Maaqe baaka ta axe maaqe Ayhudaxita ta luuke zeerema keenguwasso.

²⁰Hay hatte hinumba ta xheygussosini hinumba beyesaara hinuko zeeresaarako. Ha sansalatena ta tufuttosini Isra'eele geruse ingutta gobbo gishako>> yeydi e hido.

²¹Usini <<Yuuda wudefa ne gisha diizutti nuuse yooda woossoy baasso. Yahafa yooda axitaafa ne gisha nuuko otasaara iita odusasaaray baasso.

²²Ye beese be gooshuna Wonto kuxeesita uddi axi inxha'enike erako nu ere. Ha e gisha aba ne maxoy maaqesa ne zeerete siyesuko nu worge>> yeydi u hido.

²³Wonta be kiito geede ye kiito wonte e yecho zawa laddi u yoodo. Esini ketiyafa ayti qama aallo Wonto kaatete gisha ususe aakussi e oto. Muse woga fissharowafaara kaayaxiti fissharowafaara Yesuusa gisha <<Aadeko>> hidi u hiyoro aallo e erusso.

²⁴E zeerdosani baditi u etto baditi u inxhadho.

²⁵U maxoni bidzo maaqe dheeddine u shahutto. Dhaddi hamese uysune Phawlosey aallicira zeere zeerisine <<Hinadiyaxhituse Ayaana Geeshi kaayaxi Isayasena zeerdosi aadeko e maaqicha.

²⁶E zeerdo zeereni <Ye gerituko handi <<Siyema siitako hi siine gaxhuwaytako, beyema beetako hi beene aba hi beedosa eruwaytako>> hidi hiwwa.

²⁷Ye axiti muxhurowani geluwasso, u washeni siwwasso, be aafeni u cinadho, yeydi maaqe e dheeddako be aafena beedi be washenani siidi be muxhurowanna gaxxhi taako u maaddhesesakoko uso ta loolusicha> yeydi hinesako e maaqicha.

²⁸Yoonase Wontoy be maarenike Ayhuda maaquwasituse woosso e ansesenike eruwayte. Usini ye woosso siitako u siine>> yeydi e hido.

²⁹[Phawlosey yeydi zeerdoniya Ayhudaxiti wolla sekke hanke iitana bersisine dhaddi u hando.]

³⁰Wooma shandi axi zawa Phawlosey lam'i bera kume e utto. Beeko yoone axitani u uddina motti

³¹ooneni esa tucco baanne Wonto kaatetese ohisiniyara Laaxi Yesuusi Kristosa gisha bidzoni shato badi naassi erusisiniyara e yecha.