Read koorete Anxuttaasiti 3 Bible Online

Anxuttaasiti 3 - koorete bible

Anxuttaasiti 3

¹Bidzi wonte Phexhrosiyara Yohanisiyaray Wontoy shi'utticho wogga odduppi saatena Wonto Hayla Zawaa u hangicha.

²Be yeluttowafa ayti dooma maaqe bidzi adey e yecha. <<Bishachi Suma>> hidi hisso Wonto Hayla Zawa qeyshi sumaa uddi wonte miijhe e shi'orosa axiti iddi oodi u gadicha.

³Ye adeni Phexhrosiyara Yohanisiyaray Wonto Hayla Zawa qeyshe gelese uysune beedi miijhe uso e shidho.

⁴Usini e aafiya caddi beedi Phexhroseni <<Hanke nuuko beewwa!>> hidi e hido.

⁵Esini bidzi abako esuse ingesa esa u bisshine gobbisine usuko modhussi e beedo.

⁶Phexhroseni <<Miijhe keenguwasso, maaqe baaka ha ta keengesako neese ta inge. Nazrataxi Yesuusi Kristosa sunxuna dendi qaadhuwa>> hidi e hido.

⁷E oshichi kuche ayti e denso. Yenniyawo e tokiyara e qicamilitiyaray miindo.

⁸Afaani doondi dendi e eedho, sekke hanke hame e ayto. Qaadhisineni, afaa doongisineni Wonto galatisine usaara wolko Wonto Hayla Zawaa e gello.

⁹Axitini uddina Wonto e galatusuniyara e qaadhusuniyara beedi

¹⁰<<Bishachi Suma>> hidi hiyutte Wonto Hayla Zawa qeyshi suma da'aa utti miijhe shi'ichashi esa maaqichosha u erdo. E gara maaddhasunani miciyakaara dhonxhiyakaara u yecha.

¹¹Ye adeni <<Phexhrosiyara Yohanisiyara dakkuwasso>> hidi usaara e yesune orjena micishine axi uddi <<Salamone kara>> hidi hiyutte godo wolko usuko u woxxho.

¹²Phexhroseni ye esa beedi <<Isra'eele gerito, ha esuna ame hi mice? Hanno ha adey nu osana oo'oyne uddi wogga Wontosewo nu maxicho gisha e qaadhoronike nu matosa hinuse e bisshiniya nu aafiya caddi hi beene?

¹³Nuwadiyaxhiti Wontoy, Abrahaame Wontoy, Yissaaqe Wontoy, Yayqoobe Wontoy garsi hi indechoshaara Philaxhosey <Birchoko ta birche> hidi hidakoni e buro hi inxhadhechoshaara be yele Yesuusa keddaysi e kusso.

¹⁴Maaqe baaka hinuni haylani gizoni maaqesa inxhadhi axe woddhecha axe Philaxhose birchoronike hi shidho.

¹⁵Yeso ingichashe hi woddho. Wontomay esa haybowafa e denso. Nuni ye esuse atoko.

¹⁶Ha axi Yesuusa aadesesesa e maaqicho gisha buro hi beedechoshaara hi erichoshaaray loolli e osaxhosi e sunxunako. Esuna be degesso aadexonako hi buruwaka kumena e loollosi.

¹⁷Gerito! Hade hinumba ahichashituke hinunini erdo badi hi hantonike erako ta ere.

¹⁸Hankeydese ogenako Wontoy burona be kaayaxituna uddi <Mesihey maddha efako e ekke> hidi beydecho kaayoy aaloronike e mato.

¹⁹Yoonase Laaxi sekke hi killoonge bera hinuse ingoronike, burussi hinuse be massecho Yesuusi Kristosa e anxoronike hi cubboy attoronike cubbo hante dhagguwayte, hanke Wontoko maaquwayte.

²¹Olowafa ayti hayla maaqe kaayaxituna Wontoy zeerdechonike uddi ha sahay e killoongoro aallo Mesihey afaa deceko esa e worguse.

²²Museni zeerisine <Ni Laaxi ni Wontoy taanke yese kaayaxe hinusuko hi ommaafa e denxe, e ohesa aba e maakoni e uddina siwwayte.

²³Ye kaayaxi ohesa siwwa axi uddi axi garafa shahuttiko e baane> yeydiko e hidecha.

²⁴Yeydiwo Samu'eeliyafa densi e geede yecha kaayaxiti ooneni uddi ha woggasuko u zeerdecha.

²⁵Hinuni kaayaxiti otechosha ettaasitako. Wontoy Abrahaamese <Neekofa yeluttesunako ha saha gara yese axi ommay uddi u suuzutte> hidi zeerisine nimba yella adiyaxhituse yenniya caadhi e indechoshi hatte hinusuko.

²⁶Be yele be denso geede burona Wontoy e ansosi hinusuko, ye esini hi bidzi bidzina hi iitetiyafa hinumba mati suuzesuko>> yeydi e hido.